Quantcast

Wednesday, October 01, 2014         

KAUAKŪKALAHALE


 Print   Email   Comment | View 52 Comments   Most Popular   Save   Post   Retweet

Nānā ka maka; ho'olohe ka pepeiao; kāko'o ke kanaka

For Saturday, February 16, 2013

Na Kekeha Solis

POSTED:



Synopsis: A new bill in the Senate, SB 1235, supports Hawaiian-language television.

———

Aloha mai kākou e nā makamaka heluhelu o Kauakūkalahale. Eia mai kahi Pila Kenekoa e maka'ala ai a e kāko'o ai. 'Akahi nō a lohe mai māua ma Kauakūkalahale i kēia pila hou i ka pule nei i hala. 'O ka Pila Kenekoa 1235 ia. A he pila ia e ho'oka'awale ana i kahi māhele o nā lilo e loa'a ana ma o ka 'auhau kīwī uea no ka hui 'o Makauila. Ua ho'olauna 'ia a'ela ua Pila Kenekoa 1235 ala i ka 'Aha Kenekoa i ka lā 24 o Ianuali o kēia makahiki nei. Akā, ma muli paha o ka moloā o ko 'oukou mea kākau a me ka nui o ka huluhulu i loko o ka pepeiao, 'a'ole i lohe 'ia no nei pila a i ka pule nei i hala.

I ka Pō'ahā nei, ua kama'ilio 'ia ihola nei pila ma ke Kōmike Ho'omalu Kanaka Kemu me 'Oihana Kālepa (Commerce and Consumer Protection) a 'āpono 'ia iho nei e lākou me nā ho'ololi 'ōlelo pāku'i. A no laila, he mea maika'i paha ia, 'oiai, 'o Makauila, he hui ia nāna e hana nei i nā mea Hawai'i like 'ole no ke kīwī i mea e lilo ai ka 'ōlelo Hawai'i i mea ma'a mau ma ko kākou mau nohona ma o ka hana a me ka ho'olaha 'ana i nā mea like 'ole e pili ana i ka ho'ona'auao Kanaka Maoli, ka 'ōlelo Hawai'i, a me ka hana a ka po'e Hawai'i.

He mau hana maika'i aku nei kā ka hui 'o Makauila. Nāna i ho'okumu i ke kānela 'ŌiwiTV. Ma ia kānela, he hiki ke nānā 'ia nā mea like 'ole e pili ana i ka Hawai'i ma ka 'ōlelo Hawai'i a me ka 'ōlelo haole ma ke kānela 326 o ke Kīwī Uea (Oceanic) a me ka pūnaewele, www.oiwi.tv. A na Makauila nō ho'i i hana iā 'Āha'i 'Ōlelo Ola, ka polokalamu nūhou mua ma ka 'ōlelo Hawai'i ma luna o ke kānela kīwī 'ano nui. A ua ho'okumu 'ia nō ho'i kahi polokalamu a'o i ka hana ho'olaha polokalamu kīwī a 'ano 'ē a'e paha no ke Kanaka Maoli.

Ke nānā aku, he maika'i ke kāko'o 'ana i kēia hui 'o Makauila, i mau ai kāna hana maika'i. A no laila, ke lohe paha 'oukou, e nā makamaka heluhelu, i ke kūkākūkā 'ia 'ana o nei pila ma ka 'Aha Kenekoa a ma kahi kōmike paha o ia 'Aha, e hele aku me ke kāko'o 'ana i mea e laha ai ka 'ōlelo Hawai'i a me nā mea 'ē a'e e pili ana i ka Hawai'i.

He kāko'o nō ko 'oukou mea kākau i ka Pila Kenekoa 1235 e lilo ana kahi pu'u kālā iā Makauila, me ka mana'o, ma kēia hope aku, ke loa'a kekahi hui e makemake ana e hana i kekahi polokalamu kīwī a mea 'ē a'e paha, e kōkua a kāko'o ana 'o Makauila ma ka ho'oka'awale 'ana i pu'u kālā a me ka 'ae 'ana paha e ho'ohana i nā pono. A me ka mana'o nō ho'i, e paipai a e koi aku paha ke aupuni i nā kānela a pau o Hawai'i, e kāko'o i ka 'ōlelo Hawai'i ma ka ho'olele 'ana i nā polokalamu a me nā ho'olaha ma ka 'ōlelo Hawai'i. A he mea nui ia no kekahi mau kumu, eia na'e kākou i ka hopena o kahi kolamu a kākou. A no laila, no kekahi lā paha ia. A e 'olu'olu, e kāko'o i ka Pila Kenekoa 1235 (SB1235).

———

E ho'ouna 'ia mai na ā leka iā māua, 'o ia ho'i 'o Laiana Wong a me Kekeha Solis ma ka pahu leka uila ma lalo nei:

>> kwong@hawaii.edu
>> rsolis@hawaii.edu

a i ‘ole ia, ma ke kelepona:

>> 956-2627 (Laiana)
>> 956-2627 (Kekeha)

This column is coordinated by Kawaihuelani Center for Hawaiian Language at the University of Hawai'i at Mānoa.






 Print   Email   Comment | View 52 Comments   Most Popular   Save   Post   Retweet

COMMENTS
(52)
You must be subscribed to participate in discussions


IN OTHER NEWS
Latest News/Updates