Quantcast

Wednesday, August 20, 2014         

KAUAKUKALAHALE


 Print   Email   Comment | View 0 Comments   Most Popular   Save   Post   Retweet

Nele i ka mea poepoe, nele ka pilina mai

By Kekeha Solis

POSTED:



Synopsis: Some Ānuenue fans need to be more supportive and not just fair-weather fans.

Welina 'oukou e nā makamaka heluhelu. Eia nō kākou ke hiki aku nei i ka hopena o kēia makahiki nei. A 'o ka hopena nō ho'i ia o ke kau pōpō peku a me ke kau pōpō pa'ilima. A ke nānā aku i ka hana a ka hui pōpō peku a me ka hui pōpō pa'ilima o ke Kulanui o Hawai'i, e 'ike 'ia aku ka naku 'ana o kekahi i ka nāhelehele i uluāhewa, a me ka holo mī'oi o kekahi. Ma ka puni mua o ka ho'okūkū inoa moho pōpō pa'ilima o ka pō Pō'ahā nei, ua nui loa ke anaina māka'ika'i e kāko'o ana i nā Wāhine Ānuenue, ka hui helu 'ekolu o ke ao nei. He 7,193 mau kānaka i hele aku nei i ua pō nei. A 'o ka huina pau o ke anaina māka'ika'i o nā wahi 'ē a'e he 'ehā i mālama 'ia ai ka puni mua o ia ho'okūkū inoa moho, he 7,390 mau kānaka. He hō'ike ia i ke kāko'o maika'i o nā hoa puni 'ālapa Ānuenue. 'O ia paha ka mea e holo ai ia 'ōlelo, 'o ia ho'i, 'o nā hoa puni 'ālapa Ānuenue ka 'oi. A pēlā nō ka mana'o o ko 'oukou mea kākau, i ka wā e hana maika'i ana nā hui 'ālapa o Hawai'i. Akā, i ka wā e nele ai i ka mea poepoe (ka hua lanakila), he ho'ohalahala ka hana, 'a'ole paha e hele i ke kāko'o a pēlā aku.

A 'o ia ka mea i kaumaha ai ka na'au o kēia mea kākau nei, 'o ke 'ano o nā hoa puni nānā 'ālapa o nā Ānuenue, 'a'ole lākou a pau e kapa 'ia he hoa aloha 'oia'i'o. He hoa aloha kūikawā paha ka inoa kūpono, e like ho'i me ka mea e 'ike 'ia nei no nā Koa Ānuenue, 'o ia ho'i, i kēia kau nei, 'o ka 'awelika o ke anaina māka'ika'i, he 30,824. I ka ho'okūkū mua o kēia kikina nei, he 37,001 mau kānaka i hele aku nei i ke Kahua Pā'ani 'o Aloha. A i kēlā Pō'aono aku nei, he 27,411 wale nō.

E hao mai ana kahi 'ōlelo, “Ma muli ia emi o ka ua o ia ahiahi.” A eia mai ka pane a ko 'oukou mea kākau, “He pa'akai ke kanaka a e hehe'e auane'i?”

He pono ke kāko'o i ka wā lanakila, a me ka wā i hā'ule ai i muliwa'a. He 'oi loa aku paha ka pono o ke kāko'o i ia wā. E hō'ike pono 'ia ke kāko'o i nā Ānuenue o Hawai'i nei i nā wā a pau.

Ua moe i ka moe kapu o Niolopua

Synopsis: Law Professor Jon Van Dyke of the University of Hawai'i passes away.

Aloha nō. Ua hala akula 'o Jon Van Dyke i ke ala ho'i 'ole mai i ka pō Pō'alua nei. Aia 'o ia ma 'Aukekulelia no ka ha'i 'ōlelo 'ana ma kekahi 'aha. A i kona ho'i 'ana e moe i ia pō, 'a'ole paha i maopopo, 'o ka moe loa 'ana ia me Niolopua. A i ke ao 'ana a'e, 'a'ohe wahi mea ona a ala mai.

He kanaka 'o Van Dyke i kū i ka pono no ke kanaka. A ua aloha a mahalo nui 'ia 'o ia e kona mau hoa polopeka, nā haumāna a me nā kānaka like 'ole. Ua ha'alele 'o Van Dyke i hope nei i kāna wahine, iā Sherry Broder, a me kā lāua mau keiki 'ekolu, ‘o Jesse, ‘o Eric a me Michelle. Iā 'oe e Polopeka Van Dyke ko'u aloha kūmākena, a iā 'oukou e ka 'ohana ona a me nā hoa ke aloha i loko o kēia wā lu'ulu'u.


E ho'ouna 'ia mai nā leka iā māua, 'o ia ho'i 'o Laiana Wong a me Kekeha Solis ma ka pahu leka uila ma lalo nei:

» kwong@hawaii.edu
» rsolis@hawaii.edu

a i ‘ole ia, ma ke kelepona:

» 956-2627 (Laiana)
» 956-2627 (Kekeha)

 

This column is coordinated by Kawaihuelani Center for Hawaiian Language at the University of Hawai'i at Mānoa.






 Print   Email   Comment | View 0 Comments   Most Popular   Save   Post   Retweet

COMMENTS
(0)
You must be subscribed to participate in discussions


IN OTHER NEWS
Latest News/Updates
Blogs