Quantcast

Friday, October 24, 2014         

KAUAKūKALAHALE


 Print   Email   Comment | View 1 Comments   Most Popular   Save   Post   Retweet

Kūlia i ka nu‘u

By Kekeha Solis

POSTED:
LAST UPDATED: 03:29 a.m. HST, Oct 15, 2011



Synopsis: Strive for the best and never give up. Steve Jobs was not always successful.

Welina e nā makamaka heluhelu. I kēlā Pō'akolu aku nei, ua moe akula i ka moe kapu o Niolopua kekahi kāne haole i kaulana a puni ka honua nei. 'O Steve Jobs nō ia. 'O kekahi mea minamina, 'a'ole nō 'o ia i o'o loa, a naue akula i ke ala ho'i 'ole mai. Ua piha nā makahiki he 56 wale nō iā ia. He mau makahiki na'e ka lō'ihi o ke 'ā'ume'ume 'ana a'e ona me ka ma'i 'a'ai.

E hao mai paha ka nīnau, “No ke aha e kau a'e nei ia mau 'ōlelo na'auao mai nā kūpuna mai i luna inā e kama'ilio 'ia ana ka hala 'ana a'e o Jobs i kēlā 'ao'ao?”

He māhele iki wale nō kai ho'oka'awale 'ia no ke kama'ilio 'ana iho e pili ana i ka naue 'ana aku o Jobs i ke ao polohiwa a Kāne, 'oiai, 'o ke kamepiula 'Āpala, he mea nui nō ia ma ka mo'olelo o Hawai'i nei. 'O ke kamepiula nō ia e 'ike 'ia ana ma ka hapanui o nā kula 'ōlelo Hawai'i, mai ke kula kamali'i nō paha a ke kulanui. A 'o ia ihola. Ma 'ane'i nei nō e pau ai ia māhele, a e kama'ilio nō ia po'omana'o e kau a'ela ma luna.

I ka heluhelu 'ana a'e o ko 'oukou mea kākau i ka mo'olelo o Steve Jobs, ua pū'iwa ihola kona na'au i ka 'ike 'ana aku, i loko nō o nā mea maika'i he nui āna i hana ai, 'a'ole nō i loa'a ka lei o ka lanakila ma nā mea a pau āna i ho'ā'o ai.

'O ka hua mua a Jobs lāua 'o Steve Wozniak i hele a laha a puni ka honua, 'o ka 'Āpala II ia. A ua kū'ai nui 'ia nō ua kamepiula nei. A 'o ia kekahi mea i waiwai ai 'o Jobs i ka piha 'ana o nā makahiki he 25 wale nō. Akā, ma hope mai o kēlā, ua launa pū aku nei 'o ia me Pakalaki, ia pōpoki kaulana o Hawai'i nei. 'O ke kamepiula 'Āpala III, 'a'ohe ona hie. A ma ia hope mai, e hana ana 'o Jobs i kamepiula hou, i kapa 'ia 'o Lisa. He mea maika'i ia, akā, ua huki 'ia 'o Jobs mai ia papahana mai ma muli o kona 'ano na'au pōkole, 'oiai, 'o ka luna ia o ia papahana. A he mau mea kāna i hana ai ma ia hope mai, a ua hā'ule pahū nō ia mau mea. 'O ka mea nui, 'a'ole nō 'o ia i hā'awi pio, ua 'imi aku nō 'o ia i wahi e holomua ai 'o ia. I ka makahiki 1985, ua ho'okumu 'o ia i hui kamepiula hou i kapa 'ia 'o NeXT, 'o ka pilikia na'e, 'o nā kamepiula i hana 'ia e ia hui, 'a'ole i lilo i mea makemake nui 'ia e ka lehulehu. I ka makahiki 1986, ua kū'ai mai 'o ia i ka hui 'o Pixar. I kinohi, 'a'ohe holomua o ia hua. Ua kāpae 'ia nō ho'i kekahi palapala 'aelike me ka hui 'o Disney. 'A'ole na'e 'o nei i hā'awi pio. A i ka makahiki 1995, ua ho'i aku nei 'o John Lasseter o Pixar i ka hui 'o Disney, a ‘āpono 'ia ke ki'i 'oni'oni 'o Toy Story. A ma hope mai, ua kū'ai ka hui 'o 'Āpala i ka hui 'o NeXT no nā kālā he $400 miliona. A ma ia hope mai, ua pi'i a'e nō a kū ana ma ke 'aki.

A no laila, e nā iwi o ku'u iwi a me ke koko o ku'u koko, inā hā'ule pahū kahi hana āu e hana ana, a me kahi mana'o paha, mai nō a hā'awi pio. E noke i ka hana, i kahi mea hou paha. 'Eā, inā i hā'awi pio 'o Steve Jobs, inā 'a'ole 'o ia i kū i ke 'aki o nā mea hou o ka honua, a 'a'ole nō i loa'a ia mau mea hou, e like me ka iPoka, ka iPona, a me ka iPaka.

E ho'ouna 'ia mai n leka i mua, 'o ia ho'i 'o Laiana Wong a me Kekeha Solis ma ka pahu leka uila ma lalo nei:
» kwong@hawaii.edu
» rsolis@hawaii.edu
» i ole ia, ma ke kelepona:
» 956-2627 (Laiana)
» 956-2627 (Kekeha)
This column is coordinated by Kawaihuelani Center for Hawaiian Language at the University of Hawai'i at Mānoa.






 Print   Email   Comment | View 1 Comments   Most Popular   Save   Post   Retweet

COMMENTS
(1)
You must be subscribed to participate in discussions


IN OTHER NEWS
Blogs
Small Talk
Handcuffs

Political Radar
Sued

Political Radar
Closer

Warrior Beat
Thursday’s notes

Political Radar
Instrumental