Quantcast

Tuesday, July 22, 2014         

KAUAKŪKALAHALE


 Print   Email   Comment | View 0 Comments   Most Popular   Save   Post   Retweet

Ke Pā Mea 'Ai Piha Aloha

By Kekaha Solis

POSTED:



Synopsis: Three men from Hawai'i win top prize in a nationwide contest.

———

Welina e nā makamaka heluhelu. 'O ke Pā Mea 'Ai Piha Aloha, 'o ia ka inoa o ka hui nāna i kā'ili iho nei i ka lanakila ma ke kau 'ehā o ka Heihei Kalaka Kū'ai Pā Mea 'Ai. 'O ke kau 'ehā ia o ua heihei lā, 'akahi nō na'e a lohe ko 'oukou mea kākau no ia polokalamu kīwī. A 'o ka mea i ulu ai ka hoi i kēia kau 'ehā, 'o ia ke komo 'ana aku o kekahi mau keiki o Hawai'i nei i loko o ia heihei.

'O kēia heihei, he 'ano ho'okūkū ia i ka 'ono o ka mea 'ai a nā hui e ho'omākaukau ai. Kū'ai ia mau hui i kā lākou mau pā mea 'ai, a 'o nā hui nāna ka pu'u kālā nui loa i ka hopena o ka manawa i ho'oka'awale 'ia, 'o lākou ke holo mua i kekahi pule aku. A 'o ka hui li'ili'i o ke kālā, 'o ia ke hā'ule. A pēlā nō lākou e ho'okūkū ai a kū ho'okahi 'oi kelakela. A lilo i ia hui 'oi kelakela he $50,000 a me ke kalaka kū'ai pā mea 'ai.

He 'ewalu hui o ke kau 'ehā, e ake ana e lilo ka makana helu 'ekahi iā lākou. A 'o kekahi o lākou hui 'ewalu, 'o ia ka hui no Hawai'i, 'o ke Pā Mea 'Ai Piha Aloha. He 'ekolu lākou, 'o ia 'o Lanai Tabura, kona kaikaina, 'o Adam, a me Shaun Felipe.

'O kēia kau, ua ho'omaka ma ke Kūlanakauhale o nā 'ānela, a hele akula nā kalaka i 'ō a i 'ane'i o 'Amelika a hiki aku i kahi pahu hope, 'o ia ho'i ke Kapikala o 'Amelika, 'o Wakinekona, D. C. Aia aku aia mai, he pu'u nui kai kūkulu 'ia i ke alo o lākou. I kekahi pule, ua hā'awi 'ia aku ka i'a 'eli hohonu (geoduck) iā lākou, he 'ano 'ōlepa ia. I kekahi pule, he pono ke lilo ka 'uala, 'o ia ka mea nui i loko o nā pā mea 'ai a pau. Ua pōmaika'i nā keiki o Hawai'i i kekahi mau pule, he pu'u iki wale nō ke kū ana i mua o lākou, 'oiai, he wai 'au'au nō ia. I ka pule 'elima, na kēlā me kēia hui e 'oki'oki i ka pipi kuapu'u i pau i ka lole 'ia. 'O ia mau kua'āina o Hawai'i, ua ma'a lākou i ka 'oki'oki kao, a no laila, ua pau koke ihola kā lākou hana. I ka pule 'eono, 'o ka SPAM ke ho'omākaukau 'ia, 'oiai, aia lākou ma 'Aukina, Minekoka, kahi e hana 'ia ai ka SPAM. He hiki wale ia hana i nā keiki o Hawai'i no ka mea, puni ka hapanui o Hawai'i i ia 'i'o kini.

'O ka mea maika'i a i hau'oli ai ka na'au o ko 'oukou mea kākau, 'o ia ka hana like 'ana o ia mau keiki 'ekolu o Hawai'i, 'a'ole paha i ho'opa'apa'a iki kekahi me kekahi. 'A'ole na'e pēlā nā hui a pau. 'O kekahi hui, mai ho'olei 'ia ka pu'upu'u. A he mea minamina, 'oiai, he ho'omākaukau mea 'ai ka hana.

A 'o lākou nei nā mea e lei ana i ka lei o ka lanakila i ka hopena o ia heihei. Wahi a Lanai Tabura, 'o ko lākou mea i lanakila ai, 'o ia ka mākaukau o kona kaikaina i ke kuke 'ana a me ke Aloha. 'O ka mea minamina, 'a'ole e ho'iho'i 'ia mai ana ke kalaka hou o lākou nei i Hawai'i nei. E ho'ohana 'ia aku ana ma 'Amelika. He mana'o ko lākou, e ho'omāhuahua i kā lākou hana mea 'ai ma 'Amelika a puni.

He mea maika'i ko lākou lanakila 'ana e ha'aheo ai ko Hawai'i.

———

This column is coordinated by Kawaihuelani Center for Hawaiian Language at the University of Hawai'i at Mānoa.






 Print   Email   Comment | View 0 Comments   Most Popular   Save   Post   Retweet

COMMENTS
(0)
You must be subscribed to participate in discussions
By participating in online discussions you acknowledge that you have agreed to the TERMS OF SERVICE. An insightful discussion of ideas and viewpoints is encouraged, but comments must be civil and in good taste, with no personal attacks. Because only subscribers are allowed to comment, we have your personal information and are able to contact you. If your comments are inappropriate, you may receive a warning, and if you persist with such comments you may be banned from posting. To report comments that you believe do not follow our guidelines, email commentfeedback@staradvertiser.com.
Leave a comment

Please login to leave a comment.
IN OTHER NEWS
Latest News/Updates
Blogs
Wassup Wit Dat!
Silver Pockets Full

Political Radar
VoteVets

Political Radar
Values

Island Crafters
Christmas in July

Political Radar
IBEW endorsement

Warrior Beat
Travel day

Small Talk
Counting coins