Quantcast

Friday, August 01, 2014         

KAUAKŪKALAHALE


 Print   Email   Comment | View 14 Comments   Most Popular   Save   Post   Retweet

Ua hala i ke ao polohiwa a Käne

For Saturday, January 5, 2013

Na ‘Analu Perez

POSTED:



Synopsis: One of our leaders, Soli Niheu, has passed away. His funeral services begin at noon today at ‘Iolani Palace.

———

Aloha mai käkou e nä hoa makamaka.

I këia lä, e kau ana ka hali'a aloha iä Soli Niheu. He Hawai'i Alaka'i 'o ia i küpa'a ma hope o ka 'äina a me ke kanaka. Ua hala 'o Soli ma ka lä 30 o Nowemapa o ka makahiki 2012 ma Honolulu. No Ni'ihau mai ka 'ohana o Soli, a e noho ana 'o ia i Waimea, Hawai'i.

He koa küpa'a ua Soli nei no ka lähui, a he leo nui kona no ke kü'oko'a o ke aupuni o Hawai'i. A he alaka'i 'o ia ma ka 'imi 'ana i ke ea o ka 'äina a me ke kanaka no nä makahiki he nui. 'O ia kekahi o nä koa mua i ho'oulu aku i nä känaka e kü'ë a e 'imi i ke kü'oko'a. A he mea ma'a mau iä Soli ka ho'omana'o 'ana iä käkou e kü'ë mau loa, 'o käna mäkia ia.

Nui kona mau manawa i hopu 'ia ai e ka mäka'i, he 40 a emi iho paha, akä, i hopu 'ia 'o ia no kona küpa'a 'ana no ka pono o nä Hawai'i. He kanaka 'onipa'a 'o Soli, 'a'ole 'o ia i maka'u i ke küpa'a 'ana no kona mana'o.

Nui nä manawa o ke aupuni haole i ho'ä'o ai e ho'opio i ke ahi a Soli, akä nö na'e, ua lapalapa loa käna ahi mai kahi palena a i kahi palena o ka pae'äina nei a me ka 'äina 'ë kekahi.

Ma muli o käna hana maika'i wale no ka pono o käkou, e mau ana ka 'i'ini o ka lähui nei no ka ho'i 'ana mai o ke ea o ka 'äina. Ua pio ke kukui o Soli Niheu, 'a'ole na'e i pio ka makemake o ka lähui i ka pono a me ke kü'oko'a nö ho'i. Ua 'ölelo mau 'o Soli iä käkou, “E kü'ë käkou a mau loa ... mai poina ka makemake o nä küpuna. Aia nö a maopopo iä käkou ka makemake o nä küpuna, 'o ia ho'i ke kü'oko'a, a laila, e holo mua käkou, 'o ia ho'i ka lähui Hawai'i.” Mai poina käkou i nä mana'o akamai o Soli Niheu, he kanaka 'o ia i kü maoli i ke aloha 'äina 'oia'i'o.

Ua ha'alele mai 'o Soli i hope nei, i käna mau keiki, 'o Kala'iokamalino, 'o Kalamaoka'äina, 'o Aloha'äina Harawira, 'o Kekahikoa a 'o Keali'ikauila; i käna mau mo'opuna, 'o Iakona Welokïheiakea'eloa, 'o Kapunaheleokapu'uwai, 'o Welokïheiakea'eloa a 'o Keaolani; kona mau palala, 'o David Niheu a me Luther “Hoppy” Niheu; a me kona tita, 'o Karen Games.

Aia kona ho'olewa ma ka hola 'umikumamälua o këia lä, ka lä 'elima o Ianuali, ma ka 'ahu o ka Hale Ali'i 'o 'Iolani. E hui pü käkou i laila no ka ho'ohiwahiwa 'ana aku i kekahi o nä Hawai'i Alaka'i, Soli Niheu.

(Mahalo a nui, e 'Analü, no ke käkau 'ana mai i ka mo'olelo i luna a'e nei no Soli Niheu ma ka 'ölelo a ko käkou mau küpuna. Ke hä'awi aku nei mäua, nä luna ho'oponopono, i ko mäua aloha i ka 'ohana i waiho 'ia ma ka honua nei. He Hawai'i Alaka'i 'oia'i'o nö 'o ia. Ua 'ike 'ë paha 'oukou e nä makamaka heluhelu i ka nui o käna mau hana no ka pono o kona mau hoa kanaka. L.H.)

———

E ho'ouna 'ia mai na ä leka iä mäua, 'o ia ho'i 'o Laiana Wong a me Kekeha Solis ma ka pahu leka uila ma lalo nei:

>> kwong@hawaii.edu
>> rsolis@hawaii.edu

a i ‘ole ia, ma ke kelepona:

>> 956-2627 (Laiana)
>> 956-2627 (Kekeha)

This column is coordinated by Kawaihuelani Center for Hawaiian Language at the University of Hawai'i at Mänoa.






 Print   Email   Comment | View 14 Comments   Most Popular   Save   Post   Retweet

COMMENTS
(14)
You must be subscribed to participate in discussions


IN OTHER NEWS
Blogs
Political Radar
Maximum Ige

Political Radar
Maximum Abercrombie

Political Radar
-1.8%

Political Radar
`Trust’

Warrior Beat
Pre-camp notes

The Green Leaf
Marine debris art