He mau haumāna nā pōpoki?

Synopsis: What can be done to solve the stray cat problem at University of Hawaii at Manoa, and how can we get UH itself to take steps to solve this problem?

———

Ke po’i mai nei ka nalu ‘ino ma ke kulanui o Mānoa nei. Kū ka paila o nā pōpoki ma ‘ō a ma ‘ane’i. Kohu haumāna lākou. ‘A’ole lākou he mau pōpoki hale, he mau pōpoki pae hewa lākou. Hauna, pilau a lepo nā pōpoki pae hewa. He pilikia nui kēia ma ke kula nui ‘oiai ‘ike nā haumāna malihini (a me nā haumāna kama’aina) iā lākou, pio paha ka ‘i’ini i loko o lākou e hele mai i kēia kulanui nei. Aia a pio ke kukui o nā pōpoki ma ke kulanui nei a laila e ‘upu hou paha ka makemake o ka po’e malihini e hele mai i kēia kulanui nei ma ke ‘ano he haumāna. A, aia a ha’alele nā pōpoki a pau, a laila e ma’ema’e ana ke kulanui.

Akā, ‘o kekahi kumu nui o kēia pilikia, ‘o ia ka Wahine Pōpoki, ‘o ia ho’i ka Cat Lady. Hānai ‘o ia i nā pōpoki pae hewa ma ‘o a ma ‘ane’i ma ke kulanui. Piha kona ka’a wane i nā pākeke i ho’opiha ‘ia i ka mea ‘ai pōpoki. Akā, ‘a’ole hiki ke ‘alo a’e no ka mea, ‘a’ole he mea kūhewa ka hānai ‘ana i nā pōpoki!

He aha lā nā wehena i hiki ke ho’ohana ‘ia no kēia pilikia?

‘O kekahi wehena o kēia pilikia, ‘o ia ka hopu ‘ana mai iā lākou pōpoki a lawe aku i ka ‘Ahahui Kū’ē i ka Ho’omāinoino. Akā, he aha kā lākou hana me ia mau pōpoki lā? Ho’oku’u aku paha? A ma hope o kēia, e ho’i hou mai ana nā pōpoki i ke kulanui nei? Ho’omake paha ka ‘Ahahui Kū’ē i ka Ho’omāinoino iā lākou? ‘A’ole makemake paha kekahi mau po’e i ia hopena. Ho’omake iā lākou a hana i manapua paha? A e kū’ai ‘ia aku paha ma ke Kikowaena Kahua Kulanui? He wahi mana’o wale nō kēia, a ‘a’ole paha makemake nā po’e a pau i ka ‘i’o pōpoki. No laila, he aha ka hana?

‘O kekahi wehena ‘ē a’e, ‘o ia ka Polokalamu Ho’ohemo Mea Ho’ohua ma ‘ane’i nei. I mea aha ia? I mea ia e ho’opau ai i ka hānau ‘ana. He mea maika’i kēia, no ka mea, hiki ke ho’opau ‘ia ka hānau pēpē ‘ana aku. Akā, ‘o ka pilikia ho’i o kēia, ‘o ia ke kālā. Na wai e uku mai no kēlā me kēia pōpoki? Ma o ke kulanui paha e hiki ai ke ho’oulu ‘ia ke kālā e uku ai i ia Polokalamu Ho’ohemo Mea Ho’ohua.

No laila, ‘a’ole maopopo ka wehena kūpono, akā, he pilikia nui kēia a pono paha ke kulanui e ‘imi i mau wehena e ho’opau ai i kēia pilikia. Aia a ‘imi kēia kulanui i wehena no kēia pilikia, a laila, e loa’a paha kekahi wehena kūpono.

[‘O ka lilo ‘ana o ka pōpoki i mea’ai, he mea maika’i nō ia, ‘oiai, he mea ‘ai ‘ia ka pōpoki ma kekahi mau ‘āina. A he nui nō nā ‘āina ‘ilihune, ‘a’ole nui ka mea’ai. A no laila, pehea ka ho’ouna ‘ia ‘ana aku o ia mau pōpoki i ka ‘āina kahi e noho nei ka po’e ‘ai pōpoki. A ‘o ka ‘oi loa aku, inā he ‘āina ia e nele nei nā kānaka i ka mea’ai ‘ole. Pau ‘elua manu i ka pōhaku ho’okahi. L.H.}

———

E ho’ouna ‘ia mai na ā leka iā māua, ‘o ia ho’i ‘o Laiana Wong a me Kekeha Solis ma ka pahu leka uila ma lalo nei:

>> kwong@hawaii.edu
>> rsolis@hawaii.edu

a i ‘ole ia, ma ke kelepona:

>> 956-2627 (Laiana)
>> 956-2627 (Kekeha)

This column is coordinated by Kawaihuelani Center for Hawaiian Language at the University of Hawai’i at Mānoa.