Quantcast

Sunday, October 19, 2014         

KAUAKŪKALAHALE


 Print   Email   Comment | View 5 Comments   Most Popular   Save   Post   Retweet

Hawai'i Pono'ī

For Saturday, June 16, 2012

Na Kekeha Solis

POSTED:



Synopsis: Discussion of the national anthem, Hawai'i Pono'ī and Kamehameha I and other good ali'i and mō'i.

———

Aloha mai kākou e nā makamaka heluhelu. 'O ia po'o mana'o e kau a'ela i luna, 'o ia nō ka inoa o ke mele lāhui a ka Mō'ī Kalākaua i haku ai. A he mele lāhui ia e hīmeni 'ia nei a hiki i kēia lā. Ua lilo ho'i ua mele nei 'o ia ke mele aupuni 'o ka moku'āina 'o Hawai'i.

Eia mai kahi mo'olelo i loa'a mai nei i ko 'oukou mea kākau ma kekahi nūpepa kahiko, no ka mana'o o kekahi po'e 'enemi o ka lāhui Hawai'i, e ho'ololi 'ia nā hua 'ōlelo o ua mele lāhui nei, 'o ia ho'i, e kāpae 'ia nā 'ōlelo pili ali'i. Penei ka mo'olelo: “Moe lolii iho nei ka manao o ka nupepa namu pahemo kakahiaka o ka poai hoohuiaina a i ka Poakahi i hala, owaka ae la e hoololiia ka na olelo o ke mele lahui “Hawaii Ponoi.” O ke kumu ka, ua kupono ole na olelo no keia au, a he mea pono ke kapae ae i na olelo pili alii. E mau no ka ka leo, o na olelo no ke hoololi ae, me ko lakou manao e apoia aku ana e ka lahui no lakou ke one oiwi a lakou i pakaha iho la” (Ka Makaainana, Ianuali 15, 1894).

'Eā, inā i 'ae aku ko kākou mau kūpuna i ia ho'ololi 'ia 'ana, inā he mele lāhui hou kā kākou e hīmeni ai i kēia mau lā. 'A'ole na'e i pū'iwa ka mana'o o ko 'oukou mea kākau i ka mo'olelo o ka Makaainana ma luna a'e nei, pēlā nō ka makemake o ia mau haole i pākaha ihola i ke one hānau o kākou. He makemake e holoi a ho'onalowale 'ia aku ka mo'olelo o kākou a me kā lākou hana kū i ka hewa.

'O kekahi kumu e kau a'e nei ia po'o mana'o ma luna, 'o ka Pō'akahi nei, 'o ia nō ka lā kulāia e ho'omana'o ai iā Kamehameha I, ke Kupuna Ali'i na'i 'āina. 'O Hawai'i Pono'ī, he mele ia e ho'ohanohano ana i kekahi o nā Kamehameha, iā Kamehameha I nō paha. A he mea maopopo wale, he mau hana maika'i 'ole kāna, akā, he mau hana maika'i a kūpono nō ho'i no nā kānaka, e like me ia kānāwai kaulana loa, 'o ia ho'i, ke Kānāwai Māmalahoe. Inā e koho ko 'oukou mea kākau i ke alaka'i 'oi ma waena o Kamehameha I a me nā pelekikena a pau o 'Amelika Hui Pū 'Ia, 'o ka Lani Kamehameha nō ke alaka'i a ko 'oukou mea kākau e koho ai.

A 'o kekahi mea a kākou e hīmeni ha'aheo ai iā Hawai'i Pono'ī, ua lilo ua mele nei i hō'ailona no nā Ali'i a Mō'ī kūpono o ke au i hala. 'A'ole nō lākou e helu papa 'ia ma kēia mo'olelo nei, 'oiai, he nui a lehulehu ia helu.

Eia mai ua mele lāhui nei a kākou.

Hawai'i Pono'ī

Hawai'i Pono'ī,
Nānā i kou Mō'ī,
Ka Lani Ali'i,
Ke Ali'i.

Hui—Makua Lani e,
Kamehameha e,
Na kāua e pale,
Me ka ihe.

Hawai'i Pono'ī,
Nānā i nā Ali'i,
Nā pua kou muli,
Nā Pōki'i.

Hawai'i Pono'ī,
E ka lāhui e,
'O kāu hana nui,
E ui e.

———

E ho'ouna 'ia mai na ā leka iā māua, 'o ia ho'i 'o Laiana Wong a me Kekeha Solis ma ka pahu leka uila ma lalo nei:

>> kwong@hawaii.edu
>> rsolis@hawaii.edu

a i ‘ole ia, ma ke kelepona:

>> 956-2627 (Laiana)
>> 956-2627 (Kekeha)

This column is coordinated by Kawaihuelani Center for Hawaiian Language at the University of Hawai'i at Mānoa.






 Print   Email   Comment | View 5 Comments   Most Popular   Save   Post   Retweet

COMMENTS
(5)
You must be subscribed to participate in discussions


IN OTHER NEWS
Blogs