Quantcast

Wednesday, November 26, 2014         

KAUAKŪKALAHALE


 Print   Email   Comment | View 2 Comments   Most Popular   Save   Post   Retweet

Ka Lehua o Kahakuloa

For Saturday, March 24, 2012

Na Kapā ‘Anaokalāokeola Oliveira

POSTED:



Synopsis: A new beloved baby girl of Kahakuloa has blessed Edward Apiu Alika Apo and Katrina-Ann Rose-Marie Kapā'anaokalāokeola Oliveira.

——

Welina 'oukou e nā hoa makamaka heluhelu o Kauakūkalahale mai nā pua laha 'ole o Kumukahi a i ka lokelani i wili pū 'ia me ka maile o nā hono a'o Pi'ilani a i ka pua 'ilima lahilahi o Mauna Lahilahi a hiki loa aku i Hanalei kahi e kui 'ia ai ka mokihana i lei poina 'ole, me 'oukou ka welina o ke aloha.

'Anapu maila ka uila a e ku'i ikaika ana ka hekili mai kekahi 'ao'ao o ka lani a hiki i kekahi 'ao'ao aku i mālamalama ka honua. He nui loa nō ho'i ka makani o ke aumoe o ka pō mahina 'o Hua. 'O Welo ka malama; Welo ke aloha i ka 'ōnohi.

I ke kakahiaka nui o ka pō mahina 'o akua i ka hola 12:59 ho'i ma ka haukapila 'o Maui Memorial i hānau 'ia ai he mamo makamae no Mauiakama nona ka inoa 'o Kahakai Kalehuaokahakuloaakalawai'anuinākoa Mōloa Chew-Quon Maile Apo. He pua hiwahiwa na Edward Apiu Alika Apo lāua 'o Katrina-Ann Rose-Marie Kapā'anaokalāokeola Oliveira. He kaikamahine, he 'ōpu'u pua i mōhala, a he maka lehua no kona one hānau.

E kolo ana nō ka ēwe o ka 'iewe a mōloa. Ua ho'i akula ka lehua o Kaukini i ka piko i kona kulāiwi ho'i 'o Kuewa i ke awāwa uliuli 'o Kahakuloa. Ma laila i kanu 'ia ai he kumu lehua i kiaho'omana'o no nā lehua laha 'ole o Kahakuloa, 'o ke kumu lehua 'oe, 'o ke kalo 'oe, 'o nā koa 'oe, a 'o ka loea lawai'a 'oe.

Eia iho nei he mele inoa a he mele aloha 'āina nō ho'i ia no nā lehua o Kahakuloa i noho loa ma ke one hānau o nā koa wiwo 'ole. Na lākou ke kamaiki e mālama i ka poli aloha o nā kūpuna, nā kupa o ka 'āina.

Aloha Kailioi o Kuewa,
E walea i ka leo o ka manu,
Manua ka moolei o Naone,
Ke one hanau o Nakoa,
E ola koa, e ola na iwi
I ke kulaiwi i ka malu o Kaukini
Kinikini waiwai a lehu hoi
Ua hoi no ka lehua o Kahakuloa.

He 'ōlelo mai ka Luna Ho'oponopono mai

[Aia nō ke ho'okō 'ia ihola kahi 'ōlelo mākia a ka Mō'ī Kalākaua, 'o ia ho'i, “Ho'oulu Lāhui.” A pōmaika'i nō ka Luna Ho'oponopono i ka 'ike 'ana aku i kahi ki'i o Kahakai Kalehuaokahakuloaakalawai'anuinākoa Mōloa Chew-Quon Maile Apo. He pupuka nō (e like me ka 'ōlelo a nā kūpuna) kahi lehua hou o Kahakuloa. A he 'ōlelo ho'omaika'i kēia maiā māua 'o Laiana iā 'olua e Māmā (Kapā) me Pāpā (Alika), a me kahi pua lehua hou a 'olua. A ua 'ike nō kēia mau luna ho'oponopono i ia mea he keiki i hānau mai ma ka 'ohana (a kani mo'opuna nō ho'i), a he mea maopopo wale ka hau'oli i loko o ka 'ohana. A pēlā nō ho'i i hau'oli ai ka na'au o māua i ka hānau 'ana mai o Kahakai Apo. Me ke aloha nō.]

———

E ho'ouna 'ia mai na ā leka iā māua, 'o ia ho'i 'o Laiana Wong a me Kekeha Solis ma ka pahu leka uila ma lalo nei:

>> kwong@hawaii.edu
>> rsolis@hawaii.edu

a i ‘ole ia, ma ke kelepona:

>> 956-2627 (Laiana)
>> 956-2627 (Kekeha)

This column is coordinated by Kawaihuelani Center for Hawaiian Language at the University of Hawai'i at Mānoa.






 Print   Email   Comment | View 2 Comments   Most Popular   Save   Post   Retweet

COMMENTS
(2)
You must be subscribed to participate in discussions


IN OTHER NEWS
Latest News/Updates