Quantcast

Friday, July 25, 2014         

KAUAKUKALAHALE


 Print   Email   Comment | View 1 Comments   Most Popular   Save   Post   Retweet

Nānā ka maka; ho'olohe ka pepeiao; pa'a ka waha

By Kekeha Solis

POSTED:



Synopsis: Discussion on the wise saying, "Let the eyes observe; let the ears listen; let the mouth be shut."

***

'Auhea 'oukou e nā makamaka heluhelu. Ua lohe 'ia aku paha ma mua ia 'ōlelo e kau a'ela i luna. Na ka makua a na ke kupuna paha i ho'opuka i kona wā e a'o mai ana i ke keiki a i ka mo'opuna paha. A i ho'opuka 'ia mai paha ma muli o ka hao 'ana o nā nīnau he nui. He 'ōlelo kūpono ia no ka manawa e a'o 'ia ana kekahi hana. He 'ōlelo a'o ia iā kākou i 'ole e pua'i wale nā nīnau like 'ole mai ka waha mai o ka "haumāna," 'o ia ho'i, ke nānā pono ka maka o ka haumāna me ka ho'olohe pono o kona pepeiao, e lohe 'ia a e 'ike 'ia aku paha ka pane no kahi nīnau i ulu a'e nei i loko o ia haumāna.

A pehea, e holo nō ua 'ōlelo nei i nā wā a pau e a'o ai kekahi i kekahi? 'O ia ka 'ōlelo a'o e pono ai ka wā a'o o ka pēpē i ka 'ōlelo? Maika'i nō ka nānā 'ana o ka maka, a me ka ho'olohe 'ana o ka pepeiao, akā, 'o ka pa'a o ka waha? 'A'ole paha. Inā 'a'ole 'ae 'ia ka pēpē e ho'ā'o e ho'opuka i nā kani 'ōlelo like 'ole āna i lohe ai, he hiki ana iā ia ke ho'opuka pono aku i ka 'ōlelo i kekahi wā aku? A i 'ole ia, he pono paha i ua pēpē nei ke lohe i kona leo pono'ī i ka pua'i 'ana mai kona waha mai.

He pa'a nō ka waha o kekahi po'e kānaka i ko lākou wā e a'o ana i ka 'ōlelo Hawai'i a i kekahi 'ōlelo hou paha. He mau kumu paha kā lākou o ka hana 'ana pēlā. He hilahila paha, 'oiai, he 'ōlelo hou a 'a'ole nō ia i pa'a e like me kā lākou 'ōlelo mua. He maka'u paha o ho'opuka hemahema 'ia kahi 'ōlelo. 'Eā, eia au ke ha'i aku nei iā 'oukou, ke ho'opuka hemahema 'ia kahi 'ōlelo, 'a'ole 'oe e hopu 'ia e ka māka'i, a 'a'ole ho'i 'oe e ho'opa'i 'ia, e uku aku i ke kālā. E maka'ala na'e, 'o ia ho'i, e nānā ka maka i ke kumu, a e ho'olohe ho'i ka pepeiao i wahi e hiki ai iā 'oe ke ho'oponopono i kahi hemahema ma ia hope aku.

E hao mai ana paha kahi nīnau, "Pehea ia 'ōlelo, 'I ka 'ōlelo nō ke ola, i ka 'ōlelo nō ka make.' 'A'ohe make ho'opuka i nā mea kūpono 'ole, o pilikia auane'i." 'Ae, he pololei nō, akā, i ka wā e a'o mai ana i ka 'ōlelo hou, a hemahema kahi mau 'ōlelo i pua'i mai mai loko mai o ka waha, 'a'ole i ho'opuka 'ia me ka mana'o 'ino. 'Eā, inā ua 'ono maila kekahi kanaka i kope, akā ho'opuka hewa 'o ia i ke noi, "I kohe na'u, ke 'olu'olu." 'A'ole paha e pono ke ho'okō 'ia aku ia 'ōlelo. He mea maopopo paha, ua 'ono ia kanaka i ke kope. E hū paha ka 'aka a mae ka iwi 'ao'ao o nā kānaka e kū ana ma laila, akā, 'a'ole ia he mea e maka'u ai a e hilahila ai paha.

A no laila, e kauleo aku kākou, e ka po'e 'ōlelo leo kanaka, i nā kānaka 'akahi nō a ho'omaka ke a'o 'ana i ka 'ōlelo a me nā kānaka e kala loa ke a'o 'ana, a 'o ka 'oi loa aku, 'o nā iwi o ko kākou mau iwi, a me ke koko o ko kākou koko, mai pa'a ka waha i ka wā e a'o mai ana i ka 'ōlelo. E ho'opuka i ka 'ōlelo Hawai'i.


E ho'ouna 'ia mai nā leka iā māua, 'o ia ho'i 'o Laiana Wong a me Kekeha Solis ma ka pahu leka uila ma lalo nei:

» kwong@hawaii.edu
»
rsolis@hawaii.edu

a i ‘ole ia, ma ke kelepona:

» 956-6419 (Laiana)
» 956-2627 (Kekeha)

This column is coordinated by Kawaihuelani Center for Hawaiian Language at the University of Hawai'i at Mānoa.






 Print   Email   Comment | View 1 Comments   Most Popular   Save   Post   Retweet

COMMENTS
(1)
You must be subscribed to participate in discussions
By participating in online discussions you acknowledge that you have agreed to the TERMS OF SERVICE. An insightful discussion of ideas and viewpoints is encouraged, but comments must be civil and in good taste, with no personal attacks. Because only subscribers are allowed to comment, we have your personal information and are able to contact you. If your comments are inappropriate, you may receive a warning, and if you persist with such comments you may be banned from posting. To report comments that you believe do not follow our guidelines, email commentfeedback@staradvertiser.com.
Leave a comment

Please login to leave a comment.
Ken_Conklin wrote:
Kaumaha no au i ka heluhelu ana i keia kolamu. He hewa nui ka pauku hope, i ha'i o "nā iwi o ko kākou mau iwi, a me ke koko o ko kākou koko, mai pa'a ka waha i ka wā e a'o mai ana i ka 'ōlelo." No kakou a pau ke kuleana e ho'ohana me na 'olelo a pau o keia honua nei. 'O ka 'olelo Hawai'i, 'a'ole ka waiwai o he lahui ho'okahi wale no. Mai poina kakou, nui na puke ma ka 'olelo Hawai'i i kakau na ka po'e 'ilikea. Eia 'elua mea ho'ohalikelike: Ka Baibala Hemolele; a me "Anatomia" na Dr. Gerrit P. Judd (ho'olaha'ia 1838 ma Honolulu).
on August 6,2011 | 08:11AM
IN OTHER NEWS
Latest News/Updates
Blogs
Political Radar
Wilhelmina Rise, et al.

Court Sense
Cold War

Political Radar
Climate change

Island Crafters
YouCanMakeThis.com

Warrior Beat
Empty pit

Political Radar
Switch

Political Radar
`Progressive hero’