Quantcast
  

Sunday, April 20, 2014         

KAUAKŪKALAHALE


 Print   Email   Comment | View 2 Comments   Most Popular   Save   Post   Retweet

E kūpa'a ma hope o Nā Koa Ānuenue

For Saturday, August 31, 2013

Na Kekeha Solis

POSTED:



Synopsis: The Rainbow Warriors lost their first game. But let’s show our full support all the way, no matter what happens.

———

Aloha mai e nā hoa puni kinipōpō pekupeku a me nā hoa kāko'o i nā Koa Ānuenue.

Ua pau ihola ka ho'okūkū mua o ke kau o nā Koa Ānuenue, a 'a'ole i kō ka makemake. Ua hā'ule ihola lākou iā Kaleponi Hema ma ka helu 'ai he 30 i ka 13. A 'o ka mea ma'a mau paha, e lohe 'ia nā leo e namunamu ana, “Inā i komo kekahi 'alihikūlele o nā Ānuenue, inā ua lanakila lākou.” “Inā i mea 'o mea, inā ua lanakila lākou.” A pēlā aku. Ua maopopo i nā kūpuna o kākou, he i'a laka wale nō lā ho'i ka 'ina, 'o ia ho'i, he ma'alahi ka 'ōlelo 'ana ma hope o ka hana, “Inā i mea, inā ua 'oko'a ka hopena.”

E kāpae 'ia aku ia 'ano 'ōlelo, a e kāko'o kākou i nā Koa Ānuenue a me kā lākou kumu a'o 'o Norm Chow. 'Eā, 'o ka hui helu 24 'o USC a 'o Hawai'i, 'o ka hui helu 111 ia, a e 'oi aku ana 'o Hawai'i iā Kaleponi Hema no kekahi wā o ka hapahā 'elua, he 5 i ka 3. A i ke kani 'ana aku o ka pū, he 30 wale nō 'ai a Kaleponi Hema. 'O ka 'ao'ao kūpale o Hawai'i, he pā pōhaku pa'a loa ia, 'a'ole e hiolo i ke ōla'i ikaika loa. He mau mea nō kā kākou e mahalo ai i loko nō o ka hā'ule 'ana.

Ua nui paha ka leo o kekahi ma hope o ka 'apo 'ana aku o Kaleponi Hema i ka pōpō a Taylor Graham i ka lua a me ke kolu paha o ka manawa, “E ha'alele 'o Graham, a e komo ka lua o ka 'alihikūlele.”

A i ka hā o ka 'apo 'ana aku o Kaleponi Hema i ka pōpō a Graham, ua hā ihola paha ka leo i ka 'uā 'ana a'e, “E kuapo 'ia aku ka 'alihikūlele.” Akā, e mahalo 'ia ke kūpa'a 'ana aku o Chow ma hope o Graham, ua holo kona mana'o, 'o Graham ka 'alihikūlele, a e hā'awi 'ia ana ka manawa e hele ai 'o ia a ma'a.

'O ka mea maopopo paha, inā 'o kāu keiki ke 'alihikūlele, a huki 'ia a'e 'o ia ma hope o ka 'apo 'ia 'ana aku o kāna pōpō e ka hoa paio ma hope o ka lua a me ke kolu paha o ka manawa, e 'uā lua 'ole ana ka leo, “No ke aha 'o ia i huki 'ino 'ia ai?” “E hā'awi i manawa nona e ma'a ai i ka pā'ani 'ana!” “E hilina'i aku 'oe i kāu mea i koho ai!”

'Eā, ua ho'omanawanui 'o Chow, a i nā kekona hope loa, ua 'ike 'ia ka hua o ia ho'omanawanui 'ana ma ka nou 'ana aku o Graham iā Keith Kirkwood i ka pōpō, he 60 'īā ka lō'ihi, a loa'a ai ka 'ai holo. Ke kuhi nei ko 'oukou mea kākau, e nui ana nā 'ai holo e like me ia ma kēia kau pōpō peku nei. A ke hui pū ia 'ao'ao kūlele me ka hana ikaika wale a ka 'ao'ao kūpale, e luku wale 'ia aku nō nā hoa paio o Hawai'i, 'a'ohe mea nāna e pa'i kona po'o.

Hau'oli loa ko 'oukou mea kākau i ka hai 'ia 'ana o Chow, 'o ia ke kumu a'o o nā Koa Ānuenue. He pono ke hana like ma ka hai 'ia 'ana o ka pelekikena hou o ke Kula Nui o Hawai'i. 'A'ole e koho wale 'ia ke kanaka o ka 'āina 'ē. E koho 'ia ke kupa o kēia 'āina, a 'oi loa aku paha ke Kanaka Maoli.

Ua nui loa nā makahiki o ka ho'okele 'ia 'ana iho o ke Kula Nui o Hawai'i ma lalo o ka haole o ka 'āina 'ē, a 'a'ole i holo pono loa. He au hou kēia a no laila, 'a'ole e hala ka 'ulu i ke alo.

———

This column is coordinated by Kawaihuelani Center for Hawaiian Language at the University of Hawai'i at Mānoa.






 Print   Email   Comment | View 2 Comments   Most Popular   Save   Post   Retweet

COMMENTS
(2)
You must be subscribed to participate in discussions
By participating in online discussions you acknowledge that you have agreed to the TERMS OF SERVICE. An insightful discussion of ideas and viewpoints is encouraged, but comments must be civil and in good taste, with no personal attacks. Because only subscribers are allowed to comment, we have your personal information and are able to contact you. If your comments are inappropriate, you may receive a warning, and if you persist with such comments you may be banned from posting. To report comments that you believe do not follow our guidelines, email commentfeedback@staradvertiser.com.
Leave a comment

Please login to leave a comment.
Ken_Conklin wrote:
Yes, we can all stand behind the Rainbow Warriors, who performed well against a highly rated opponent in the first football game of the season, especially during the first quarter. Hip, hip, hooray! But why are the bottom two paragraphs devoted to a very different topic; namely, the selection of a new President for UH? And on what basis does the author say the new UH President should be a multigeneration native of these islands, and in particular, should be an ethnic Hawaiian? Is the author claiming that Norm Chow's genetic heritage as someone whose ancestors played ulumaika during makahiki is somehow related to his prowess as a football coach? [Granted, success at ulumaika might be related to success as a field-goal kicker, since the ball must go between the uprights!] Is the author claiming that having Hawaiian native ancestry somehow makes a person more qualified to be UH President? OMG.
on August 31,2013 | 02:44AM
DiverDave wrote:
Well Dr. Conklin, with some folks it's just all about race.
on August 31,2013 | 06:46AM
IN OTHER NEWS