Quantcast

Friday, December 19, 2014         

KAUAKUKALAHALE


 Print   Email   Comment | View 1 Comments   Most Popular   Save   Post   Retweet

E kanono ka ho‘opa‘i

By Kekeha Solis

POSTED:



Synopsis: The Los Angeles Lakers’ Andrew Bynum has played better than usual since his return. But why was his suspension reduced?

***

Aloha Makahiki Hou mai e nā makamaka heluhelu mai ka hikina a ka lā i Makanoni a i kona welo 'ana aku i ka mole 'olu o Lehua. Pehea, he mau hoa puni pā'ani kinipōpō hīna'i paha 'oukou? Inā pēlā, he makana Kalikimaka maika'i loa paha kā 'oukou, 'o ia ho'i, ua ho'omaka ke kau pā'ani kinipōpō hīna'i ma ka lā 25 o Kēkēmapa, ka lā Kalikimaka ho'i. A ma ia lā, ua 'ike 'ia aku nō ka ho'okūkū, kahi i kū'ē aku ai nā Leika o ke Kūlanakauhale o nā 'Ānela i nā Pipi Kāne o Kikako.

A no nā Leika, 'a'ole i komo pū 'o Andrew Bynum i ka pā'ani ma ia lā Kalikimaka, 'oiai, ua kāpae 'ia 'o ia, 'a'ole e pā'ani ma nā ho'okūkū mua 'elima o ke kau pā'ani pōpō hīna'i 2011-2012 ma muli o kāna hana lapuwale iā J.J. Barea o Dalaka ma ka ho'okūkū hope loa o nā Leika o ke kau i hala. He ho'okūkū wae moho nō ia, a e 'oi ana 'o Dalaka he 32 'ai i kā nā Leika. A he 8 minuke, 21 kekona wale nō i koe, 'o ia ka manawa i lele aku ai 'o Barea no ke kī kīko'o a lele pū mai 'o Bynum me ke ku'eku'e lima hao, a ho'oku'eku'e akula i ke keiki o Dalaka. Me ka 'ino nō o ka mana'o i hana ai 'o Bynum ma muli paha o ka maika'i 'ole o ka hana a nā Leika ma ia ho'okūkū. A ma hope o kēlā ma kona wā i kipaku 'ia ai, wehe akula 'o ia i kona pālule. He keu a ka hilahila, he kohu pēpē uē ke 'ano.

'Eā, 'a'ole ia 'ano hana he hana kū i ka pono ma ka pā'ani kinipōpō hīna'i. A 'a'ole loa ma ka pā'ani 'ana ma ke 'ano he loea, e like me Bynum mā. 'O ka mea minamina, 'a'ole nō i kanono ka ho'opa'i. He 'elima wale nō ho'okūkū e pā'ani 'ole ai me ka uku 'ole 'ia no ka ho'oku'eku'e 'ana a he $25,000 no ka wehe 'ana i kona pālule a me kona 'ano nuha i ka ha'alele 'ana i ke kahua. A ua ho'ēmi 'ia a ka 'ehā ma muli o ka ho'opōkole 'ia 'ana o ke kau. 'O ka mea 'āpiki, 'a'ole ia 'o ka makamua o kāna ho'oku'eku'e 'ana i ka hoa paio. Ma Mei ia hana 'ino a Bynum iā Barea, a he 'elua mahina ma mua, ma Malaki, ua hana like 'o ia iā Michael Beasley o Minekoka. A no ia hana ma Malaki, he 'elua wale nō ona ho'okūkū i kāpae 'ia ai. 'O ia paha kona mea i hana hou ai i ia hana lapuwale, kū 'ole ho'i i ka pono.

'O kahi mea maika'i, ua mihi 'o Bynum i kāna hana hewa me ka 'ōlelo pū 'ana, 'a'ole 'o ia e hana hou pēlā. Ke lana nei ka mana'o o ko 'oukou mea kākau, e ho'okō 'o Bynum i ia 'ōlelo ho'ohiki āna, 'oiai, he nui nā keiki me nā 'ōpiopio e nānā ana i ka hana a kēia mau kānaka loea pōpō hīna'i, a e kuhihewa auane'i paha lākou, he hana pono ia 'ano hana lapuwale ma ka pōpō hīna'i.

'Auhea 'oukou e nā mākua mea keiki a me nā po'o ka'i pōpō hīna'i, e a'o 'ia nā keiki, 'a'ole kū pono ia 'ano hana a me ia 'ano pēpē uē wale ma ke kahua, a ma waho o ke kahua nō ho'i. A ke kanaka makua lākou, 'a'ole nō paha e hana e like me Bynum a me nā loea 'ē a'e i like ka hana. E nānā paha i ke ki'i 'oni'oni 'o Coach Carter.


E ho'ouna 'ia mai nā leka iā māua, 'o ia ho'i 'o Laiana Wong a me Kekeha Solis ma ka pahu leka uila ma lalo nei:

» kwong@hawaii.edu
» rsolis@hawaii.edu

a i ‘ole ia, ma ke kelepona:

» 956-2627 (Laiana)
» 956-2627 (Kekeha)

This column is coordinated by Kawaihuelani Center for Hawaiian Language at the University of Hawai'i at Mānoa.






 Print   Email   Comment | View 1 Comments   Most Popular   Save   Post   Retweet

COMMENTS
(1)
You must be subscribed to participate in discussions


IN OTHER NEWS
Latest News/Updates