Quantcast

Thursday, August 28, 2014         

KAUAKŪKALAHALE


 Print   Email   Comment | View 65 Comments   Most Popular   Save   Post   Retweet

Ua like paha me Kamaki Maki

For Saturday, August 17, 2013

Na Kekeha Solis

POSTED:
LAST UPDATED: 12:34 p.m. HST, Aug 19, 2013



Synopsis: There are similarities in what Christopher Deedy has done with what Thomas Massie did in 1932. Is the outcome going to be the same and we end up with the short end of the stick again?

———

Welina e nā makamaka heluhelu o Kauakūkalahale mai ka hikina a ka lā i Kumukahi a kona welo 'ana i Lehua. E hahai ana paha kākou i kahi hihia nui o Hawai'i nei. A ua hiki nō i ka hopena o ia hihia o Christopher Deedy, a 'o ka hana wale nō koe, 'o ia ke kūkākūkā 'ana o ke kiule a loa'a ka 'ōlelo ho'oholo no ka pili o Deedy i ka hewa a me ka pili 'ole paha.

'Oiai kākou e kali ana i ka loa'a mai o ka 'ōlelo ho'oholo, e no'ono'o ana ko 'oukou mea kākau no kekahi kanaka i 'ane like kāna hana. 'O ia kanaka, 'o ia 'o Thomas Massie. A 'o ka 'oia'i'o, 'a'ole wale nō 'o Massie, 'o kona mau hoa pepehi kanaka, 'o ia 'o Grace Fortescue, 'o Edward Lord a me Albert Jones. 'O kā lākou hana, ua 'aihue kanaka aku lākou iā Joseph Kahahawai a pepehi aku iā ia a make.

'O Massie, 'o ia ke kāne a Thalia Massie, ka wahine i 'ōlelo ho'opunipuni i ka lehulehu, na Kahahawai a me kona mau hoa, 'o Ben Ahakuelo, 'o Horace Ida, 'o David Takai a me Henry Chang, i pu'e aku iā ia. A ma hope mai o ke kāpae 'ia 'ana o ka hihia mua, mana'o ihola 'o Thomas Massie, e lilo 'o ia i luna kānāwai no ka pono o Joseph Kahahawai. A no laila, 'aihue kanaka 'ia 'o Kahahawai me ka mana'o, e loli ana ka 'ōlelo a Kahahawai, a e 'ōlelo ana 'o ia, ua pili nō 'o ia i ka hewa. 'A'ole na'e pēlā, 'oiai, 'a'ole i hana lapuwale iki 'o Kahahawai me kona mau hoa i ka wahine a Massie. A ma muli o kēlā, ua kī 'ia 'o Kahahawai a make ihola 'o ia.

Ua 'ane like ka hana a Deedy. Ua mana'o 'o ia, nāna e mālama i ka maluhia, 'oiai, ua lohe 'o ia, he hana 'ino ko 'one'i po'e i ka po'e malihini. He hana maika'i nō ka mālama 'ana i ka maluhia, a 'o ia nō ho'i paha ka mana'o o Massie, e mālama ana 'o ia i ka maluhia. Eia kā, 'a'ole i mālama iki 'ia ka maluhia e Deedy lāua 'o Massie. 'O kā lāua, 'o ka ho'omake hewa i kekahi mau Hawai'i. A 'o kekahi, e inu ana 'o Deedy i ka wai 'ona i kona wā i mana'o ai e mālama i ka maluhia, 'a'ole loa ia he hana akamai.

Ke kali nei ko 'oukou mea kākau 'o ke kau a'e o ka 'ōlelo ho'oholo a ke kiule. E like ana paha me ka hopena o Massie mā? 'O ka hopena o Massie mā, ua pili nō i ka hewa, a kau aku nei nō ko lākou ho'opa'i, he noho pa'ahao no nā makahiki he 10, eia na'e, ua ho'opōkole wale 'ia a he ho'okahi wale nō lā ka lō'ihi o ko lākou noho pa'ahao 'ana. A 'o ia noho pa'ahao, he noho nanea ia ma ke ke'ena o ke kia'āina.

Pehea, e pa'a hou ana ka puapua i ka Hawai'i i kēia hihia? E ho'oku'u 'olu'olu 'ia ana kekahi haole hana hewa? Pehea lā e pono ai? E pili 'o Deedy i ka hewa, a e kanono ka ho'opa'i. Pēlā e pono ai.

———

E ho'ouna 'ia mai na ā leka iā māua, 'o ia ho'i 'o Laiana Wong a me Kekeha Solis ma ka pahu leka uila ma lalo nei:

>> kwong@hawaii.edu
>> rsolis@hawaii.edu

a i ‘ole ia, ma ke kelepona:

>> 956-2627 (Laiana)
>> 956-2627 (Kekeha)

This column is coordinated by Kawaihuelani Center for Hawaiian Language at the University of Hawai'i at Mānoa.






 Print   Email   Comment | View 65 Comments   Most Popular   Save   Post   Retweet

COMMENTS
(65)
You must be subscribed to participate in discussions


IN OTHER NEWS
Latest News/Updates