Quantcast

Friday, November 28, 2014         

KAUAKUKALAHALE


 Print   Email   Comment | View 26 Comments   Most Popular   Save   Post   Retweet

Ulana me ka lokomaika'i

By KEKEHA SOLIS

POSTED:
LAST UPDATED: 01:54 a.m. HST, Jan 26, 2013



Synopsis: Mahalo to Aunty Gladys Grace, who recently passed away, for teaching and ensuring that the art of weaving lauhala continues on.

———

I kēlā Pō'akolu aku nei, ua ho'omaka iho nei ko 'oukou mea kākau i ke a'o 'ana mai i ka ulana 'ana i ka pāpale lauhala a i ka Pō'ahā, ka lā 'elua ho'i o ia papa, ua kani a'ela ke kelepona a ke kumu, a 'Anakē Gwen, a i ke kau 'ana iho o ke kelepona i lalo, ha'i maila 'o 'Anakē Gwen, ua hala a'ela 'o 'Anakē Gladys Grace i ke ala ho'i 'ole mai. Ua kaumaha ihola ka na'au i ka lohe 'ana aku i ka hala 'ana o kekahi o nā loea ulana o ke ao nei.

'A'ole i launa pū aku ko 'oukou mea kākau me 'Anakē Gladys, akā, ma muli o ka launa pū 'ana me kekahi mau haumāna āna, me 'Anakē Gwen, 'Anakē Marcia, a me 'Anakē Caroline, ua mōakāka, he kūpono ke po'o mana'o e kau a'ela i luna, 'o ia ho'i, “Ulana me ka lokomaika'i.” 'O ia ka inoa o ka hui ulana lauhala a 'Anakē Gladys i ho'okumu ai me kekahi o kāna mau haumāna mua, me 'Anakala Frank Masagatani. A i ke kama'ilio 'ana aku iā 'Anakē Gwen mā a me ka 'ike 'ana aku i ko lākou 'ano, he ho'okō 'ia nō ka mana'o o ka inoa o ia hui ulana lauhala, he ulana nō lākou i ka lauhala me ka lokomaika'i. A no laila, he ha'awina maika'i loa ia maiā 'Anakē Gladys mai no kākou a pau. Mahalo e 'Anakē Gladys no ka ho'omau 'ana i kekahi 'ike kupuna. A he mea maopopo wale, e kau aku ana i nā mamo. Me ka 'ohana o 'Anakē Gladys ko māua nei aloha.

Ka ‘Aha Hula O Waikiki

Synopsis: The 6th Annual International Waikïkï Hula Conference is near. It will be held May 17-19 at the Hawai'i Convention Center.

———

Aloha mai kākou e nā hoa puni hula. E hiki hou mai ana ka 'Aha Hula o Waikīkī. 'O ke ono ia o ka makahiki e mālama ‘ia ana. E ho'ohenoheno 'ia ana ka Mō'ī Kalākaua a me ka piha 'ana o ka Ho'okūkū Hula 'o ka Merrie Monarch, 'oiai, ua piha ihola nā makahiki he 50.

He nui nā papa e ulu ai ka hoi, he 80 a ‘oi. E a'o ana 'o Cy Bridges i ka hula o ke mele āna i haku ai no 'Anakē Dottie Thompson. E a'o ana 'o Maelia Loebenstein Carter i ka hula no ke mele 'o Malua Ki'iwai Kealoha. 'O kekahi papa, na 'Anakala Kimo Alama Keaulana, he pili i nā ho'ohuli mana'o a me nā ho'ololi i ka hula i ke au iā Kalākaua. E a'o ana 'o Ku'uipo Kumukahi i nā mele o Hawai'i moku.

A 'o nā kānaka e a'o ana i ka hula i kēia 'aha hula, e mālama 'ia ana nā hō'ike ma 'ō a ma 'ane'i o Waikīkī, kahi e hō'ike ai lākou i ka hula a lākou i a'o ai.

'O ka uku e komo ai i loko o kēia 'aha hula i nā lā 'e,olu, he $385. A no ka po'e kama'āina o Hawai'i nei, he $250. Inā he hui kou nona nā lālā he 10 a 'oi, he emi mai ka uku. No kekahi mau 'ike e pili ana i kēia 'aha hula, e hele aku i kēia 'ao'ao pūnaewele, www.waikikihulaconference.com.

———

E ho'ouna 'ia mai na ā leka iā māua, 'o ia ho'i 'o Laiana Wong a me Kekeha Solis ma ka pahu leka uila ma lalo nei:

>> kwong@hawaii.edu
>> rsolis@hawaii.edu
a i ‘ole ia, ma ke kelepona:
>> 956-2627 (Laiana)
>> 956-2627 (Kekeha)

This column is coordinated by Kawaihuelani Center for Hawaiian Language at the University of Hawai'i at Mānoa.





More From The Star-Advertiser

Ulana me ke aloha




 Print   Email   Comment | View 26 Comments   Most Popular   Save   Post   Retweet

COMMENTS
(26)
You must be subscribed to participate in discussions


IN OTHER NEWS
Latest News/Updates
Best Buy Site Back Up - 06:53 a.m.