Synopsis: Gay conversion therapy? What the …? Mahalo, California Gov. Jerry Brown, for a step in the right direction in saving our society from the brink of idiocy.

Welina e nā makamaka heluhelu. ‘O ia po’omana’o e kau a’ela i luna, he māhele ia no kekahi ‘ōlelo no’eau mai kahiko mai e hō’ike ana i ka mana o ka ‘ōlelo. A he maika’i nō ia, akā, mai nō a poina iā kākou ka hapa ‘elua o ua ‘ōlelo no’eau nei, ‘o ia ho’i, i ka ‘ōlelo nō ka make. A ke hui pū ia mau hapa ‘elua, “I ka ‘ōlelo nō ke ola, i ka ‘ōlelo nō ka make,” ‘o ia ka hō’ike piha ‘ana i ka mana o ia mea he ‘ōlelo.

Kohu mea lā, he nānā wale nō kā kekahi po’e o ‘Amelika i ka māhele mua. I ka Hōkū Avalataisa o ka lā mua o kēia mahina nei, ‘akahi nō a ‘ike ko ‘oukou mea kākau i kekahi hana e lele ai ka hauli. Aia nō kekahi po’e kānaka a puni ‘o ‘Amelika ke hana akula i kekahi papahana e pākōlea ai i ke kanaka māhū. He papahana ia kahi e ho’ā’o ai kekahi mau hui a me kekahi mau ‘oihana kahuna pule e kōkua i ka po’e Kalikiano “huikau” e ho’opau loa i ke ‘ano māhū i loko o lākou.

‘Eā, aia nō lākou ke hana aku nei me ka nānā wale ‘ana aku nō i ka māhele mua o ia ‘ōlelo no’eau kaulana a kākou. ‘A’ohe wahi mea o lākou a nānā i ka māhele ‘elua. Ma muli o ka mana o ia mea he ‘ōlelo, “I ka ‘ōlelo nō ke ola; i ka ‘ōlelo nō ka MAKE,” he pō’ino a he pōpilikia paha ka hopena. Eia nō lākou ala ke ha’i aku nei i ke kanaka māhū, ‘a’ole i pono kona ‘ano. ‘O ka mua, no ke aha i mana’o ‘ia ai, he pono ‘ole ke kanaka māhū? ‘O ka pane mai paha a ka manu kapalulu, “MA KA PAIPALA…” E hao aku ana ka nīnau hou a ko ‘oukou mea kākau, na wai lā i kākau i ka Paipala? “NA KE AKUA KA PUKE HEMOLELE I KĀKAU.” A eia au ke ‘ōlelo aku nei, ‘o ka puke e pa’a nei ma nā lima a ka po’e Kalikiano i kēia mau lā, ‘a’ole na ke akua ia i kākau. Na ke kanaka nō. A no laila, ‘a’ole paha e hiki ke kapa ‘ia ua puke ala ‘o ka Paipala Hemolele, no ka mea, ua komo pū ka mana’o o ke kanaka. Pēia pū me ka ‘ili hākeakea o Iesū. Pehea lā i hākeakea ai kona ‘ili a like loa ka helehelena me ko ka ‘ili puakea? Na ke kanaka i kaha ki’i, a pena ki’i paha. He ‘oia’i’o ia? Pēlā paha, ‘a’ole paha. No laila, ‘a’ole hiki ke puni wale aku kākou i ka hana a ke kanaka, o lilo kākou i kamali’i.

He mau kānaka no’ono’o kākou. E no’ono’o kākou i ka hana kūpono a me ke aloha i ke kanaka. A pēlā e hana aku ai. “E ‘ike i ka hoa kanaka (nā hoa kanaka a pau), o kipa hewa ke aloha i ka ‘īlio,” wahi a kahiko.

Mahalo iā Kaleponi i ka pāpā ‘ana aku i ka hana pākōlea i ka ‘ōpiopio māhū. Akā, he ho’omaka wale nō ia. He mea nui ka ho’omalu ‘ana i ke keiki a me ka ‘ōpio, akā, pehea nā kānaka i piha nā makahiki he 19 a ‘oi. ‘A’ole e nānā ‘ia ko lākou pono? He mau hoa kanaka nō ho’i lākou, a no laila, e ‘ike ‘ia lākou kekahi.

E ala mai e nā moku’āina ‘ē a’e, e hahai aku iā Kaleponi ma kēia ala. E ho’omana’o i ke mele a Bob Marley, Ho’okahi Aloha (One Love).

E ho’ouna ‘ia mai na ā leka iā māua, ‘o ia ho’i ‘o Laiana Wong a me Kekeha Solis ma ka pahu leka uila ma lalo nei:

» kwong@hawaii.edu
» rsolis@hawaii.edu

a i ‘ole ia, ma ke kelepona:

» 956-2627 (Laiana)
» 956-2627 (Kekeha)

This column is coordinated by Kawaihuelani Center for Hawaiian Language at the University of Hawai’i at Mānoa.