Quantcast

Thursday, September 18, 2014         

KAUAKŪKALAHALE


 Print   Email   Comment | View 3 Comments   Most Popular   Save   Post   Retweet

'O Kana'iolo 'ala'ala palu paha ka pololei

Na Kekeha Solis

POSTED:



Synopsis: The testimonies shared at the Native Hawaiian Recognition meetings truly proved that the Native Hawaiian Roll Commission, Kana'iolowalu, is not working for what the people want.

 

'Akahi nō a pau ka hālāwai hō'ike mana'o hope loa a ke aupuni pekelala o 'Amelika Hu Pū 'Ia i mālama iho nei i ka Pō'alua nei. He mau hālāwai ia kahi e hō'ike ai i ka mana'o no ke komo 'ana o 'Amelika Hui Pū i loko o ka hana e pa'a ai ke aupuni kū'oko'a o ka lāhui Kanaka Maoli o Hawai'i nei. A 'o kekahi mea maika'i o ia mau hālāwai, ua mōakāka, 'a'ole makemake 'ia nā mana'o o 'Amelika Hui Pū ma ke kūkulu hou 'ana i ke aupuni a ua 'ike maka nā 'elele o ke aupuni pekelala.

A 'o ia ke kumu o ia po'o mana'o e kau a'ela i luna. 'A'ole i kūpono 'o Kana'iolowalu. A no kona 'ano a me kona mau pahuhopu e kū nei, e aho paha kona kapa 'ia 'ana 'o Kana'iolo 'ala'ala palu, no ka mea, he mea ia e holo ai kahi 'ōlelo kahiko, 'o ia ho'i, “Ahu ka 'ala'ala palu.” A 'o ka mana'o o ia 'ōlelo mai nā kūpuna mai, 'a'ohe waiwai iki o kahi mea. A pēlā nō 'o Kana'iolowalu e kū nei. 'O ka mana'o o olowalu, 'o ia ka hana pū 'ana, ke kani 'ana o nā leo he nui lehulehu i ka wā like, a me ka mana'o like paha, a no ka pahuhopu like nō paha. A 'o ia paha ka mea e kuhi nei ko 'oukou mea kākau, 'a'ole i kūpono ke kapa 'ia 'ana o ia papahana 'o Kana'iolowalu, 'oiai, i ka lohe 'ana i nā mana'o like 'ole i hō'ike 'ia aku nei ma ia mau hālāwai hō'ike mana'o, 'a'ole i olowalu nā leo no ka hana pū 'ana me 'Amelika Hui Pū 'Ia no ke ea o kākou. 'A'ole loa. A no laila e kau a'e nei kahi inoa hou ma luna, 'o ia ho'i, 'o Kana'iolo 'ala'ala palu.

Ho'okahi paha ala e pa'a pono ai ia inoa 'o Kana'iolowalu. A 'o ia ka loli 'ana o kona 'ano, ka hana a me nā pahuhopu, a like loa me ka mana'o o ka hapanui loa o nā kānaka i hō'ike mana'o aku nei ma ia mau hālāwai. Inā pēlā, a laila, he olowalu nō paha. E nānā aku paha i kahi wikiō ma ka YouTube, kahi e hō'ike mana'o ana 'o Kaleikoa Kaeo no ka pono 'ole o Kana'iolowalu. Eia mai ka inoa o ia wikiō “Kaleikoa Kaeo Maui OHA Mtg 051514 maui808films.” (Mahalo iā 'oe e Pono Kealoha no ke kau 'ana i ia wikiō.) E hele aku i ka pūnaewele a e nānā.

A no ia mau hālāwai hō'ike mana'o, he nui ka pilikia. 'O kekahi, he 'ekolu wale nō hola o kēlā me kēia hālāwai. A pau he 30 minuke i ka wehewehe 'ana o nā 'elele. No laila, he 'elua wale nō hola me ka hapa i koe. A 'o ka mea minamina loa, 'o ia ko Kahului, ua nui loa nā kānaka i hiki 'ole ke hō'ike mana'o i ke kani 'ana o ka hola 9:00, ka piha 'ana ho'i o ke kolu o ka hola. Akā, 'o nā kãnaka i hō'ike mana'o, ua nani wale. Ke lana nei ka mana'o, e hō'ike hou 'ia ma luna o ke kīwī ma ke kānela 49, e hele i olelo.org no ka 'ike.

Mahalo a nui e nā kānaka i hō'ike mana'o ma nā hālāwai, a inā 'a'ole 'oe i hō'ike mana'o, he hiki iā 'oe ke kākau leka a ho'ouna ma o ka leka ma ka helu wahi: Office of the Secretary, Department of the Interior, Room 7329, 1849 C Street NW, Washington DC 20240 (e ho'okomo 'ia ka helu hō'oia 1090-AB05 i loko o ke kino o ka leka, a e ho'ouna ‘ia paha ma ka pūnaewele ma www.regulations.gov.

———

E ho'ouna 'ia mai na ā leka iā māua, 'o ia ho'i 'o Laiana Wong a me Kekeha Solis ma ka pahu leka uila ma lalo nei:

>> kwong@hawaii.edu

>> rsolis@hawaii.edu

a i ‘ole ia, ma ke kelepona:

>> 956-2627 (Laiana)

>> 956-2627 (Kekeha)

This column is coordinated by Kawaihuelani Center for Hawaiian Language at the University of Hawai'i at Mānoa.






 Print   Email   Comment | View 3 Comments   Most Popular   Save   Post   Retweet

COMMENTS
(3)
You must be subscribed to participate in discussions


IN OTHER NEWS