Quantcast

Thursday, November 27, 2014         

KAUAKŪKALAHALE


 Print   Email   Comment | View 2 Comments   Most Popular   Save   Post   Retweet

Pulukeke 'o 'Amelika

For Saturday, September 22, 2012

Na Kekeha Solis

POSTED:



Synopsis: Is the American government really so worried about free speech rights?

———

Welina e nā makamaka puni heluhelu, 'o kahi po'o mana'o e kau a'ela i luna, he 'ōlelo ia, e hō'ike ana i ke 'ano ho'opunipuni o nā luna aupuni o 'Amelika. 'A'ole paha e pū'iwa ko 'oukou no'ono'o, a 'o ka pane mai paha a kekahi, “Kā! He mea ia i maopopo mai kinohi. Pēlā nō ke 'ano o ke kanaka kālai 'āina, a hana politika ho'i.” 'Ae, he 'oia'i'o nō ia, 'oiai, kāka'ikahi nā kānaka kālai'āina 'Amelika ho'opunipuni 'ole. Akā, he mau kānaka make ana paha ka hopena o kēia waha he'e 'ana. A 'o ka mea minamina, he mau ola nō i pō'ino ma muli o ua wahi ki'i 'oni'oni lā. A hiki i kēia lā, he 30 paha kānaka i make aku nei ma nā haunaele. A 'o kekahi, he luna 'Amelika nō, 'o ia ho'i, ka 'elele aupuni o 'Amelika no Libya.

He aha lā kēia ho'opunipuni 'ana o ia mau luna aupuni e make ai ke kanaka? He pili nō ia i ke ki'i 'oni'oni i kapa 'ia 'o ka “Innocence of Muslims.” Wahi a nā luna aupuni, he mea hō'ino nō ua ki'i 'oni'oni lā, akā, 'a'ohe wahi mana o ke aupuni 'Amelika e huki ai a e ho'opa'i ai paha i ka mea nāna i hana. 'O ka mea i pakele ai ua kanaka lā nāna i hana i ia ki'i 'oni'oni, 'o ia ho'i nā pono kīwila o 'Amelika, wahi a lākou luna aupuni.

He mana nō ko nā luna aupuni, akā, ua koho iho nei lākou, 'a'ole e ho'okō aku i ke kānāwai. Ma nā makahiki i ka'a hope aku nei (ma hope mai o ka lā 11 o Kepakemapa o ka makahiki 2001), ua hopu 'ia kekahi mau kānaka no ka 'ōlelo ho'omāke'aka 'ana. He 'ōlelo ho'māke'aka wale nō ia ma ke kahua mokulele. 'O kekahi, he haumāna Pelekane e lele ana mai Maiami aku a i Pelekania. 'Ōlelo pāhenehene a'ela 'o ia, e lawe ana 'o ia i ka pōkā pahū ma luna o ka mokulele. A 'o ia kona mea i hopu 'ia ai. He 'ōlelo ho'omāke'aka ia. 'O ka mea 'āpiki, nānā pono 'ia nā ukana a pau i kēia mau lā. No laila, e 'ike ana nā kia'i i ka 'oia'i'o a me ka 'ole paha o ia 'ōlelo. 'O ka hana kūpono wale nō paha, 'o ia ka noke 'ana aku i ke kueka'a pono i nā ukana a me ka lole paha o ia kanaka.

A i ka lā 21 o 'Aukake, ua hopu 'ia kekahi māka'i koa o Ikalia no ka ho'oweliweli ma ke kekelē 'elua ma hope o kona pāhenehene 'ana he pōkā pahū kāna, 'oiai 'o ia e kū laina ana. He aha ka mea e kau ai ka weli ma ia 'ano pāhenehene 'ana? He koina ka nānā pono 'ia 'ana o nā kānaka a pau a me nā ukana a lākou ma mua o ke e'e 'ana a'e ma luna o ka mokulele. Inā hala ka pōkā pahū i ke kia'i, i hewa iā ia.

'A'ohe kanaka e make ana i ia mau 'ōlelo ho'omāke'aka. 'O ia ki'i 'oni'oni na'e, 'o Innocence of Muslims, pau aku nei he 30 a 'oi iki i ka make, a e pi'i auane'i paha. Inā e kuhi ana kākou, he pono ka hopu 'ana i ke kanaka ho'omāke'aka i ka pōkā pahū, a laila, he pono nō ho'i paha ka hopu 'ia 'ana o ke kanaka nāna i hana iā “Innocence of Muslims,” ua 'oi aku ka 'ino o ka hopena ma mua o ia mau 'ōlelo ho'omāke'aka.

'Eā, 'a'ohe mahalo o ko 'oukou mea kākau i ka ho'oweliweli 'ia mai. Inā 'o ia ke kumu e kāpae 'ole 'ia nei ke ki'i 'oni'oni e 'Amelika, e 'ōlelo pēlā, mai kūpa'a ma hope o kahi 'ōlelo pulukeke, kohu 'ole.

———

This column is coordinated by Kawaihuelani Center for Hawaiian Language at the University of Hawai'i at Mānoa.






 Print   Email   Comment | View 2 Comments   Most Popular   Save   Post   Retweet

COMMENTS
(2)
You must be subscribed to participate in discussions


IN OTHER NEWS
Latest News/Updates