Uluwehiwehi kahi pali o nā Ko’olau

Synopsis: Hawai’inuiākea is proud to announce another successful Ph.D. defense of one of its faculty members.

———

Welina mai e nā makamaka heluhelu mai ka lā hiki a ka lā kau. Piha hau’oli ka na’au o ko ‘oukou mea kākau i ke kākau ‘ana mai i ka mo’olelo i kēia pule, ‘oiai, he nū ‘oli nō ia. A eia nō ka lono ke ku’i aku nei, “Uluwehiwehi nō kahi pali o nā Ko’olau.” ‘O ua pali nei o nā Ko’olau e ho’oheno ‘ia nei, ‘o ia nō ‘o Kaliko Baker. I ka lā i nehinei, ua kūpale aku nei ‘o ia nei i kāna pepa lae’ula i kapa ‘ia ‘o A-Class Genitive Subject Effect: A Pragmatic And Discourse Grammar Approach To A- And O- Class Genitive Subject Selection In Hawaiian ma ke Ke’ena Kālai’ōlelo. ‘Eā, e nā makamaka heluhelu, i kākau ‘ia ka inoa o ua pepa nei ma kona ‘ano iho, ‘oiai, ‘a’ole nō i mōakāka nā hua ‘ōlelo a pau i ko ‘oukou mea kākau. ‘O ka mea maika’i, ma ka hō’ike’ike ‘ana mai a ua Pali nei o nā Ko’olau, ua maika’i ka wehewehe ‘ana mai a Kaliko. He ulu nō ka hoi i kā ia nei wehewehe ‘ana mai, a ho’omaka maila ka ho’omaopopo ‘ana iho o ko ‘oukou mea kākau.

He mea nui nō ia mau mea a Baker i noi’i aku nei a i kākau aku nei ho’i ma kāna pepa e holo mua ai kākou ma ka ‘ōlelo a ko kākou mau kūpuna. A ua ulu nō ho’i ka hoi o ko ‘oukou mea kākau. ‘A’ole nō i no’ono’o iki ko ‘oukou mea kākau i ia mau mea āna i hāpai ai. Akā, e ka’aka’a ana ka maka o ko ‘oukou mea kākau, a e ho’olohe ana nā pepeiao i mea e maka’ala ai i ia mau mea. Inā he mana’o paha kou e heluhelu i kā ia nei pepa lae o’o, e ki’i aku ma kēia wahi pūnaewele, http://www.ling.hawaii.edu/dissertations. A ke lana nei ka mana’o o ko ‘oukou mea kākau, e kākau ‘ia he puke e kahi Pilikua o nā Ko’olau i mea e laha ai nā ike i loa’a iā ia. Ho’omaika’i e Kaliko.
 

Mai kolohe i ka Mo’o, o lele i ka pali

Synopsis: One more successful MA defense for Hawai’inuiākea.

———

A puka pono aku nei kekahi haumāna laeo’o o Hawai’inuiākea, ke Kula ‘Ike Hawai’i, ma kona kūpale ‘ana a’e i kāna pepa laeo’o i ka lā 20 o ‘Apelila, a ‘o ka inoa o kāna hō’ike ‘ana, ‘o ia ke po’o mana’o e kau a’ela i luna, “Mai kolohe i ka Mo’o, o lele i ka pali.” ‘O Brooke Hutchins kona inoa.

He mea kākau mo’olelo ‘o Brooke, ‘o ia kāna mea i hana ai ma kāna pepa laeo’o. Ua haku ‘o ia nei i kekahi mau mo’olelo, kahi e kama’āina ai ka mea heluhelu i nā Mo’o i mea e laha ai ko lākou mau mo’olelo. ‘O kā Brooke mea i ‘ōlelo ai ma kāna hō’ike’ike ‘ana, i kēia mau lā, nui ka ‘ike o nā keiki Hawai’i, nā ‘ōpiopio, a me nā mākua nō paha i nā mea e pili ana iā Harry Potter. A ‘o nā mea e pili ana i nā Mo’o, he mau mo’olelo ‘oia’i’o ho’i, ‘a’ole maopopo i ka nui o lākou.

‘Eā, e nā makamaka heluhelu, ‘a’ohe makemake iki o ko ‘oukou mea kākau i ka heluhelu i nā mo’olelo ma ka ‘ōlelo Pelekania. Akā, ‘o kā ia nei mau mo’olelo i kākau ai, he keu aku nō ia a ka hoihoi. A ke kuhi nei ko ‘oukou mea kākau, e lilo nō ‘o Brooke i mea kākau kaulana ma kēia hope aku. Inā he makemake kou e heluhelu, aia kekahi o nā mo’olelo ke kū’ai ‘ia aku nei ma ka hale kū’ai iTunes.

———

E ho’ouna ‘ia mai na ā leka iā māua, ‘o ia ho’i ‘o Laiana Wong a me Kekeha Solis ma ka pahu leka uila ma lalo nei:

>> kwong@hawaii.edu
>> rsolis@hawaii.edu

a i ‘ole ia, ma ke kelepona:

>> 956-2627 (Laiana)
>> 956-2627 (Kekeha)

This column is coordinated by Kawaihuelani Center for Hawaiian Language at the University of Hawai’i at Mānoa.