Mānoa kāohi mana’o

Synopsis: In a public institution, such as a university, unilateral decision-making should not be confused with policy; no matter at what level.

Aloha hou mai kākou e nā hoa kāko’o i ia mea ‘o ka noa o ka leo. Eia nō kā ‘oukou wahi mea kākau ke ‘auamo hou nei i ia mana’o i hāpai ‘ia i kēlā pule aku nei no ka paipai ‘ana i nā pono sivila o ka lehulehu i kāohi ‘ia maila e kekahi mau luna o ke Kulanui o Hawai’i ma Mānoa.

He mea ‘ike wale ‘ia nō ke kumu i mālama ‘ia ai ua mea nei he kulanui. ‘O ia ho’i, i wahi ia e kupu lanakila ai nā mana’o like ‘ole, pehea ke kūlike a kūlike ‘ole paha me nā mana’o o kona mau luna. A he ‘ano pu’uhonua nō ho’i ia kahi e kūkākūkā ai i nā nīnau like ‘ole a pau, a pau pū ho’i me nā nīnau wāhi pūniu me nā nīnau paha i kohu ‘ole ke ‘ano i ka mana’o o kekahi po’e. ‘A’ole nō i mālama ‘ia no ka ho’omalimali ‘ana i ka mana’o o ia po’e luna.

A no laila, ‘o ka hopena o ka holoi ‘ia ‘ana o nā hua’ōlelo i pena pū ‘ia me ke ki’i o Mauna a Wākea ma luna o kekahi paia i kēlā pule aku nei, ‘o ia nō ka holoi pū ‘ia o nā pono sivila o nā haumāna a me nā kumu nāna ia i pena. No ke aha lā ho’i i holoi ‘ia ai? Ua maka’u paha nā luna o ke Kulanui o hō’ole ‘ia mai ko lākou mana’o e kūkulu i kahi ‘ohe nānā nunui ma luna o Mauna a Wākea? ‘A’ole lā! Eia nō ke kū nei kekahi mau ‘ohe nānā ma luna o Mauna a Wākea i kēia wā a kākou e ‘ike nei, a ua kūkulu ‘ia i loko nō o ka hauwala’au nui o nā leo kū’ē. Mali’a ua hilahila ke kulanui i ka hō’ike ahuwale ‘ia o kona wahi huna, a ua pupuāhulu aku nō paha i ka uhi ‘ana i ia wahi. ‘A’ole kā ho’i! ‘A’ole paha he wahi huna o ke Kulanui!

No laila, ke kuhi nei kā ‘oukou wahi mea kākau ē ua holoi ‘ia e kekahi kanaka ma muli o kona hopohopo o huhū mai nā luna o ke Kulanui i ka ‘ike ahuwale ‘ia o ia mana’o e ho’ohalahala ana i kā lākou hana, a e lilo ia i kumu e hō’ole ai ua po’e luna nei i ka mālama ‘ia ‘ana o ka Arts Fest. Wahi a ka lohe, he mea ia Arts Fest e ha’aheo ai ke Kulanui, no ka mea, ua lilo mai kekahi makana ho’ohanohano no ka mālama ‘ia o ia papahana like i kēlā makahiki aku nei. Hele nō a he ‘oia’i’o ia mana’o ho’ohuoi o’u, nani ke kohu ‘ole o ia hana pākela hilahila ‘ole!

I kanaka aha ia e ha’aheo ai i ia ‘ano hana kū i ke ‘ano hōhē? A he aha lā ho’i ka waiwai o ia ‘ano papahana inā pēlā kona lawelawe ‘ia ‘ana? Kohu mea lā, ua ‘oi aku ka ikaika o ke ake hanohano ma mua o ke kūlia ‘ana i ka pono, ‘o ia ho’i, ka mālama ‘ana i ke Kulanui ma ke ‘ano i wahi pu’uhonua no ka lehulehu e hāpai ai a e paio ai ho’i i ka ‘i’o a me ka ‘ole o ko lākou mau mana’o. E lilo paha auane’i ua ake hanohano nei i mea e hewa ai ke Kulanui a kaulana ‘ino ai ho’i ma waena o nā kulanui ‘ē a’e o ke ao mālamalama. Auē nō kā ho’i ē! E emi loa ana paha nā haumāna e mana’o nei e pi’i mai i Mānoa, a emi pū nō ho’i me ke kālā e ho’olako ‘ia mai ana e nā lālā o ka ‘Aha’ōlelo!

E ho’ouna ‘ia mai na leka i mua, ‘o ia ho’i ‘o Laiana Wong a me Kekeha Solis ma ka pahu leka uila ma lalo nei:

>> kwong@hawaii.edu
>> rsolis@hawaii.edu

a i ‘ole ia, ma ke kelepona:

>> 956-2627 (Laiana)
>> 956-2627 (Kekeha)

This column is coordinated by Kawaihuelani Center for Hawaiian Language at the University of Hawai’i at Manoa.