Quantcast

Tuesday, September 02, 2014         

KAUAKUKALAHALE


 Print   Email   Comment | View 0 Comments   Most Popular   Save   Post   Retweet

Ke aloha kai 'oi a'e

Na Kekeha Solis

POSTED:



Synopsis: With a few recent suspected deaths or serious injuries because of a difference of opinion, we should follow examples from our kūpuna for positivity.

Aloha mai e nā makamaka heluhelu mai Hawai'i moku o Keawe a i ka moku kā'ili lā o Ni'ihau. E 'olu'olu e ho'omanawanui mai i ka heluhelu 'ana i ka mo'olelo o kēia lā, i kākau 'ia ma muli o nā make i 'ike 'ia iho nei ma nā pule i hala, a me nā 'eha pū kekahi ma muli o nā mana'o kū'ē'ē o kekahi i kekahi. A 'o ia ke kumu e kau a'ela ia lālani mele kaulana i luna. No loko mai ia o ke mele 'Ekolu Mea Nui, e hō'ike mai ana, “'Ekolu mea nui ma ka honua,” akā, 'o “ke aloha kai 'oi a'e.” He mele Kalikiano nō ia. Akā, he mea nui nō ho'i “ke aloha” i nā kūpuna o kākou, a 'o kekahi mea nui paha, 'o ia ho'i ke aloha kanaka. E like me ia 'ōlelo mai kahiko mai, 'o ia ho'i, “E 'ike i ka hoa kanaka, o kipa hewa ke aloha i ka 'īlio.” A pēlā pū nō me ka 'ōlelo, “A aloha wale 'ia ho'i 'o Kaunuohua, he pu'u wale nō.” Eia mai kekahi mo'olelo i puka ai ia 'ōlelo aloha. He mo'olelo ia no Kalaninuiiamamao. Penei ka mo'olelo (i ho'opōkole 'ia)

I ka lohe 'ana aku o Kalaninuiiamamao, “ua poino ia kona hoahanau alii, oia o Laamea, mamuli o na imihala wale ia ana e ka poe manao ino, a ua hopu ia oia e na koa o Kalaniopuu,” hele akula 'o ia i Ka'ū, a ma mua o ka pae ‘ana o nā wa'a o Kalaninuiiamamao i uka, 'ike 'ia nā kānaka he nui e kū mai ana me ka pa'a 'ana o kekahi i nā pōhaku ma ka lima, a 'o kā kekahi, he lā'au. A i ka hekau 'ana aku o nā wa'a i kula, hopu 'ia ihola a hāpai 'ia a kau i kahi malo'o. 'O ka mea kupaianaha i 'ike 'ia i ia manawa, 'o ia ka waimaka e hiolo makawalu ana ma kona mau pāpālina. Holo akula kekahi mau kānaka a Kalaniopuu, a hō'ike akula i ka mea i 'ike 'ia, 'o ia ho'i, ka uē wale o kēia ali'i. No laila, hele akula 'o Kalaniopuu no kahi o ka malihini, a i kona hiki 'ana i laila, hui aloha ihola lāua 'o Kalaninuiiamamao. A laila, nīnau maila 'o Kalaniopuu no ka huaka'i 'ana, a pane akula 'o Kalaninuiiamamao, “I ki'i mai nei au i ku'u pōki'i.” A 'o ia nō ho'i ka wā i puka a'e ai kēia mau 'ōlelo, “E 'ike 'ia kāua hoa kanaka, o kipa hewa ke aloha i ka 'īlio, a hilihewa auane'i ke aloha iā Kaunuohua, he pu'u ia, he kanaka ho'i kēia.” A ho'omau akula, “A 'o ia ka'u huaka'i i hiki maila, no ke aloha, inā ho'i au e make iā 'oe, ua hiki nō.” A i ka lohe 'ana aku o Kalaniopuu, ‘ae koke maila e ho'oku'u 'ia ka pio, me he ala, 'a'ole ia he pio. A ua ho'okipa 'ia 'o Kalaninuiiamamao me ka maika'i a hiki i kona ho'i hou 'ana no Maui.

A 'o nā hana a ia mau ali'i 'elua i hō'ike 'ia a'e nei, he mau hana maika'i wale ia na kākou e a'o ai a e hana like ai ho'i. 'Eā, i ka lohe 'ana aku o Kalaninuiiamamao i ka pō'ino o kona hoahānau, 'a'ole 'o ia i hele wale aku i ke kaua a i ka hakakā paha me nā kānaka nāna i ho'opō'ino i kona pōki'i. Ua hele aku nō me ke aloha no kona pōki'i, 'a'ole me ka 'ino o ka na'au. A i ka 'ike 'ana mai paha o Kalaniopuu i kēia aloha, pāna'i maila 'o ia i ke aloha. A 'a'ohe kanaka i make.

E ho'ouna 'ia mai nā leka iā māua, 'o ia ho'i 'o Laiana Wong a me Kekeha Solis ma ka pahu leka uila ma lalo nei:
» kwong@hawaii.edu
» rsolis@hawaii.edu
a i ‘ole ia, ma ke kelepona:
» 956-2627 (Laiana)
» 956-2627 (Kekeha)
This column is coordinated by Kawaihuelani Center for Hawaiian Language at the University of Hawai'i at Mānoa.





More From The Star-Advertiser

No ka Lā o nā Ipo




 Print   Email   Comment | View 0 Comments   Most Popular   Save   Post   Retweet

COMMENTS
(0)
You must be subscribed to participate in discussions


IN OTHER NEWS
Latest News/Updates