Synopsis: “Progress is impossible without change, and those who cannot change their minds cannot change anything.” -— George Bernard Shaw

———

Aloha pumehana e nā makamaka e heluhelu nei. Ho’ola’a ‘ia kēia ‘atikala no ku’u kupunahine ‘o Lokelani Moreno. He kupuna ‘o ia ma nā kula ha’aha’a ma kahi o ‘umi makahiki. He wahine ikaika ‘o ia a he kumu ho’ohālike nui no’u. Nui kona a’o ‘ana mai ia’u i ku’u wā kamali’i. He kohu ‘a’aka a na’au pōkole i kahi wā, no ka mea, ‘a’ole ‘o ia hoihoi i ka ho’opaumanawa. Kūlia nō ‘o ia i ka pahuhopu a ho’okō aku nō i nā kuleana. I ka ha’alele ‘ana o ka hā iā ia he wā kaumaha a pa’akikī no’u. I kēlā me kēia lā ma ia hope iho, noho wale au me ka hāli’ali’a aloha iā ia. Ua hele nō a kāmoloā ke ‘ano.

Ma muli o kona hala ‘ana, no’ono’o nui au e pili ana i ka holomua o ka’u mau hana pono’ī a me ka holomua nō ho’i o ka po’e Hawai’i. Ke mana’o nei au e ho’oikaika i ka mālama ‘ana i ko’u mau pilina, nā kuleana kula, a me ka’u mau hana like ‘ole a pau. I kēia mau lā nō ho’i, nui ke kūkākūkā a me ka paio ‘ana no ke ‘ano o ia mea he “Hawai’i maoli”. He aha ia mea he Hawai’i maoli? He nīnau wāhi pūniu nō ia. Ho’omana’o au i kekahi mo’olelo a’u i heluhelu ai ma loko o ka papa i kēlā kau aku nei. Penei ho’i:

Aia ‘elua kime pōhīna’i ‘ōiwi ma ka ho’okūkū kahului. ‘Oko’a ka lāhui o kekahi a ‘oko’a nō ho’i ko kekahi. I ka lā ma mua pono o ka ho’okūkū ‘ana, ua mana’o ke kime mua, aia ka pono i ke kiu aku i ka hoa paio i mea e ‘ike ai i kona akamai a me ka ‘ole i ka pā’ani ‘ana. I kiu aku ka hana, ua ‘ike ‘ia ke akamai loa o kēlā kime i ka pā’ani. No laila, ua ho’i lākou nei me ka mana’o e eo ana paha ke ho’okūkū, e aho ho’i ke kūkākūkā ‘ana i ka mea e lilo ai ke eo iā lākou.

I ka hopena o ke kūkā, ua kuhi lākou ‘a’ole paha he po’e ‘ōiwi maoli nā lālā a pau o kēlā kime, a he pono ke koikoi aku iā lākou e hō’oia’i’o mai i ko lākou kūlana he kanaka ‘ōiwi i mua o ka ‘uao. No laila, i ke ahiahi ma mua o ka ho’okūkū kahului, ‘ōlelo akula ke kime mua i ka ‘uao ha’uki e hō’oia ‘ia ke kūlana ‘ōiwi o nā ‘ālapa o kekahi kime. A pane akula ka ‘uao, “Pehea e hō’oia’i’o ai?” ‘Ōlelo aku ke kime mua, “Ma o ka ho’opuka ‘ana i kā lākou ‘ōlelo ‘ōiwi, pēlā nō e ‘ike ‘ia ai.” E like na’e me ka nui o ka po’e ‘ōiwi o kēia mau lā, ‘a’ole hiki i nā lālā o kēlā kime ke ho’opuka i kā lākou ‘ōlelo pono’ī. Eia na’e, ua hō’ike lākou i kā lākou kāleka ‘ōiwi i mea e hō’oia ai i ko lākou lāhui ‘ōiwi. Kū’ē ke kime mua i ia ‘ano hō’ike. ‘O ka ho’opa’apa’a aku a ho’opa’apa’a mai nō ia a welo ka lā. He minamina ho’i kau, no ka mea, ‘a’ohe lawa ka manawa e pā’ani ai, a wahi a ka ‘uao, ‘a’ohe mea lanakila. Hoka ihola nā kime ‘elua no ko lākou po’o pa’akikī a me ke kū’ē’ē kekahi i kekahi.

‘O ka nīnau nui o kēia mo’olelo, “He aha ka mea nui?” ‘A’ole paha ‘o ka hō’oia lāhui he mea nui. I mea kōkua aha ia no kākou e holomua ai? He mea ia e pau ai ka “pā’ani” ‘ana. E aho e ho’omana’o i nā mea nui. Aia i laila ka holomua. ‘O ia ka mana’o nui o ku’u tūtū aloha. Mau nō kona a’o ‘ana mai ia’u.

———

E ho’ouna ‘ia mai na ā leka i? m?ua, ‘o ia ho’i ‘o Laiana Wong a me Kekeha Solis ma ka pahu leka uila ma lalo nei:

>> kwong@hawaii.edu
>> rsolis@hawaii.edu

a i ‘ole ia, ma ke kelepona:

>> 956-2627 (Laiana)
>> 956-2627 (Kekeha)

This column is coordinated by Kawaihuelani Center for Hawaiian Language at the University of Hawai’i at Mānoa.