Quantcast
  

Thursday, April 24, 2014         

KAUAKUKALAHALE


 Print   Email   Comment | View 0 Comments   Most Popular   Save   Post   Retweet

Ka Nūhou Kūloko 'o Ke Aolama

Na Kekeha Solis

POSTED:
LAST UPDATED: 06:26 p.m. HST, Aug 05, 2011



Synopsis: Newsbits from the past week — Kumu Charles K. Kaupu, Jr. of Maui passes away; the Brian Viloria-Julio Cesar Miranda fight; the Queen Lili'uokalani Keiki Hula Competition.

Moe i ka moe kapu o Niolopua. Ua hala aku nei kahi kumu aloha i ke ala ho'i 'ole mai ma ke kakahiaka nui o ka Pō'akolu nei. 'O Charles K. Kaupu 'ōpio nō ia. Ua puka 'o ia mai ke Kula 'o Kamehameha i ka makahiki 1975. He loea 'o ia ma ka hula a lilo akula i kumu oli. He limahana 'o Kumu Kaupu no kahi ho'olele leo o Maui, 'o ia ho'i 'o KPOA 93.5 FM. 'O kona inoa kapakapa ma ia kanela, 'o ia ho'i 'o “Bushman”. 'O ia nei nō ho'i kekahi o nā mea nāna i ho'okumu i ka Ho'olaule'a Hana No'eau ma Kapalua. Aloha nō kona 'ohana e waiho nei i hope nei.

E 'ike 'ia ana ka 'ai a nā u'i. I kēia ahiahi, e hālāwai ana 'o Brian Viloria me Julio Cesar Miranda i loko o ka lina ho'olei pu'upu'u. 'O Miranda ka inoa moho o ka māhele 112 paona (ka Paona Nalo). 'O ke kolu kēia o ka manawa e kūpale aku nei ‘o Miranda i ka lima kā'ili i kona inoa moho.

'Olu ke kino i ka hula. Mālama 'ia aku nei ka Ho'okūkū Hula Keiki 'o ka Mō'īwahine Lili'uokalani i kēlā pule aku nei, a 'o Shayla Ballesteros ka Miki Keiki Hula. He haumāna 'o ia no ka Hālau Nā Lei Kaumaka o Uka. 'O Pi'ikea Lopes o Ka Lā 'Ōnohi Mai o Ha'eha'e ka helu 'elua, ke keiki ho'i a Keawe me Tracie Lopes. A ma ke kūlana helu 'ekolu, 'o Mehana Muranaka o Aloha 'o Pu'uwailani Hālau. 'O ka helu 'ehā o nā kaikamāhine, 'o ia 'o Manaia Moe o ka Hālau Ka Liko Pua o Kalaniākea, a 'o Karlee Chong Kee o ka Hālau Kekuaokalā'au'ala'iliahi ka helu 'elima. A no nā keiki kāne, 'o Rahstan Benevides Mika Keiki Hula, no ka Hālau Kekuaokalā'au'ala'iliahi. 'O Zane Biscocho o ka Hālau Hula Olana ka helu 'elua. Ma ka helu 'ekolu 'o Gaku Tamai o ka Hula Hālau 'o Leilani. Ma ka helu 'ehā, 'o Java Aguon-Kona o ka Hālau Ka Lei Mokihana o Leina'ala, a 'o Heiari'i Weza o ka Hālau Kala'akeakauikawēkiu ka helu 'elima. Ma nā māhele 'ē a'e, ua lilo he 'ekolu makana hou aku i ka Hālau Ka Lei Mokihana o Leina'ala, 'o ia ho'i, 'o ka Hula Kahiko a nā keiki kāne, ka Hula 'Auana a nā kaikamāhine a me ka Makana Huinapau no nā kaikamāhine 'o Pat Namaka Bacon. A lilo nō ho'i he 'ekolu makana i ka Hālau Kekuaokalā'au'ala'iliahi, 'o ia ho'i, 'o ka makana Hula Kahiko a nā kaikamāhine, ka Hula 'Auana a nā keiki kāne, a me ka Makana Huinapau no nā keiki kāne. Ua lilo ka Makana 'Ōlelo Hawai'i 'o Malia Craver i ka Hālau Mohala 'Ilima. A ua lilo ka Makana 'Ōlelo Hawai'i 'o Mary Kawena Pukui iā Ka Lā 'Ōnohi Mai o Ha'eha'e. Ho'omaika'i iā 'oukou e nā keiki o Hawai'i nei e ho'omau nei i nā hana a me ka 'ike a nā kūpuna.

E ho'ouna 'ia mai nā leka iā māua, 'o ia ho'i 'o Laiana Wong a me Kekeha Solis ma ka pahu leka uila ma lalo nei:
» kwong@hawaii.edu
» rsolis@hawaii.edu
a i ‘ole ia, ma ke kelepona:
» 956-2627 (Laiana)
» 956-2624 (Kekeha)
This column is coordinated by Kawaihuelani Center for Hawaiian Language at the University of Hawai'i at Mānoa.






 Print   Email   Comment | View 0 Comments   Most Popular   Save   Post   Retweet

COMMENTS
(0)
You must be subscribed to participate in discussions
By participating in online discussions you acknowledge that you have agreed to the TERMS OF SERVICE. An insightful discussion of ideas and viewpoints is encouraged, but comments must be civil and in good taste, with no personal attacks. Because only subscribers are allowed to comment, we have your personal information and are able to contact you. If your comments are inappropriate, you may receive a warning, and if you persist with such comments you may be banned from posting. To report comments that you believe do not follow our guidelines, email commentfeedback@staradvertiser.com.
Leave a comment

Please login to leave a comment.
IN OTHER NEWS
Latest News/Updates