Quantcast

Friday, November 28, 2014         

KAUAKŪKALAHALE


 Print   Email   Comment | View 11 Comments   Most Popular   Save   Post   Retweet

Olowalu ka moa

For Saturday, February 23, 2013

Na Kekeha Solis

POSTED:



Synopsis: Bill 1 (2013) of the City Council of Honolulu has been tabled for now.

———

Welina e nā makamaka heluhelu, eia nō ke ka'a maila ke au hou. A he au ia e maka'ala ai kākou i 'ole kākou e pilikia ma kēia hope aku. A 'o kekahi mana'o e pa'a nei ma ka waha o kekahi, 'o ia ka ho'oulu 'ana o kākou i ka mea 'ai i loa'a pono kā kākou mea 'ai, a 'a'ohe mea e hopohopo ai i ka wā wī a wā malo'o paha. A no ia kumu paha i haku 'ia ai kahi pila hou ma ka 'Aha Kūkā o Honolulu nei no ka mālama 'ana i ka holoholona. 'O kekahi, e ho'onui ana ia pila i ka nui o nā moa wahine e mālama 'ia ma ka hale a ka 'ehiku. I kēia manawa, 'ae 'ia 'elua wal nō moa wahine.

He mea maika'i nō ia, 'oiai, e lawa paha nā hua moa e mā'ona ai ka 'ōpū o ka 'ohana. 'O ka mea 'āpiki o ia pila, 'a'ole e hiki ke kū'ai 'ia aku nā hua moa e loa'a ana. He mau pilikia ko laila. 'O kekahi, he aha ka mana'o o ia hua 'ōlelo, 'o kū'ai? Ma ka 'ōlelo Hawai'i, 'o kekahi mana'o, 'o ia ke kuapo 'ia 'ana o kekahi mea no kekahi mea e kekahi mau kānaka. 'O ia ho'i, inā hā'awi aku kekahi kanaka i ka hua moa i kona hoa, e hā'awi mai paha kona hoa i ke kalo. Ma loko na'e o ka Pila, 'o “sell” ka hua 'ōlelo. I ka nānā 'ana aku i loko o ka puke wehewehe 'ōlelo haole a Webster, “to transfer (goods) to or to render (services) for another in exchange for money.” A ma ka puke wehewehe 'ōlelo haole a Merriam Webster, 'ōlelo 'ia, “to give up (property) to another for something of value (as money).” A no laila, 'a'ole i mōakāka ka mana'o. He hiki paha ke kū'ai aku (barter) me kekahi kanaka? A 'o ka mea nui, 'a'ohe kālā? A i 'ole ia, pāpā 'ia ke kū'ai 'ana ma nā 'ano a pau?

Inā 'o ke kālā wale nō ke pāpā 'ia, 'ano maika'i iki a'e. Akā, 'o kekahi pilikia i ka pāpā 'ana aku i ke kū'ai no ke kālā, he pono ke kālā ma kēia ao hou. 'A'ole 'ae 'ia ka hua moa ma ka Hui Uila, a ma kekahi ke'ena aupuni paha. 'Eā, inā lawa nā hua moa e loa'a ana mai nā moa wahine he 'ehiku wale nō, e kū'ai aku ai a loa'a ke kenikeni e uku ai i nā pila, he aha ka hewa o ia?

A 'o kekahi mea i kau ai ka weli, 'o ia ka nui o ke kūkae moa. Ke mana'o nei kekahi, e māhuahua ana nā ma'i e laha ana. Akā, inā mālama pono 'ia nā moa a me ko lākou wahi e noho ana e like me ka hana kūpono, 'a'ohe mea e hopohopo ai.

Ho'omana'o ihola ko 'oukou mea kākau i ka wā kamali'i, e mālama ana kahi 'anakala i ka moa, he 'umi paha moa wahine a emi iki paha. 'A'ole i ma'i ko'u 'anakala, a 'a'ole i hohono loa kahi hale moa. 'O ka mea nui paha, ua mālama pono 'ia lākou a me ko lākou wahi e noho ana e ia.

Ua pākaukau 'ia ka Pila 1 (2013) no ka manawa, ma muli o ka makemake o ka Luna 'Aha Kūkā Kymberly Pine, no ka ho'ololi 'ana i 'olu'olu mai kekahi po'e kānaka. E olowalu nā moa o ka 'Aha Kūkā i maika'i nei pila, akā, e kama'ilio 'ia nā mana'o like 'ole, e kipa aku paha i nā kānaka mālama moa, a e nānā i ke 'ano o ka hale moa i 'ike aku, 'a'ole ana ia he pilikia.

———

E ho'ouna 'ia mai na ā leka iā māua, 'o ia ho'i 'o Laiana Wong a me Kekeha Solis ma ka pahu leka uila ma lalo nei:

>> kwong@hawaii.edu
>>
rsolis@hawaii.edu

a i ‘ole ia, ma ke kelepona:

>> 956-2627 (Laiana)
>> 956-2627 (Kekeha)

This column is coordinated by Kawaihuelani Center for Hawaiian Language at the University of Hawai'i at Mānoa.






 Print   Email   Comment | View 11 Comments   Most Popular   Save   Post   Retweet

COMMENTS
(11)
You must be subscribed to participate in discussions


IN OTHER NEWS
Latest News/Updates