Quantcast

Tuesday, July 29, 2014         

KAUAKŪKALAHALE


 Print   Email   Comment | View 0 Comments   Most Popular   Save   Post   Retweet

Haehae ka manu a Kānealoha ke 'ale nei ka wai

For Saturday, September 29, 2012

Na Kekeha Solis

POSTED:



Synopsis: American leaders need to look to the source.

———

Welina e nā makamaka heluhelu o Kauakūkalahale. 'O ia po'o mana'o e kau a'ela ma luna, no loko mai ia o ka mo'olelo o Kānealoha. He mo'olelo maika'i nō ia e hō'ike ana ē he mea nui ka ho'ohana 'ana i kou no'ono'o kanaka 'ana ma kēia ola honua. 'A'ole e hahai wale aku i kou hoa i ka lele po'o wale aku i loko o ka wai me ka nānā 'ole i ka nui o ka wai. He hana ia e puka ai ia 'ōlelo kaulana, 'o ia ho'i, “'A'ohe ou 'ī mai, 'a'ohe wai o lalo ē.” A 'o kekahi ha'awina nui o ka mo'olelo o Kānealoha, 'o ia ho'i, he pono ka nānā 'ana aku i ke kumu, 'o ia ho'i, nā mo'olelo i ili mai i o kākou nei mai nā kūpuna mai. He mau mo'olelo ia e a'o ai kākou i ka hana akamai a na'auao ho'i e hana ai, a me ka hana hūpō paha a na'aupō ho'i e kapa 'ia ai 'o ka mamo hope loa a Wa'awa'aikina'aupō.

Ma ka mo'olelo o Kānealoha, ua kuhihewa ke ali'i 'o Kalakanihina, na Kānealoha a me kona makuakāne, me Kalalapopoulu i ho'opō'ino i nā lua 'ua'u ma ke kuahiwi, a no laila, he mana'o ko ke ali'i, e 'imi 'ia aku 'o Kānealoha a me kona makuakāne a loa'a, a e pepehi 'ia aku lāua a make. E 'imi aku ana ke ali'i me nā kānaka he mano ka nui ('o ka mano, he 4,000). I ko lākou 'imi 'ana a'e, aia ka makua a me ke keiki ma ke po'o o ka wailele 'o Halulu e pūlehu ana i ka manu. E ka makamaka heluhelu, 'o ia wahi a Kānealoha mā e pūlehu manu ana, he wahi hāiki ke alahele e hō'ea aku ai, a he ho'okahi wale nō kanaka e hiki ke hele aku i ka manawa ho'okahi, a e 'au mai ana 'o ia i ka wai a e hō'ea ana ho'i ka hohonu o ka wai i ka 'ōpū. Ma hope iki mai, 'ike akula 'o Kānealoha i ka ho'omaka o ka wai e 'ale'ale, a he mea maopopo, 'a'ole e 'ale ka wai ke 'ole e loa'a ke kumu, a i ia manawa, ho'opuka a'ela 'o Kānealoha i ia po'o mana'o e kau a'ela ma luna, “Haehae ka manu a Kānealoha ke 'ale nei ka wai” me ka 'ai pū nō i kāna manu me ke kahe 'ana iho o ke koko. A i ka puka 'ana mai o ke kanaka mua o ke ali'i mai kahi hāiki mai, ua lālau a'ela nā lima wīkani o Kānealoha, a pepehi akula 'o ia i ua kanaka lā a make. A pēlā 'o ia i pepehi ai i ia mano kanaka. A 'o ia ihola ia māhele o ka mo'olelo.

'Eā, 'a'ole 'o Kānealoha i hakakā aku me ia mano kanaka ma ke kula pālahalaha, 'a'ole 'o ia i hakakā me nā kānaka 5 a he 10 paha i ka manawa ho'okahi. Ua hakakā pākahi 'o ia me lākou lā. Ma ke akamai o kona no'ono'o kanaka 'o ia i lanakila ai, 'a'ole ma ka ikaika a me ka mākaukau 'o ia wale nō.

A ke kuhi nei ko 'oukou mea kākau, 'a'ole paha like ka hana a ko 'Amelika. 'O ka mea mau paha iā lākou, 'o ia ka ho'ā'o 'ana e lanakila ma ka ikaika a me ka mākaukau, 'o ia wale nō, a 'o ke akamai a me ka na'auao, he mau mea 'ole paha ia iā lākou.

Pēlā 'o 'Amelika i hana ai ma ke kaua 'o Wiekanama a me kekahi mau kaua ‘ē a'e paha kekahi. Inā paha i nānā nā luna o 'Amelika o ia wā i ke kumu, inā paha 'a'ole i nui loa nā koa 'Amelika i make māinoino ma ia kaua.

(E ho'omau 'ia.)

———

E ho'ouna 'ia mai na ā leka iā māua, 'o ia ho'i 'o Laiana Wong a me Kekeha Solis ma ka pahu leka uila ma lalo nei:

>> kwong@hawaii.edu
>> rsolis@hawaii.edu

a i ‘ole ia, ma ke kelepona:

>> 956-2627 (Laiana)
>> 956-2627 (Kekeha)

This column is coordinated by Kawaihuelani Center for Hawaiian Language at the University of Hawai'i at Mānoa.






 Print   Email   Comment | View 0 Comments   Most Popular   Save   Post   Retweet

COMMENTS
(0)
You must be subscribed to participate in discussions
By participating in online discussions you acknowledge that you have agreed to the TERMS OF SERVICE. An insightful discussion of ideas and viewpoints is encouraged, but comments must be civil and in good taste, with no personal attacks. Because only subscribers are allowed to comment, we have your personal information and are able to contact you. If your comments are inappropriate, you may receive a warning, and if you persist with such comments you may be banned from posting. To report comments that you believe do not follow our guidelines, email commentfeedback@staradvertiser.com.
Leave a comment

Please login to leave a comment.
IN OTHER NEWS
Latest News/Updates
Blogs
Political Radar
`My side’

Political Radar
‘He reminds me of me’

Bionic Reporter
Needing a new knee

Warrior Beat
Monday musings

Small Talk
Burning money

Political Radar
On policy

Warrior Beat
Apple fallout