Quantcast

Sunday, December 21, 2014         

KAUAKŪKALAHALE


 Print   Email   Comment | View 19 Comments   Most Popular   Save   Post   Retweet

I koa nō paha i ka pū

For Saturday, July 27, 2013

Na Kekeha Solis

POSTED:



Synopsis: There is a certain responsibility one has when carrying a firearm. George Zimmerman and Christopher Deedy should not have been able to carry a firearm or be able to in the future.

———

Aloha nō ka 'ohana o Trayvon Martin i ka lohe 'ana aku i ka 'ōlelo ho'oholo a ke Kiure e hō'ike ana, 'a'ole i pili 'o George Zimmerman i ka hewa ma ke kī 'ana aku iā Trayvon i ka pū a make. He mea minamina nō ka make 'ana o Trayvon, no ka mea, ua hiki ke hō'alo 'ia. Ke 'ole e kuhihewa ko 'oukou mea kākau, i ke kāhea 'ana aku o Zimmerman i ke Ke'ena Māka'i o Kanapola, ua ha'i 'ia 'o ia, 'a'ole e hahai aku i ke kanaka (Trayvon). Akā, ua ho'okō 'o Zimmerman i ia 'ōlelo? 'A'ole. 'O kona hahai akula nō ia iā Trayvon, a 'o ka hopena, 'o ke kino make nō o Trayvon me ka 'ōlelo 'ana o Zimmerman, ua kī aku 'o ia i ka 'ōpiopio no ka mea, ua maka'u 'o ia o pepehi 'ia 'o ia e ka 'ōpiopio a make. Inā i maka'u kahi kanaka makua e pa'a ana ka pū ma kona lima i kahi 'ōpiopio pīlahilahi, pehea lā ka maka'u o ia 'ōpiopio i ke kanaka makua pu'ipu'i e pa'a ana ka pū ma kona lima?

A 'o kekahi, inā 'a'ole i hahai 'o Zimmerman iā Trayvon, inā 'a'ole i kau kona weli i kahi 'ōpiopio a 'a'ohe wahi ola i pō'ino. No laila e kau nei ka nīnau, “No ke aha lā i ho'okuli ai 'o Zimmerman i ka 'ōlelo a ka māka'i, 'a'ole e hahai aku i ke kanaka?” 'Eā, 'a'ole paha 'o ia i a'o i ka 'ōlelo kahiko, 'o ia ho'i, a'o i ke koa, a'o nō i ka holo. A ua a'o nō paha 'o ia a pa'a ia ha'awina, akā, 'a'ohe mea e holo ai ke pa'a ka pū ma ka lima. A 'o ia nō ke kumu e kau a'ela ia po'omana'o i luna, 'o ia ho'i, i koa nō paha i ka pū. Inā 'a'ohe pū a Zimmerman, inā 'a'ole 'o ia i hahai aku iā Trayvon. 'A'ole ho'i e hihi, he pū kā Zimmerman a ua make nō 'o Trayvon iā ia.

I kēia manawa, ke ho'okolokolo 'ia nei kahi hihia 'ane like ma Hawai'i nei. 'O ka hihia ia o Christopher Deedy no kona kī 'ana aku iā Kollin Elderts a make. 'O Deedy, he 'ākena pekelala 'o ia a kohu mea lā, he hiki nō ke pa'a ka pū me ia ma nā wahi a pau āna e hele ai. Akā, ke hana ke kanaka pēlā, he kuleana nui nō kona, a kohu mea lā, 'a'ole i maopopo ia kuleana iā Deedy. Ua holoholo 'o Deedy me ka pa'a nō o ka pū, a inu pū 'o ia i ka wai 'ona i ia ahiahi a nui loa ke koa (i ka pū a i ka wai 'ona nō ho'i). A 'o ka hopena, ua make nō 'o Kollin Elderts i ia pō. 'Eā, inā 'a'ohe pū a Deedy i ia ahiahi, inā e ola mau ana 'o Kollin i kēia manawa.

Pehea ana lā ka hopena o ka hihia o Deedy? E ho'oku'u 'ia ana paha 'o ia e like me Zimmerman? 'O ka pono, e kanono ka ho'opa'i o Zimmerman lāua 'o Deedy. 'A'ole hiki i ke kanaka ke ho'ohana aku i ka pū e like me kona makemake. He kuleana nō ko ke kanaka ke pa'a ka pū ma kona kino. A ma muli o ka maopopo 'ole o ia kuleana iā Zimmerman lāua 'o Deedy i make hewa ai 'elua mau kānaka i aloha nui 'ia, 'o ia ho'i 'o Trayvon Martin lāua 'o Kollin Elderts. A 'o kahi mea maopopo, ma kēia hope aku, 'a'ole e 'ae 'ia ka pa'a 'ana o ka pū iā lāua, o make hou kekahi.

Ke hā'awi aku nei ko 'oukou mea kākau i kona aloha i nā 'ohana o Trayvon Martin a me Kollin Elderts.

———

E ho'ouna 'ia mai na ā leka iā māua, 'o ia ho'i 'o Laiana Wong a me Kekeha Solis ma ka pahu leka uila ma lalo nei:

>> kwong@hawaii.edu
>> rsolis@hawaii.edu

a i ‘ole ia, ma ke kelepona:

>> 956-2627 (Laiana)
>> 956-2627 (Kekeha)

This column is coordinated by Kawaihuelani Center for Hawaiian Language at the University of Hawai'i at Mānoa.






 Print   Email   Comment | View 19 Comments   Most Popular   Save   Post   Retweet

COMMENTS
(19)
You must be subscribed to participate in discussions


IN OTHER NEWS