Quantcast

Thursday, August 21, 2014         

KAUAKŪKALAHALE


 Print   Email   Comment | View 6 Comments   Most Popular   Save   Post   Retweet

He keu a ka hana keaka maika'i

For Saturday, April 28, 2012

Na Kekeha Solis

POSTED:



Synopsis: Metta World Peace probably has a future in Hollywood. His punishment should have been far worse.

———

Aloha mai e nā makamaka heluhelu. Ua nānā aku nei paha 'oukou i ka ho'okūkū pōpō hīna'i o ka Lāpule nei, kahi i kū'ē aku ai nā Leika o ke Kūlanakauhale o nā ‘Ānela i ka Hekili o ke Kūlanakauhale 'o 'Okalahoma.

Ua hahana nō ka pā'ani 'ana o nā 'ao'ao a 'elua mai ka ulele 'ana a i loko o ka hapahā 'elua. I loko o ia hapahā, holo akula 'o Maluhia Honua Meka o nā Leika a pakā akula i ke kinipōpō a komohia ma luna o Serge Ibaka lāua 'o Kevin Durant o ka Hekili. Ma hope mai o ia pakā 'ana aku o kahi Maluhia Honua ka mea i pū'iwa ai ka no'ono'o o kānaka. E ku'iku'i ana ua Maluhia Honua lā i kona umauma me kona pu'upu'u lima 'ākau. A 'o kahi lima hema o ia ala ka pilikia. Ua ho'oku'eku'e ikaika akula 'o Maluhia Honua i ke po'o o James Harden o ka Hekili, a waiho wale ana 'o Harden ma ka papahele o ke kahua. Ua kipaku 'ia aku 'o Maluhia Honua Meka ma muli o kāna hana pēlā. A he kūpono nō ia kipaku 'ia 'ana ona.

'O ka mea 'āpiki, kohu mea lā, 'a'ole i maopopo iki iā Maluhia kāna hana pono 'ole i hana ai. Wahi āna, he piha hau'oli wale nō kona na'au a no laila, e hō'ike wale aku ana 'o ia i ia hau'oli. 'Eā, ke kuhi nei ko 'oukou mea kākau, ke pau ka wā pā'ani pōpō hīna'i o kahi Maluhia Honua, e hiki ana iā ia ke lilo i mea hana keaka kaulana. I ka nānā 'ana aku i kāna hana ma luna o ke kīwī, ua 'ike 'ia aku nō ka holo 'ana o kona lima i ka 'ākau, i mea paha e ho'onui ai i ka holo 'ana, a ku'e ikaika akula kona ku'eku'e lima i ke po'o o Harden. E nā makamaka heluhelu, na 'oukou nō 'oukou e nānā aku i kāna hana ma ka pūnaewele, a e koho 'oukou, he ulia wale nō paha ia, a i 'ole ia, ua hana 'ia me ka mana'o 'ino o loko o ua kanaka lā, e kapa 'ia aku ai paha 'o ia, 'o 'Ino Honua Meka. 'O kekahi mea minamina, 'a'ole i kuhi iki 'o Harden, he hākōkō ka hana i ia pō. Inā i maopopo iā ia, inā paha ua mākaukau 'o ia a hala ana paha kahi ku'eku'e lima o 'Ino Honua Meka.

Akā, e a'o paha 'o 'Ino Honua i ka ha'awina, 'oiai, ua loa'a akula 'o ia i ka ho'opa'i, 'o ia ho'i, e ho'omalu 'ia 'o ia no nā ho'okūkū he 'ehiku, 'a'ole 'o ia e pā'ani. 'Ehiku wale nō ho'okūkū? E ke Komikina David Stern, e kanono ka ho'opa'i! 'Ehiku wale nō ho'okūkū. 'A'ole ia he ho'opa'i e no'ono'o pono ai ke kanaka ma kēia hope aku, 'a'ole e hana hou i ka hana lapuwale.

'O ke kumu paha o ia ho'opa'i 'ano 'ole, inā e lanakila nā Leika a me ka Hekili ma ka puni mua o nā ho'okūkū wae moho, e kū'ē hou ana ia mau hui a 'elua kekahi i kekahi ma ke kahua pā'ani. A ma ia wā e hui pū ai ia mau hui, 'o ia nō ho'i ka wā e pau ai ka ho'omalu 'ia 'ana o Maluhia Honua Meka. He makemake paha ko ke Komikina David Stern e nānā hou i ka hopena ke hālāwai hou ia mau hui 'elua ma ke kahua.

Ua mihi nō 'o Maluhia Honua Meka, akā, 'o ke kanono o ka ho'opa'i ka mea e pono ai, i 'ole 'o ia e hana hou i ia 'ano hana kūpono 'ole.

———

E ho'ouna 'ia mai na ā leka iā māua, 'o ia ho'i 'o Laiana Wong a me Kekeha Solis ma ka pahu leka uila ma lalo nei:

>> kwong@hawaii.edu
>> rsolis@hawaii.edu

a i ‘ole ia, ma ke kelepona:

>> 956-2627 (Laiana)
>> 956-2627 (Kekeha)

This column is coordinated by Kawaihuelani Center for Hawaiian Language at the University of Hawai'i at Mānoa.






 Print   Email   Comment | View 6 Comments   Most Popular   Save   Post   Retweet

COMMENTS
(6)
You must be subscribed to participate in discussions


IN OTHER NEWS
Latest News/Updates