A‘ohe hana nui ke alu ‘ia

Synopsis: The beginning of Norm Chow’s building of the legacy of the Rainbow Warriors. Let’s hope the trend continues in the following years of his contract.

———

Aloha kākou e nā makamaka puni pā'ani pōpō pekupeku Koa Ānuenue, mai ka mokupuni nui o Keawe a i ka moku kā'ili lā o lalo ē. 'O ka Pō'akolu nei ka lā mua e hiki ai i nā mea pā'ani pōpō peku o nā kula ki'eki'e ke pūlima i nā leka ho'ohiki kulanui. 'O ka mea pōmaika'i, he 'elua mea pā'ani o nā mea pā'ani 'oi he 10 o Hawai'i nei, ua pa'a ko lāua mana'o e lilo i Koa Ānuenue, 'o ia nō 'o Steven Lakalaka o Punahou lāua 'o Kiha Sai o Kamehameha.

A 'o kahi mea minamina, ua ha'i nō kekahi mea pā'ani o ke Kula 'o Kamehameha, 'o Taylor Taliulu, e lilo nō ho'i 'o ia i Koa Ānuenue, akā, loli hou ihola kona mana'o a pa'a loa, e hakakā ana 'o ia ma ke kahua pā'ani no ka pono o Wakinekona Moku'āina. A 'o ka mea paha i hiki ai ke loli kona mana'o, 'a'ole 'o ia i ho'opuka i ia 'ōlelo mai kahiko mai, 'o ia ho'i, “Pau Pele, pau manō.” Akā, 'a'ohe pilikia o ia, 'oiai, ua lilo 'ē 'o Taliulu iā Wakinekona Moku'āina i ka wā a Norm Chow lāua 'o Philip Raushcer i ho'owaliwali ai iā ia a hei ihola i ka 'upena. Akā, i ke ao 'ana a'e o ka Pō'akolu nei, wehe akula ua uhu lā i ka hohonu. Aloha nō, 'o ka uhu kā'alo maka wale nō ia.

A 'o kekahi mea pā'ani i pūlima iho nei no Hawai'i, 'o ia 'o Benetton Fonua o Kahuku. I ke kau pōpō peku i hala iho nei, ua koho 'ia 'o Fonua e ka Hōkū Avalataisa, 'o ia ka mea pā'ani kūpale 'oi o ka makahiki.

He mau mea kā lākou o ka noho pa'a 'ana ma Hawai'i nei e pā'ani 'ālapa ai. 'O ka mea nui loa paha, 'o ia nō ke po'o ka'i hou, 'o ia ho'i, 'o Norm Chow. Ma muli o kona mo'olelo ma ke kahua pā'ani a ma waho nō ho'i o ke kahua pā'ani i hei ai ia mau ulua. A 'o ka noke 'ana i ka ho'ohei 'ana i nā ulua kāpapa o ka moana o Hawai'i nei ka mea e pono ai ka lilo 'ana o Hawai'i, 'o ia kekahi ma ke kū'ē 'ana no ka inoa moho o kekahi o nā Ipu kaulana.

Ua nui nō nā keiki o Hawai'i i hele aku nei i ka 'āina 'ē no ka pā'ani 'ana i ke kinipōpō pekupeku ma nā kulanui o laila, a holo mua loa nō a i ka wā e puka ai mai ke kulanui mai, 'o ka lilo a'ela nō ia i mea pā'ani loea. A ke mana'o nei ko 'oukou mea kākau, inā i noho pa'a ia mau mea pā'ani ma Hawai'i nei a pā'ani ihola nō nā Koa Ānuenue, inā ua lilo iā Hawai'i kekahi mau inoa moho. A 'o Chow ke po'o ka'i, a he nui nā keiki kā'e'a'e'a o Hawai'i e pā'ani no Hawai'i, 'a'ohe mea nāna e pa'i i ke po'o o nā Koa Ānuenue.

'O ka hā'awi aloha nō ho'i i nā keiki e pā'ani ana no nā kulanui ma ka 'āina 'ē, he koho maika'i nō ho'i ia. He wā ia e māka'ika'i aku ai i nā wahi like 'ole o ka honua nei. A he nui nō ho'i nā mea e a'o ai. A 'o ka mea e lana nei ka mana'o, e ho'i mai nō lakou i Hawai'i nei no ke kōkua 'ana i ko Hawai'i ma kēia hope aku.

E ho'ōho kākou me ka leo nui no nā Koa Ānuenue ke ho'omaka ke kau hou me ka ho'omanawanui pū 'ana iho i kahi wā, 'oiai, he ho'omaka kēia. 'O ke aloha nō iā 'oukou, e nā makamaka heluhelu.

———

E ho'ouna 'ia mai na ā leka iā māua, 'o ia ho'i 'o Laiana Wong a me Kekeha Solis ma ka pahu leka uila ma lalo nei:

>> kwong@hawaii.edu
>> rsolis@hawaii.edu

a i ‘ole ia, ma ke kelepona:

>> 956-2627 (Laiana)
>> 956-2627 (Kekeha)

This column is coordinated by Kawaihuelani Center for Hawaiian Language at the University of Hawai'i at Mānoa.