Aloha Makahiki Hou

Synopsis: Happy New Year. A lot of things happened in 2011. Let’s be prepared for 2012.

Aloha Makahiki Hou e nā makamaka heluhelu. Eia nō kākou i ke ahiahi makahiki hou, ka hopena ho'i o ka makahiki 2011.

Ua 'ike 'ia nō ka ho'omau 'ana o ke kōlea e pō'alo i ka maka o ka Hawai'i, 'a'ole paha e pau. Ua luku 'ia kekahi mau 'āina e ka 'ino, 'o ke ōla'i 'oe, 'o ke kai ho'ē'e 'oe, 'o ka wai hālana 'oe. Akā, ua 'ike 'ia nō ho'i ka hana maika'i i piha i ke aloha, 'o ia ke alu like 'ana o kānaka i ke kōkua aku i nā kānaka o ia mau 'āina i pāluku 'ia e ka 'ino.

Mai nō a poina iā kākou ia 'ano aloha i loko o kēia makahiki hou e hiki koke mai ana, 'o ka mea ia e lana ai ka mana'o i loko o ka wā pō'ino. A wahi a ka lohe, e pāhola ana kahi 'ino ma Hawai'i nei i ka hopena o ka makahiki hou a no laila, e hume i ka malo, a e liuliu a e ho'omākaukau. E mālama kākou i ka 'āina. E ho'oulu i ka 'ai ma ka hale i 'ole ai kākou e kauka'i i ka mea 'ai o ka 'āina 'ē. A he mau 'ano ho'oulu hou ke laha nei, 'o kekahi, 'o ia ka ho'oulu lepo 'ole a 'o kekahi, 'o ia ka ho'oulu lepo 'ole me ka i'a.

E mālama kākou i ka wai i mea e nui hou ai ka wai o nā lua wai o kākou. E kū'ai paha i ka pahu mālama wai ua a i ka wā malo'o, loa'a kahi wai no ka 'awa.

Mahalo ho'i iā 'oukou e nā makamaka heluhelu no ke kāko'o 'ana mai a e holo mua kākou.

Ho'ohiki e inuwai

Synopsis: A call to not drink and drive. Instead utilize the free service from AAA Hawai'i.

'Auhea 'oukou e nā makamaka koni i ka wai hu'ihu'i, e kau leo ana ko 'oukou mea kākau, e komo i ka pū'ali inu wai a mai puni i ka inu wai 'ona ma kēia hope aku. 'O ke po'o mana'o e kau a'ela i luna, 'o ka inoa ia o kekahi mele e paipai ana i ka hō'ole i ka inu i ka wai kā'ili ao.

1. Hoohiki pu kakou ano,
Aole e pa waiona e,
Barani ula, hoolalau,
Wiseke wela, ona mau,
Ka rama hoopoino no.
Ke gini pu e waiho ae.
Okolehao, ka saida, bia,
Na mea ona hoi a pau.

2. Hoohiki paa, e inuwai,
Ka wai maikai o kahawai,
E kue mau, e kinai no,
Na mea ona no a pau,
I pomaikai Hawaii nei,
Ka home lai, aloha e (Kulu Wai Liilii: He Mau Mele Hoole Waiona, 'ao. 70).

'Eā, inā 'a'ohe paha ou makemake e komo i loko o ia pū'ali ma muli o ka 'ono loa o ua wai hu'ihu'i lā o ke aniani, eia kahi mea e ho'ohiki pa'a ai, 'o ia ho'i, ke kalaiwa 'ole 'ana ma lalo o ka malu o ka wai 'ona.

A 'o kahi pōmaika'i, i kēia hopena pule nei, e kōkua mai ana ka hui 'o AAA Hawai'i. Na ia hui e ho'iho'i i ka hale i ke kanaka e inu ana i ka wai lohi o Maleka, me ke kolo pū i kona ka'a. He manuahi ia hana a hiki i ka lima o nā mile. A ke 'oi aku i nā mile 'elima, na ia kanaka e uku i ia māhele 'oi. Ho'omaka iho nei ia hana i ka hola 6:00 o ke ahiahi Pō'alima nei, a e pau ana i ka hola 6:00 o ke kakahiaka Lāpule. Eia mai ka helu kelepona, (800) 222-4357

E ho'ouna 'ia mai nā leka iā māua, 'o ia ho'i 'o Laiana Wong a me Kekeha Solis ma ka pahu leka uila ma lalo nei:

» kwong@hawaii.edu
» rsolis@hawaii.edu

a i ‘ole ia, ma ke kelepona:

This column is coordinated by Kawaihuelani Center for Hawaiian Language at the University of Hawai'i at Mānoa.