Aunty Marvlee Naukana-Gilding

Synopsis: The pouhana of Kamakakūokalani has collapsed, but because of that pouhana, Aunty Marvlee Naukana-Gilding, Kamakakūokalani will not.

———

He lā piha kaumaha ka lā 5 o ka mahina ‘o Iulai i hala iho nei. Ma ua lā nei, ua hiolo iho nei kahi pouhana o Kamakakūokalani. ‘O ia ho’i ka lā i hala iho nei ‘o Aunty Marvlee Kēhaulani Naukana-Gilding. Inā ua komo ‘oe i ka polokalamu Hālau ‘Ike Hawai’i, ua kama’āina nō ‘o Aunty Marv iā ‘oe. ‘O Aunty Marv ke kākau ‘ōlelo mua loa o ka polokalamu Hālau ‘Ike Hawai’i.

Ua ho’omaka kona hana ‘ana ma laila i ka makahiki 1982. A ua mōakāka kona kāko’o ‘ana i ka ho’ona’auao ‘ana, ‘oiai, ua ‘imi akula ‘o ia i ka na’auao a loa’a maila ke kekelē laepua, a ma hope mai o kēlā, ‘imi akula ‘o ia i ke kekelē laeo’o ma ke kālai waihona puke a loa’a. A ma muli o ia kekelē laeo’o, ua lilo ‘o Aunty Marv, ‘o ia ke kahu puke o ka hale waihona puke o Kamakakūokalani. A ma laila ‘o ia i hana ai a kona ho’omaha ‘ana mai ka ‘oihana aku. Ua nui loa kona mau makahiki i hana ai ma laila, a nui nō ho’i nā haumāna āna i launa pū ai. A ‘a’ole i kana mai kona aloha i ia mau haumāna, a he mālama kāna iā mākou. A ua ha’aheo nō ‘o ia i ka holo mua o mākou haumāna ma nā alahele a mākou i hele ai. A ma muli o ia ‘ano ona i kapa ‘ia ai ‘o ia ‘o Aunty Marv, a kapa mai ‘o ia iā mākou ‘o “Bebe.” He makua aloha nui ‘o ia no mākou, a pēlā pū i ko mākou lilo ‘ana i kumu ma Kamakakūokalani a ma kekahi ke’ena o ke Kulanui o Hawai’i o Mānoa. Ke ‘ike ‘o ia, ua pilikia paha ‘oe, ma laila ‘o ia me ka pepeiao ho’olohe a me ka ‘ōlelo a’o a me ka ‘ōlelo hō’olu na’au paha. He wahine piha aloha nō ‘o ia.

A i kēia makahiki nei, ua kau ‘o Aunty Marv i ka hano hāweo. Ua lilo akula iā ia ka Makana I Ulu I Ke Kumu no kona kūpa’a ‘ana ma ka ho’ona’auao ‘ana i ia mau makahiki he nui a me ke aloha i kona lāhui a me nā haumāna a pau āna i launa pū ai, kāna mau keiki ho’i. He kumu alaka’i helu ‘ekahi ‘o ia no kākou a pau a me nā pua o kēia hope aku.

Aia ana kona ho’olewa i ka lā 23 o Iulai makahiki 2013 ma Diamond Head Memorial Park, 529 18th Avenue. E ho’omaka ana ke kipa ‘ana i ka hola 9:00 o ke kakahiaka. A ho’omaka ka ha’i ‘ōlelo ho’ole’a i ka hola 10:00. A ‘o ke kanu ‘ana, aia i ka hola 12:45 ma Diamond Head Memorial Park. E hō’ike paha i ke aloha iā Aunty Marv ma www.hawaiianmemorialparkmortuary.com/obituaries/Marvlee-Naukanagilding/#%21/Obituary.

E Uncle Albert, me ‘oe a me kou ‘ohana ko māua aloha. A mahalo e Aunty Marv no kou lilo ‘ana i ‘ohana no mākou a me kou aloha nui ‘ana iā mākou.

[Nui ka mahalo o ko ‘oukou mau mea kākau iā Lehua Nishimura a me kāna mau keiki, Kanehe lāua ‘o Kapa’a, no ko lākou kōkua ‘ana iā Aunty Marv ma ka mea i hiki iā lākou i ia lā 5 o Iulai. Aloha nō ka ‘ike ‘ana i kahi ulia pō’ino, akā, ua hana pono nō lākou. A he mea maopopo, ua nui ke aloha a me ka mahalo o Aunty Marv iā lākou.]

———

E ho’ouna ‘ia mai na ā leka iā māua, ‘o ia ho’i ‘o Laiana Wong a me Kekeha Solis ma ka pahu leka uila ma lalo nei:

>> kwong@hawaii.edu
>> rsolis@hawaii.edu

a i ‘ole ia, ma ke kelepona:
>> 956-2627 (Laiana)
>> 956-2627 (Kekeha)

This column is coordinated by Kawaihuelani Center for Hawaiian Language at the University of Hawai’i at Mānoa.