‘O Kāne lāua ‘o Kanaloa, ma Waimea

Synopsis: The 2013 Kalo and Awa Workshop is today, Aug. 10, from 8:30 a.m. to 5:30 p.m. at Waimea Valley, O’ahu.

———

Welina e nā makamaka heluhelu. Pōmaika’i nō kākou i nā kūpuna a me nā loea e ho’omau nei i ka hana mai kahiko mai, ‘oiai, ‘a’ole i hiki mai nā ‘ike like ‘ole ma nā ‘ohana a pau o Hawai’i nei. No laila, he mea maika’i ka mālama ‘ia ‘ana aku o ka Papa Kalo me ‘Awa ma ke Awāwa ‘o Waimea ma O’ahu nei. I ka makahiki 2007 i ho’omaka ai ka mālama ‘ana, akā, ‘o ka makamua kēia o ka māhele no ka ‘awa.

I kēia lā nō ia papa, a e ho’omaka ana i ka hola 8:30 o ke kakahiaka a e pau ana i ka hola 5:30 o ke ahiahi.

He papa manuahi ia e hele ai ka lehulehu no ke a’o ‘ana i nā mea like ‘ole e pili ana i ke kalo a me ka ‘awa. A ‘a’ole wale nō ia he papa, akā, he wahi nō ho’i ia e kūkākūkā ai i ka mahi ‘ai ‘ana o ka wā kahiko a me kēia au nei a me nā nīnau like ‘ole no ke kalo.

I ka hola 9:00, e ha’i ‘ōlelo ana ‘o Jari Sugano, ‘o Penny Levin a me Nellie Sugii. ‘O Sugano, e ha’i ‘ōlelo ana no ka hō’ili’ili ‘ana i ke kalo. ‘O Levin, no ka hana e laha ‘ole ai ka ma’i a me ka pūpū ‘āpala. A ‘o Sugii, no ka ‘oulu ‘a’a’a ma ka ho’oulu ‘ana i ke kalo.

I ka hola 10:30, e ha’i ‘ōlelo ana kekahi mau haumāna a ‘Anakala Jerry Konanui, ‘o Kaipo’i Kelling lāua ‘o Duffy Chang no ka ho’omākaukau ‘ana a me ka ‘ai ‘ana i ke kalo.

I ka hola 11:30, e hiki ana ke ho’opā i ka ‘ai i kekahi mau ‘ano kalo he 12 e ulu ana ma ke Awāwa ‘o Waimea. A ‘o ka wā pā’ina nō ia. E kū’ai paha i pā mea ‘ai Hawai’i ma laila, he $12 o ia pā. I ka hola 12:15, e ha’i ‘ōlelo ana ‘o ‘Anakala Jerry Konanui ma nā ‘ano kalo like ‘ole. He mahi ‘ai ‘o ‘Anakala Jerry a he nui loa kona ‘ike.

I ka hola 12:45, e māka’ika’i ana i nā kalo e ulu ana ma ke Awāwa ‘o Waimea. Na Kaipo’i Kelling lāua ‘o Anthony Deluze e ho’omāka’ika’i.

I ka hola 1:45 a me ka hola 3:00, e ha’i ‘ōlelo ana ‘o ‘Anakala Jerry Konanui no ka ‘awa.

I ka hola 3:30, e ho’okani pila ana ‘o Kapili Littlejohn.

Piha hau’oli ka na’au i ka ‘ike ‘ana i kēia ‘ano hana e holo mua ai kākou ma nā hana a me nā ‘ike mai nā kūpuna mai. A no laila, e naue aku i laila i kēia lā.

[‘Auhea ‘oukou, e ha’i ‘ōlelo ana kekahi haumāna laeo’o o ka Hālau ‘Ike Hawai’i o ke Kulanui o Hawai’i ma Mānoa i kāna hana no ke kekelē laeo’o. Kapa ‘ia kāna ha’i ‘ōlelo, “They’ve Survived Another Decade!: Hawaiian Knowledge In Digital Comic Books.”

‘O Waikā Kaluna ka mea nāna e ha’i ‘ōlelo ana. A he ulu nō ka hoi, ‘oiai, ua hana ‘o ia i puke mo’olelo ki’i no ka iPad.

A ‘o kāna mo’olelo i koho ai, ‘o ia kekahi o nā mo’olelo o Maui. Aia ana ka ha’i ‘ōlelo i ka lā 15 o ‘Aukake i Kamakakūo-kalani, lumi 207. E ho’omaka ana i ka hola 10:00 o ke awakea.

———

E ho’ouna ‘ia mai na ā leka iā mā ua, ‘o ia ho’i ‘o Laiana Wong a me Kekeha Solis ma ka pahu leka uila ma lalo nei:

>> kwong@hawaii.edu
>> rsolis@hawaii.edu

a i ‘ole ia, ma ke kelepona:

>> 956-2627 (Laiana)
>> 956-2627 (Kekeha)

This column is coordinated by Kawaihuelani Center for Hawaiian Language at the University of Hawai’i at Mānoa.