‘he’ pane iki

Synopsis: April A.H. Drexel is the curator of an art exhibit named, “‘a’ mini retort.” This exhibit encourages the viewer to think critically about “how/when/why/ where creative textualities can simultaneously contribute, complicate, and perhaps, distort understanding.” “‘a’ mini retort” runs April 30-June 1 at Mark’s Garage.

———

Welina e nā hoa puni mea hou o ka ‘āina. E kala loa paha i ho’opuka ai ka Luna Maka’āinana Faye Hanohano i kona makemake i nā hana no’eau i hana ‘ia e ke Kanaka Maoli. Kohu mea lā, kāka’ikahi nā hana no’eau a ke Kanaka Maoli ma ka hō’ike’ike a ke aupuni moku’āina i kapa ‘ia ‘o ka Hana No’eau ma nā Wahi i Hāmama ‘ia i ka Lehulehu. Akā, ua pōmaika’i nō paha ke aupuni moku’āina a me nā kānaka puni i nā hana no’eau a ke Kanaka Maoli.

‘O “he” pane iki, he hō’ike’ike hana no’eau ia e mālama ‘ia nei i kēia manawa ma ka Hale Ka’a O Maleka ma ke kaona. A he nui nō nā Kānaka Maoli i hana i hana no’eau no ia hō’ike’ike, ‘o Maile Andrade, ‘o Kaili Chun, ‘o Kauka de Silva, ‘o Noelle Kahanu, ‘o Imaikalani Kalahele, ‘o Kapulani Landgraf, ‘o Abigail Romanchak, ‘o Maika’i Tubbs, ‘o Kunāne Wooton, a ‘o April A.H. Drexel. ‘O Drexel ke kahu o nei hō’ike’ike hana no’eau ho’oulu mana’o. He hō’ike’ike ia kahi e no’ono’o loa ai a e piolo ai paha kākou i nā hana a nā kānaka nāna i hana i ia mau hana no’eau a me nā hana no’eau i waho o ia hō’ike’ike nō ho’i. A ke mana’o nei ko ‘oukou mea kākau, he mea ho’i ia hō’ike’ike e no’ono’o ai kākou i kā kākou hana pono’ī ma nā ala a kākou e hele nei a e hele ai ho’i ma kēia hope aku.

Ua hele nō ko ‘oukou mea kākau i ka Hale Ka’a O Maleka e māka’ika’i ai i kēlā Pō’aono aku nei. A aia nō ke kahu o “he” pane iki ma laila. A he keu ia a ka maika’i, no ka mea, ua wehewehe maila ‘o ia i nā mea like ‘ole e pili ana i nā hana no’eau i laila. He mea minamina ka lawa ‘ole o kēia kolamu nei e kama’ilio ‘ia ai nā hana no’eau a pau o laila. A no laila, e kama’ilio ‘ia kekahi.

‘O ka mea mua, ‘o ka hana no’eau nō ia a ke kahu hō’ike’ike, a Drexel, i hana ai, i kapa ‘ia ‘o …for the record… He ho’opilipili ‘ōlelo kā Drexel, ‘oiai, ua hana ‘ia nā ki’i ma luna o ke pā leo, a he ‘ano ho’opa’a mana’o a ho’opa’a mo’olelo paha kona makemake, i ‘ole ho’i e nalo nā leo o nā kānaka o Honouliuli, ‘Ewa, O’ahu.

A ‘o ka lua o ka hana no’eau e kama’ilio ‘ia, ua kapa ‘ia ‘o Café ‘Ole, na Noelle M.K.Y. Kahanu i hana. A ‘o ke kumu a ko ‘oukou mea kākau i makemake ai e kama’ilio no kēia hana no’eau a Kahanu, ua kuhihewa ko ‘oukou mea kākau, he hale ‘aina li’ili’i ‘i’o ia ma loko o ia kū’ono o ka Hale Ka’a O Maleka. Ua kūkulu ‘ia kekahi mau noho ‘ehā a me kekahi mau pākaukau ‘elua, a he papa kuhikuhi mea inu nō ho’i ko nā pākaukau, ‘o ia paha ka mea i kuhi ai ko ‘oukou mea kākau, he hale ‘aina ‘i’o ia. Na kekahi i ho’omaopopo mai ē, ‘o ia kekahi o nā hana no’eau. Ua ‘ōlelo ‘ia, ua hana ‘ia e Kahanu, i pane i ka hana Ho’ohawai’i i nā mea a pau, ‘o ka mea ho’ohiluhilu kula ‘oe, ‘o ka lole ‘oe, ‘o ka lama pa’ipa’i ‘oe, a pēlā aku.

‘O nā hana no’eau a pau i laila, ua hana maiau ‘ia, me ka no’ono’o nui ‘ana a pono nō ho’i. A ‘a’ole ia he mau mea wale nō e nani ai ka lumi. He mea nō ho’i ia e ulu ai ka mana’o, ka no’ono’o, ka piolo ‘ana ho’i i ka hana a kākou.

A no laila, e naue aku ‘oukou i ka Hale Ka’a O Maleka (Mark’s Garage) i ka hola 12:00 a ka hola 5:00 o ke ahiahi mai ka Pō’alua a i ka Pō’aono a hiki i ka lā mua o Iune no ka māka’ika’i ‘ana iā “he” pane iki.

———

E ho’ouna ‘ia mai na ā leka iā māua, ‘o ia ho’i ‘o Laiana Wong a me Kekeha Solis ma ka pahu leka uila ma lalo nei:

>> kwong@hawaii.edu

>> rsolis@hawaii.edu

a i ‘ole ia, ma ke kelepona:

>> 956-2627 (Laiana)

>> 956-2627 (Kekeha)

This column is coordinated by Kawaihuelani Center for Hawaiian Language at the University of Hawai’i at Mānoa