Aloha ku’u moku ‘o Kaho’olawe

Synopsis: A wonderful Hawaiian language trip to Kaho’olawe.

_________

Aloha ku’u moku ‘o Kaho’olawe; Mai kinohi kou inoa ‘o Kanaloa; Kohemalamalama; Lau kanaka ‘ole; Hiki mai nā pua e ho’omalu mai. ‘O ka paukū mua ia o ke Mele O Kaho’olawe a Harry Kūnihi Mitchell i haku ai. A he mele nani loa ia e ha’i ana i ka mo’olelo o ia mokupuni aloha. A nui ka mahalo o Kauakūkalahale i ia mau pua i ho’omalu iā Kanaloa. E ‘ole lākou, pau ai ka ho’opahū ‘ia ‘ana o Kaho’olawe a nui ai ho’i ke aloha i ia mokupuni.

A ‘o ke kumu e kau a’ela ia lālani mele i po’o mana’o i kēia pule, ma muli o ka hele ‘ana aku nei o ko ‘oukou mea kākau i Kaho’olawe i ka wā ho’omaha kupulau nei, he huaka’i ‘ōlelo Hawai’i a mālama ‘āina ho’i. He huaka’i ‘ōlelo Hawai’i ia i ho’okumu ‘ia e Kaliko Baker i kēlā makahiki aku nei. A ma muli o ke kāko’o ‘ana mai o Kawaihuelani Center for Hawaiian Language, ua pa’a ihola kahi kenikeni e hele ai kekahi mau kumu a me kekahi mau haumāna i Kohemālamalama. A ua hele pū nō kekahi mau kumu a me kahi mau haumāna o ke Kulanui o Hawai’i ma Hilo, a launa pū ai me ko Mānoa. Ua hemolele i ka mālie. Nani wale ka launa pū ‘ana me nā kumu a me nā haumāna a pau, ka hana like ‘ana, a pēlā aku. A he mau haumāna lākou e huli ana ka lima i lalo.

Alu like kākou lāhui Hawai’i; Mai ka lā hiki mai i ka lā kau a’e; Kūpa’a a hahai; Ho’oikaika nā kanaka; Kau li’i mākou; Nui ke aloha no ka ‘āina. Ke alu like nei nō kānaka ma ka mālama ‘ana iā Kanaloa, akā, kohu mea lā, ‘a’ole nō i nui loa nā kumu lā’au i kanu ‘ia, akā ‘o nā kumu lā’au i kanu ‘ia i ‘ike ‘ia iā mākou i laila, he mau kumu lā’au i kolo loa nā a’a i lalo lilo a pa’a loa. ‘O ia nō ‘o Syd Lani Kawahakui a me kona mau hoa kāko’o. ‘O Lani, He Hawai’i Alaka’i nō. Mahalo nui iā ‘oe, e Lani, i ka hana pono ‘ana me ke aloha, a pēlā pū me kou mau kāko’o, ‘o ia ‘o Po’okela Hanson a me Brutus Keaka Labenz. ‘O lāua nā kāko’o, ‘a’ohe mea e hopohopo ai. A ‘o kekahi mea i mahalo nui ‘ia, ‘o ia ‘o Tita Kuhaulua. Palena ‘ole ke aloha iā ‘oe e Tita no ka mālama pono ‘ana iā mākou. ‘O nā kua a pau, he kū pono ia inoa. Ua hā’awe pono nō i ke kuleana.

‘O ka hui Ke Ala Loa, he kūpa’a ma hope o ka ‘āina, aloha ‘āina ho’i ē. He mau haumāna kēia i noho ma ka huaka’i mua, a ho’omau nō ma ka huaka’i ‘elua ma muli o ko lākou aloha nui i ua ‘āina lā.

He mau momi (nā mo’olelo) nō kāu, e Ku’ulei Birnie, i hō’ike mai nei, he pono ke ha’i pinepine ‘ia i lohe ‘ia. A hau’oli ka na’au i ka ‘ike ‘ana i kahi keiki o Kaho’olawe, kāu mo’opuna, ‘o Ha’aipo.

‘O Alicia Perez, no nā lima wīkani, nāna i hana i nā mea e pono ai ka mālama ‘ana i ka huaka’i.

A iā ‘olua, e Kaliko a me Haili’ōpua, mahalo i ka mālama ‘ana i kēia huaka’i, a me nā hana a pau e holo pono ai a e le’ale’a ai nō ho’i ma laila. He keu aku ia a ka maika’i. A kulu ka waimaka i ka ‘ike ‘ana i ka ‘ohana ‘ōlelo Hawai’i, a mālama ‘ohana, a mālama hoa kanaka ho’i ma Kaho’olawe. A ‘o kā ‘olua mau keiki, e lilo ana nō i mau alaka’i no ka Lāhui.

Hanohano nā pua o Hawai’i nei; No ke kaua kauholo; Me ka aupuni; Pa’apū ka mana’o no ka pono; O ka ‘āina; I mua nā pua; Lanakila Kaho’olawe.

———

E ho‘ouna ‘ia mai na ā leka iā māua, ‘o ia ho‘i ‘o Laiana Wong a me Kekeha Solis ma ka pahu leka uila ma lalo nei:

>> kwong@hawaii.edu

>> rsolis@hawaii.edu

a i ‘ole ia, ma ke kelepona:

>> 956-2627 (Laiana)

>> 956-2627 (Kekeha)

This column is coordinated by Kawaihuelani Center for Hawaiian Language at the University of Hawai’i at Mānoa.