Quantcast

Friday, October 24, 2014         

KAUAKŪKALAHALE


 Print   Email   Comment | View 2 Comments   Most Popular   Save   Post   Retweet

Nā Ho'okūkū 'Ālapa Helene

For Saturday, August 4, 2012

Na Kekeha Solis

POSTED:
LAST UPDATED: 01:56 a.m. HST, Aug 04, 2012



Synopsis: Are only strength and skill promoted at the Olympic Games? Strategy and intelligence are not encouraged? Let the badminton players who were disqualified back in the tournament.

———

Welina e nā hoa makamaka. 'Akahi nō a ho'omaka nā Ho'okūkū ma Lādana i ka Pō'alua nei. A he nui nā kānaka o Hawai'i nei e noho pa'a ana i mua o ke kīwī me ka nānā 'ana i nā 'ālapa e ho'oikaika ana i mea e lilo ai ka makana kula iā lākou. 'O ke kanaka 'au kaulana o kēia au, ua lilo aku nei ka 'umikumamāiwa o ka mekala kula iā ia. 'O Kina a me 'Amelika Hui Pū 'Ia, 'o lāua ka 'oi ma nā mekala i kēia manawa.

He nui paha nā kānaka e ho'ōho ana me ka lana o ka mana'o, e lanakila nā 'ālapa 'Amelika. A maika'i kēlā, akā, 'o ko 'oukou mea kākau, 'a'ohe ulu o ka hoi ke nānā aku i nā Ho'okūkū 'Ālapa Honua. Inā 'o Hawai'i kekahi o nā lāhui kū'oko'a e ho'okūkū ana i ko lākou ikaika a mākaukau ma nā hana 'ālapa, inā ua ulu ka hoi o ko 'oukou mea kākau. 'A'ole ho'i e hihi, ua ho'olilo hewa 'ia 'o Hawai'i i moku'āina no 'Amelika Hui Pū. A no laila, he noho palaka wale iho nō ka hana i mua o ke kīwī ke nānā aku ka 'ohana i ia mau ho'okūkū.

Ho'okahi na'e mea i ulu ai ka hoi i ka Pō'akolu nei, 'o ia ke kāpae 'ia 'ana aku o kekahi mau mea pā'ani hilihili manu 'ewalu. Ua holo ka mana'o o ka 'Ahahui Honua Hilihili Manu, e kāpae 'ia aku 'elua hui Kōlea Hema, ho'okahi hui Kina, a ho'okahi hui 'Inonekia ma muli o ko lākou ku'upau 'ole 'ana e lanakila ai ma ka ho'okūkū a me ka hana 'ana ma ke 'ano e ho'oha'aha'a ai i ia hana 'ālapa. Eia mai ka hana a lākou, e ho'ā'o ana lākou e hā'ule ma kekahi ho'okūkū 'ana i mea e ma'alahi ai ke alahele i ka puni inoa moho. 'Ae, 'o ia wale nō. 'A'ole lākou i 'ai i ka lā'au pāpā 'ia, 'a'ole nō ho'i lākou i kikiki ma kekahi 'ano, ua kāpae 'ia lākou ma muli o ka 'i'ini e lilo ka makana kula iā lākou.

'Eā, wahi a kahiko, a'o i ke koa, e a'o nō i ka holo. A he mau 'ōlelo akamai nō ho'i ia.

A inā ma ke kaua, a e ho'ā'o ana e komo i loko o ka hale kaua o ka 'enemi, a he 'elua wahi e komo ai, 'o kekahi, he wahi ia e kūpale maika'i 'ia ana, a 'o kekahi, he nāwaliwali loa. Ma kahi hea lā e ho'ā'o ai e komo? He makehewa ka hele 'ana ma kahi maika'i o ke kūpale 'ia 'ana, 'o ka make mai koe.

A hō'ike mai nō ho'i 'o KūaPāka'a, 'o ke akamai kekahi mea e lanakila ai, 'a'ole wale nō 'o ka ikaika. Ma kona heihei 'ana me kekahi mau kānaka makua, 'o KūaPāka'a, 'o ia ho'okahi ma kona wa'a, a 'o nā kānaka makua, he 'ewalu lākou. A 'o KūaPāka'a kai lanakila. E nīnau mai paha kekahi, “Pehea lā i lanakila ai ke keiki ho'okahi ma luna o nā kānaka makua he 'ewalu?” Eia ka pane: 'A'ole ma ka ikaika.

'Eā, 'a'ole e kīpaku 'ia nā 'ālapa ma muli o ke akamai o ka no'ono'o. Inā he hiki i ka hui ke hā'ule a holo mua a ma ka puni inoa moho, he pono ke ho'ololi 'ia nā lula. 'O ia ihola.

He mea maika'i nā Ho'okūkū 'Ālapa Helene i wahi e 'ike ai i ka mākaukau a me ka ikaika o nā 'ālapa o nā lāhui like 'ole, akā, 'o ke akamai kekahi mea e ho'okūkū 'ia, a no laila, mai nō a ho'opa'i aku i ke kanaka akamai o ka no'ono'o.

———

E ho'ouna 'ia mai na ā leka iā māua, 'o ia ho'i 'o Laiana Wong a me Kekeha Solis ma ka pahu leka uila ma lalo nei:

>> kwong@hawaii.edu
>> rsolis@hawaii.edu

a i ‘ole ia, ma ke kelepona:

>> 956-2627 (Laiana)
>> 956-2627 (Kekeha)

This column is coordinated by Kawaihuelani Center for Hawaiian Language at the University of Hawai'i at Mānoa.






 Print   Email   Comment | View 2 Comments   Most Popular   Save   Post   Retweet

COMMENTS
(2)
You must be subscribed to participate in discussions


IN OTHER NEWS
Blogs
Small Talk
Handcuffs

Political Radar
Sued

Political Radar
Closer

Warrior Beat
Thursday’s notes

Political Radar
Instrumental