Nā Koa Ānuenue

Synopsis: “Rainbow” should be a part of the University of Hawaii’s nickname.

———

Aloha mai e nā makamaka heluhelu. Ua kaumaha ihola ka na’au o ko ‘oukou mea kākau i ka lohe ‘ana i ka pa’a loa o ka mana’o o ka luna ‘ālapa o ke Kulanui o Hawai’i ma Mānoa, o Ben Jay, ma ka loli ‘ana a’e o ka inoa kapakapa o nā hui ‘ālapa kāne o ke Kulanui o Hawai’i ma Mānoa, ‘o ia ho’i, ma ka lā mua o Iulai a ma ia hope aku, ‘o nā Koa ka inoa hou. A no nā hui ‘ālapa wahine, e mau ana ko lākou kapa ‘ia ‘o nā Wāhine Ānuenue.

Wahi a Jay, he pono ke like a like nā inoa o nā hui ‘ālapa i mea e laha loa ai ka inoa ma ka waha a ma ka na’au paha o kānaka. A eia mai kekahi ‘ōlelo āna, “’O nā hua ‘ōlelo – koa, wahine, a me ānuenue – he hō’ike ia i ke ‘ano o mākou, nā kānaka o ke Kulanui o Hawai’i ma Mānoa a me nā hui ‘ālapa o ua kulanui nei. ‘O ka mea ‘āpiki na’e, ‘a’ole i kapa ‘ia ka inoa o nā hui kāne, ‘o nā Koa Ānuenue. ‘O nā Koa wale nō. No ke aha lā i kāpae ‘ia ai ka hua ‘ōlelo ‘o ānuenue?

He ‘ewalu hui ‘ālapa kāne o ke Kulanui o Hawai’i ma Mānoa. A penei ko lākou mau inoa kapakapa i kēia manawa — ‘o ka pōpō hili (nā Ānuenue), ka pōpō hīna’i (nā Koa Ānuenue, ka pōpō peku (nā Koa), ke kolepa (nā Koa), ka holomoku (nā Ānuenue), ka ‘au a me ka lu’u (nā Koa Ānuenue), ke kenika (nā Koa) a me ka pōpō pa’ilima (nā Koa). A he 13 hui ‘ālapa wahine o ke Kulanui o Hawai’i ma Mānoa, a ‘o lākou a pau, ua kapa ‘ia ‘o nā Wāhine Ānuenue. ‘O ia paha ko Jay mea i mana’o ai, ‘o nā hui ‘ālapa wahine wale iho nō ke kapa ‘ia ma ka inoa “Ānuenue”?

Ua kaulana nō ‘o Mānoa i ke ānuenue. A ‘o ia paha kekahi mea i lilo ai ia hua ‘ōlelo i inoa kapakapa no nā hui ‘ālapa. A mai kahiko mai nō ia mana’o, ke heluhelu kākou i ka mo’olelo o Kahalaopuna, e ‘ike auane’i kākou ē he mea nui ke ānuenue ma Mānoa nei.

He mea minamina nō ke kāpae ‘ia ‘ana aku o ia māhele o ka inoa o nā hui ‘ālapa kāne, ‘oiai, ‘o ke ānuenue, he hō’ailona ia no ke ali’i, a ‘o ia paha ka mea i lilo ai ke ali’i i mea ho’olaki ma nā ho’okūkū o ia wā i hala.

Aloha nō kahi luna ‘ālapa po’o pa’akikī, he kāpae wale aku nō i ka hua ‘ōlelo ānuenue mai ka inoa aku o nā hui kāne. Kohu mea lā, ‘a’ole hiki ke koa ka wahine. Kohu mea lā, he mea ke ānuenue no ka “’ao’ao palupalu,” ‘o ia wale iho nō. ‘A’ohe wahi mea o Jay a maliu iki i ke noi ha’aha’a a ka Hui Lekawina o ke Kulanui o Hawai’i. ‘Eā, ma muli paha o ka mana’o he hō’ailona ia no ka ‘ao’ao palupalu i kāpae ‘ia ai ka hua ‘ōlelo ānuenue mai ka inoa aku o kekahi mau hui ‘ālapa kāne. A eia kā ‘o Jay ke ho’omau aku nei i ia mana’o o ka ihu pōhue.

Ua mālama ‘ia aku nei he hālāwai hō’eu’eu, he “’Eu’eu no nā Ānuenue” (Rally 4 Rainbows) i ka ‘auinalā o nehinei ma ka Hale ‘o Bachman o ke Kulanui o Hawai’i ma Mānoa. Akā, kohu mea lā, ‘a’ole e maliu iki ‘o Jay i nā mea i ‘ōlelo ‘ia ma laila, ‘oiai, ua pa’a ‘ē kona mana’o.

E komo paha ‘o ia i ka papa HWST 107 a me ka papa HAW 100 i mea e ‘ike ai ‘o ia i ka mo’olelo o Hawai’i.

———

E ho’ouna ‘ia mai na ā leka iā māua, ‘o ia ho’i ‘o Laiana Wong a me Kekeha Solis ma ka pahu leka uila ma lalo nei:

>> kwong@hawaii.edu
>> rsolis@hawaii.edu

This column is coordinated by Kawaihuelani Center for Hawaiian Language at the University of Hawai’i at Mānoa