Ua mau ke ea o ka ‘āina i ka pono

Synopsis: Opponents of same-sex marriage need to stick to the issue.

———

Ua koho pāloka iho nei nā Lunamakaʻāinana o Hawaiʻi nei i ka pono a me ka pono ʻole o ia pila e ʻae ana i ka male ʻana he kāne a he kāne, a he wahine paha a he wahine. ʻAʻole naʻe i maopopo ka hopena o ia kākau ʻana i ka wā a ko ʻoukou mea kākau i hoʻomaka ai i kēia moʻolelo nei. Ke lana nei ka manaʻo, e puka nō ia pila.

Ua nui nō hoʻi ka mahalo o ko ʻoukou mea kākau i kekahi mau hoa aloha i kākau no ia nīnau hoʻokahi i nā pule i hala iho nei, ʻo ia hoʻi, ʻo Halealoha Ayau lāua ʻo Kainani Kahaunaele, he mau mea kākau no Kauakūkalahale ma mua, a me Hinaleimoana Kalu-Wong. A ʻo kekahi o nā luna hoʻoponopono o Kauakūkalahale, ʻo Laiana Wong, kekahi. A ua nani nō ia mau manaʻo o lākou, ʻoiai, he ʻiʻo nō ko ia mau moʻolelo a lākou.

ʻAʻole pēlā kekahi poʻe kūʻē i ka male ʻana o ke kāne me ke kāne a ʻo ka wahine paha me ka wahine. I kekahi lā, ʻoiai lākou e kū ana ma kahi o ke Kapikala, e paʻa ana kekahi mau mea o lākou i ka hōʻailona ʻano ʻē. Kohu mea lā, ʻaʻole paha i pili iki i ia manaʻo kūʻē i paʻa ma ko lākou mau waha.

Eia mai ka ʻōlelo o kekahi o ia mau hōʻailona, "Ua mau ke ea o ka ʻāina i ka pono," me he mea lā e ‘ōlelo mai ana, inā e male ke kāne me ke kāne, a i ʻole ia e male ka wahine me ka wahine, e pau ka pono. Inā e moe ke kāne me ke kāne, a e moe paha ka wahine me ka wahine, e pau ka pono? ʻAʻole pēlā i ka wā kahiko ma kēia pae ʻāina nei. No hea lā ia manaʻo?

Eia mai ka ʻōlelo o kekahi hōʻailona a ka poʻe kūʻē i ia ʻano male ʻana. "Protect the children" (E hoʻomalu i nā keiki). Pehea lā i pili ai ia ʻōlelo i ka male ʻana he kāne a he kāne, a he wahine paha a he wahine? E hoʻomalu ʻia nā keiki? O aha lākou keiki? O ʻeha auaneʻi lākou i nā paʻa male hou? ʻAʻohe mea e hopohopo ai ke ʻāpono ʻia aku ia ʻano male ʻana. ʻAʻole wahi mea a pōʻino o nā keiki. Ke hana ʻino ʻia nei nā keiki ma ʻō a ma ʻaneʻi o kēia pae ʻāina i kēia wā, i kēia wā hoʻi i ʻae ʻole ʻia ai ka male ʻana he kāne a he kāne, a he wahine paha a he wahine. A ʻo ka mea ʻāpiki, ua nui loa nā keiki i lolokukui ʻia e ke kahuna pule o kekahi mau hale pule a puni ka honua. A eia kekahi mau kāhuna pule ke kuhikuhi aʻela, he hewa kā ʻoukou hana e kēnā poʻe moe aikāne, ʻaʻole ʻoukou e male.

A ʻo kekahi, he makaʻu lākou o hoʻomaka ke aʻo ʻia ʻana o ka hana aloha a ka poʻe moe aikāne i loko o nā kula. Akā, inā aʻo ʻia ka hana aloha a ke kāne me ka wahine, e aʻo ʻia nō hoʻi ka hana aloha a ke kāne me ke kāne, a ʻo ka wahine paha me ka wahine i kēia manawa, ʻaʻole e kali a ʻāpono ʻia ka pila. A inā ʻaʻole e aʻo ʻia kekahi, ʻaʻole e aʻo ʻia a pau loa.

ʻAʻole ʻoi aku ka poʻe male he kāne a he wahine i ka poʻe male he kāne a he kāne, a he wahine paha a he wahine. ʻAʻole loa.

———

E ho’ouna ‘ia mai na ā leka iā māua, ‘o ia ho’i ‘o Laiana Wong a me Kekeha Solis ma ka pahu leka uila ma lalo nei:

» kwong@hawaii.edu
» rsolis@hawaii.edu

a i ‘ole ia, ma ke kelepona:

» 956-2627 (Laiana)
» 956-2627 (Kekeha)

This column is coordinated by Kawaihuelani Center for Hawaiian Language at the University of Hawai’i at Mānoa.