'Ai nō ke kōlea a momona, ho'i i Kahiki

Synopsis: Companies that do business in Hawai'i should have responsibilities. Mahalo to those on Moloka'i who are voicing their concerns.

Welina e nā makamaka heluhelu. 'O ia 'ōlelo e kau a'ela ma luna, he 'ōlelo ia mai nā kūpuna mai. Ma ia 'ōlelo, e hō'ike 'ia ana ke 'ano o ke kōlea. A ho'ohālikelike 'ia ua manu nei me ka malihini i hele mai i Hawai'i nei. A 'imi akula ua malihini lā i wahi e nui ai kāna kālā ma 'ane'i. A i ka nui 'ana aku o kā ia ala kālā, 'o kona ha'alele maila nō ia iā Hawai'i nei no kona 'āina hānau. A ma laila 'o ia ala e lū aku ai i ia pu'u kālā i loa'a iā ia ma Hawai'i. Aloha nō nā kānaka o Hawai'i nei, lilo akula ke kālā o ne'i nei i ka 'āina 'ē. E nā makamaka heluhelu, 'o ia hana a ke kōlea, he mea ahuwale ia. 'A'ohe wahi mea ona a ho'onalonalo i ia hana āna.

'O ka mea 'āpiki i kēia mau lā, he kōlea hou nō, ua 'oi a'e kona akamai a ma'alea paha ma mua o kona mau kūpuna. Ua maopopo i ua kōlea hou lā, ke pau ihola ke ahonui o nā kānaka i kāna hana 'ānunu. No laila 'o ia i no'ono'o ai i wahi 'ē a'e e momona ai kona nui kino me ke komo pū 'ana paha i ka lole 'alu'alu loa i 'ole e 'ike 'ia kona hele 'ana a momona, a polupolu, a 'ōpū kēkewe paha. 'Eā, ua 'ike paha 'oukou, e nā makamaka heluhelu, i ua kōlea hou lā.

Ua 'ike 'ia nō paha ua kōlea hou lā e ko Moloka'i nui a Hina. A 'o ia paha ka mea a lākou nei e kū'ē aku nei i ke kū 'ana o ka moku ho'omāka'ika'i o ka hui American Safari Cruises. Noi aku nei ko Moloka'i i ka hui pū 'ana no ke kūkākūkā 'ana a me ka ho'olālā 'ana i mea e pono ai nā waiwai o Moloka'i. A he kūpono nō ia, 'oiai, 'o Moloka'i nō kahi o lākou e noho pa'a nei, inā pau ka pono o nā waiwai o laila, pehea lā lākou e ola ai? He aha ka mea e pono ai? He kauka'i i ka mea'ai o 'Amelika a me kona mau mea'ai e ho'ololi kolohe 'ia nei, 'o ka GMO ho'i? 'A'ole loa.

A 'ōlelo a'ela ka pelekikena o ka Papa 'Oihana Kālepa o Moloka'i, 'o Robert Stephenson, he hopohopo 'o ia ke koi 'ia kekahi hui 'oihana e ho'okō i nā mana'o o kekahi mau hui pilikahi, 'oiai na'e, he mau hana ko ia hui i kū i ke kānāwai. 'O ka nīnau nui, pehea lā 'o Stephenson i lilo ai 'o ia ka pelekikena o ka Papa 'Oihana Kālepa o Moloka'i? Inā aia 'oe ma ia kūlana ki'eki'e, he pono ke nānā i nā 'ao'ao 'elua. 'A'ole wale nō e nānā i ke kū i ke kānāwai a me ka 'ole paha. Ua nui nā hana i kū i ke kānāwai, 'a'ole na'e i kū i ka pono. Ma ke kānāwai, he hiki nō i ke aupuni ke huki i ka 'āina o ha'i, a i kahi māhele paha o ka 'āina me ka uku 'ana, me ka 'ae a me ka 'ae 'ole paha o ka mea nona ia 'āina. 'A'ole ia he mea i kū i ka pono. 'O ke puhi 'ana i ke kikaliki, he kū nō i ke kānāwai, 'a'ole na'e ia he mea maika'i e ola pono ai ke kino. 'O ka inu 'ana i 'umi 'ōmole tekila i ka pō ho'okahi, 'a'ole ia he 'a'e kānāwai, akā, he mea maika'i 'ole ia.

No laila, he mea maika'i nō ka hana a ko Moloka'i ma ke koi 'ana i ka hui 'o American Safari Cruises e ho'okō i kahi kuleana e pono ai ka 'āina a me nā kānaka o laila. Ua 'ōlelo 'ia ma ka Hōkū-Avalataisa, e ho'omau 'ia ana ke kūkākūkā 'ana o nā kānaka o Moloka'i me ke kanaka nona ia hui ho'omāka'ika'i, me Dan Blanchard.

E ho'ouna 'ia mai na ? leka i? m?ua, 'o ia ho'i 'o Laiana Wong a me Kekeha Solis ma ka pahu leka uila ma lalo nei:
» kwong@hawaii.edu
» rsolis@hawaii.edu
a i ‘ole ia, ma ke kelepona:
» 956-2627 (Laiana)
» 956-2627 (Kekeha)
This column is coordinated by Kawaihuelani Center for Hawaiian Language at the University of Hawai'i at Mānoa.