Quantcast

Friday, October 24, 2014         

KAUAKUKALAHALE


 Print   Email   Comment | View 1 Comments   Most Popular   Save   Post   Retweet

He Ho'oheno No Keali‘i

Na Loloku

POSTED:



Synopsis: Great love, affection and admiration of many for a kama of Hawai'i who is deeply respected and loved, Keali'i Reichel.

———

I Maui-nui-a-Kama i 'oli'oli ai kānaka no ke kupa nona ka inoa i kaulana mai kahi pae a kahi pae aku o Hawai'i nei a puni, a ma 'ō a 'ō ho'i o ka moana nui o Kanaloa, 'a'ohe he wahi kū'ono li'ili'i i lohe 'ole 'ia ai nei inoa e mapu mau mai ana me ke 'ala kaluhea o Kamaile 'o ia ho'i 'o Keali'i Reichel. No ka hō'ea 'ana a'e nei nō o lolokū o Kānehoalani e pili ho'i me ka piko kuahiwi e kāhiko nei i ke kapa hau o Poli'ahu 'o ia ho'i ka piha 'ana mai nei o nā makahiki he kanalima iā ia, ke kumu ho'i i mālama 'ia ai nei wahi ho'olaule'a nona.

I ua pā'ina nei i 'ike maka 'ia ai ke aloha o kona 'ohana lei pua pīkake, kāna kōko'olua i ka wai 'olu o ka punahele, kāna hālau i ke 'ala o Kamaile a me nā hoa aloha 'ē a'e kekahi. A e like me kāna mea e kaulana nei 'o ia ho'i ka haku mele 'ana, ua oli a hula 'ia ho'i 'ekolu mele i haku 'ia nona, i makana ho'i e mahalo ai i kona alo. He mau mele ia e hō'ike ana i ka waiwai o kāna a'o 'ana ma o kona kūlana he ho'okani pila, he haku mele, he kumu hula a he kanaka pono ho'oheno kupuna. Peia pū me kona 'ano waipahē mau i ka ho'omakamaka. No ia kumu i noi 'ia ai he wahi lumi li'ili'i o Kauakūkalahale, e kūkala 'ia ai ho'i nā puana ho'oheno ma Kauhale o Ka Lāhui.

Na ka hālau ke mele mua i lalo nei, na KuhikuhipuuoneonaaliioKohala ka lua o nā mele, a na Keawe me Tracie Lopes ke kolu o nā mele.

 

———

Aia i luna ke onaona o uka
Ke kūpaoa hiehie o ka nāhele
E hanu lipo i ke kaluhea
Ka maile lau nui, ka maile lau li'i
Ne'epapa nā lau, nā lālā kani
A lū ka hua o ka maile
Kupu a'ela ka 'āhihi milia
Ho'ohihi i ke aloha a mau loa
Eia ka puana, nou neia leo
Mapu mai ke 'ala o ka maile

———

Aia i Piilani
Hele-a-ka-la Kanehoalani
I Wailuku paa ai te aloha Punana le'i i ka nui manu
A ho'i i ka poli a'o Pele Uumi i ka hanu i ola kaua!
Pa'ia kuu poli wawae
E ke kaha one o Kamaile
I Waihee ka ua apaapaa Hoonaueue i ka puko'a
Hauwanawana kanaenae E ho'i pili me kalahikiola
Hauwanawana kanaenae E hoi pili me kalahikiola Na puu haele lua o Kohala
E ola la, e ola la, a ihi!
No Poliahu, he inoa

 

———

K aluhea e ke 'ala o ka maile
E luhe maila i wehi e lei ai
A lokele i ka piko o ka 'āina
L aka ai Hawai'i-nui-kuauli
I ka hikina me Kānehoalani
' O lolokū i ka la'i 'ōpua
I lama ha'a mao 'ole a i Lehua
R ei ana i te 'ara pua pītate
E kāhiko nani nei i ka poli
I 'ahu ma'ema'e la i ka 'ōnohi
C honi ai i ta ho'oheno tupuna
H e pou pōkole paha 'oe no Pi'ilani
E kū ki'eki'e ai na'e 'o Haleola
L a'i mau e ka malu hale o Keali'i

He Inoa No Keali'i Reichel

This column is coordinated by Kawaihuelani Center for Hawaiian Language at the University of Hawai'i at Mānoa.






 Print   Email   Comment | View 1 Comments   Most Popular   Save   Post   Retweet

COMMENTS
(1)
You must be subscribed to participate in discussions


IN OTHER NEWS
Latest News/Updates
Blogs