Quantcast

Monday, September 01, 2014         

KAUAKUKALAHALE


 Print   Email   Comment | View 0 Comments   Most Popular   Save   Post   Retweet

Ke Kai Ho'ē'e

For Saturday, November 3, 2012

Na Kekeha Solis

POSTED:



Ke Kai Ho'ē'e

Synopsis: Let’s not get lax about tsunamis.

Welina e nā makamaka heluhelu. Pōmaika'i nō kākou i kēlā pō Pō'aono aku nei, 'o ia ho'i, 'a'ole i pō'ino ke ola i ke kai ho'ē'e o ia pō. He wahi kai wale nō a 'u'uku mai. 'A'ole ia he kai “pau pulu 'a'ohe lau kanu” wahi a kahiko, e like me ke kai ho'ē'e o ka makahiki 1946, kahi i pau ai nā ola he 170, a he nui nō ho'i ka pohō. 'O ka mokupuni 'o Hawai'i ke ko'iko'i o ka pō'ino. A kohu mea lā, pēlā pū nō me ke kai ho'ē'e o ka makahiki 1960. He 600 ‘eka ‘āina o Hilo i pau i ke kai. Aloha nō ko Hawai'i moku o Keawe. I kēlā makahiki aku nei, 'o Hawai'i moku ka mokupuni i pilikia. Ua 'ike 'ia aku paha ke ki'i o kahi hale o Kealakekua i lilo akula i ke kai. 'A'ole nō paha e poina iā kākou.

Kohu mea lā, ua ho'olohe nā kānaka i nā 'ōlelo a'oa'o, e ha'alele i nā wahi i kokoke i ke kai, nā 'āina ho'i e hiki ke pau i ke kai ho'ē'e.

'O ka mea na'e e kau ai ka weli o ko 'oukou mea kākau, 'o ia nā po'o pa'akikī e hele ana i kahi kūpono 'ole ma muli o ka nīele o ke kanaka, a pēlā aku. Ua 'ike 'ia paha kahi wikiō ma ka Youtube, kahi e pa'i wikiō ana kekahi kanaka i ke kai ho'ē'e. Ma ka laki wale nō 'o ia i 'eha 'ole ai, a lilo 'ole ai ho'i i ke kai hohonu.

'O ko 'oukou mea kākau, aia nō i Mānana uka e noho nei, a no laila, i ka lohe 'ana aku no ka pāhola 'ana mai o ke kai ho'ē'e, 'a'ohe mea e hopohopo ai. Akā, i kēlā hopena pule aku nei, ua 'ike aku nō. Aia ko 'oukou mea kākau e noho ana ma Kona. A hele aku nei i ka 'ai ma kekahi hale 'aina i ia pō Pō'aono. A i ia manawa i ho'omaopopo 'ia mai ai no ka hiki mai paha o kahi kai ho'ē'e. A he pono ka ho'i 'ana aku i ka hōkele e 'ike ai i ka hana. Koi 'ia nā kānaka e noho ana ma nā hōkele e ha'alele aku i ka hōkele no ka 'āina ki'eki'e. A 'o ia ihola nō ka hana.

A i ka manawa e kalaiwa ana ko 'oukou mea kākau me kāna wahine, e kau ana ka no'ono'o ma nā kānaka nona nā hale e kū nei ma nā kapakai o kēia pae 'āina nei. A pēlā pū me nā 'ohana e noho akula ma kahakai. Aloha nō.

Akā, ke mana'o nei ko 'oukou mea kākau, he hana kūpono ke koi 'ana e ha'alele i nā wahi e pā i ke kai ho'ē'e, i 'ole e pilikia nā kānaka a e pō'ino paha. No laila, ua pū'iwa ihola ka no'ono'o i ka 'ike 'ana i ka 'ōlelo a kekahi o nā kānaka akeakamai o ke Kikowaena Maka'ala Kai Ho'ē'e o 'Ewa. Penei kāna 'ōlelo, 'a'ole paha i pono ka ha'alele 'ia 'ana o nā 'āina ha'aha'a e pili ana i ke kai.

'Eā, inā he 'ōlelo a'oa'o hou ke kūkala 'ia mai no ka pā mai o nā mokupuni o kēia pae 'āina i ke kai ho'ē'e, e ho'olono kākou i 'ole e pō'ino ke ola.

Ola loko i ke aloha

Synopsis: Aloha to the workers of the Keauhou Beach Resort in Kona.

He hā'awi aloha kēia i nā limahana o ka Hōkele Kahakai 'o Keauhou. Ua pani 'ia iho nei ia hōkele i ka lā 31 o 'Okakopa. A he mea minamina ho'i ia, 'oiai, he pono nā limahana ke 'imi aku i hana hou.

He 'ekolu wale nō manawa o ko 'oukou mea kākau i noho aku i laila, a i nā manawa a pau, he keu aku nā limahana a ka 'olu'olu. A no laila nō kēia hā'awi aloha 'ana. Ke lana nei ka mana'o e pōmaika'i 'oukou ma kēia hope aku.

———

E ho'ouna 'ia mai na ā leka iā māua, 'o ia ho'i 'o Laiana Wong a me Kekeha Solis ma ka pahu leka uila ma lalo nei:
>> kwong@hawaii.edu, rsolis@hawaii.edu
a i ‘ole ia, ma ke kelepona:
>> 956-2627 (Laiana), 956-2627 (Kekeha)
This column is coordinated by Kawaihuelani Center for Hawaiian Language at the University of Hawai'i at Mānoa.






 Print   Email   Comment | View 0 Comments   Most Popular   Save   Post   Retweet

COMMENTS
(0)
You must be subscribed to participate in discussions


IN OTHER NEWS
Latest News/Updates