Quantcast

Tuesday, September 16, 2014         

KAUAKUALAHALE


 Print   Email   Comment | View 9 Comments   Most Popular   Save   Post   Retweet

Ka Ho'okūkū Hula 'O Ka Mō'ī Ho'oulu Lāhui

Na Kekeha Solis

POSTED:
LAST UPDATED: 02:09 a.m. HST, Apr 26, 2014



Synopsis: Beautiful hula this weekend and congratulations to the new Miss Aloha Hula, Ke'alohilani Tara Eliga Serrao of Ka Lā 'Ōnohi Mai O Ha'eha'e. 

Ua hiki hou mai nei ka wā e nanea ai ka maka i ka nānā aku i ka hula, 'o ia ho'i, ka wā o ka Ho'okūkū Hula 'O Ka Mō'ī Ho'oulu Lāhui. A i kapa 'ia ho'i e kekahi po'e kānaka, 'o ka Mele Manaka. Aloha nō ke kapa 'ia 'ana ma ia inoa 'o ka Mele Manaka, ma hope manakā auane'i. A no laila, e kapa 'ia aku paha ma kekahi inoa, 'o ka mea i koho 'ia e ko 'oukou mea kākau, 'o ia ka Mō'ī Ho'oulu Lāhui, 'oiai, 'o ka Mō'ī Kalākaua ka mea nāna ia 'ōlelo mākia, a he hana 'oli'oli nō ho'i ia.

Ua ho'omaka iho nei ka Ho'okūkū Hula 'o ka Mō'ī Ho'oulu Lāhui i ka Pō'ahā nei. A he 'olu nō nā kino i ka hula. A lilo aku nei ka inoa Miki Aloha Hula iā Ke'alohilani Tara Eliga Serrao o Ka Lā 'Ōnohi Mai O Ha'eha'e. Ua nani wale mai kona oli a hula 'ana. A ma muli o ka nani loa o ka leo, lilo akula iā ia nei ka Makana 'Ōlelo Hawai'i. 'O “A Ka La'i Au I Mauliola” ke mele kahiko āna i hula ai. He mele inoa ia no ke Ali'iwahine 'o Ke'ekōlani. A e kuhi ana nō ka lima a hele nō ka maka ma ke mele 'o “Ke 'Ala Ka'u I Honi”. He mele ia no ka Mō'īwahine Lili'uokalani. Ho'omaika'i iā 'oe, e Ke'alohilani, a me kāu mau kumu hula, 'o Keawe lāua 'o Tracie Lopes.

'O kekahi mea nani, ua lilo nō ia makana ho'okahi nō, 'o ka Miki Aloha Hula, iā Tracie Lopes he 20 makahiki i hala aku nei.

'O Serao, no 'Aiea 'o ia, a mai ke Kula 'o Kamehameha 'o ia i puka mai ai. He 1,142 'ai a Serrao i ka pō nei.

A ma ke kūlana helu 'elua, 'o ia 'o Kilioulaninuiamamaohoopiiwahinekapualokeokalaniakea Lai o Keolalaulani Hālau 'Ōlapa O Laka, he 1,089 āna 'ai. A ma ke kūlana helu 'ekolu, 'o ia 'o Sarah Kapuahelani Sterling o ka Hālau Mohala 'Ilima, he 1082 āna 'ai. A ma ke kūlana helu 'ehā, 'o ia 'o Amber Kanoelani Rosenberg o ka Hālau Nā Mamo O Pu'uanahulu, he 1,079 āna 'ai. A ma ke kūlana 'elima, 'o ia 'o Nicole Nalani Ishibashi o ka Hālau Ka Lei Mokihana O Leinaāala, he 1,076 āna 'ai.

A 'o kekahi mea maika'i wale o kēia makahiki, 'o ia kahi ha'i 'ōlelo 'ana no kēlā me kēia moho ma ka ho'okūkū. He leo kama'āina ka leo e pa'ē mai ana i ka pepeiao, 'o ia 'o Hiapo K. Perreira. Inā he makemake paha e ho'olohe ma ka 'ōlelo Hawai'i, a inā he pahu Oceanic kāu, e kaomi i ke pihi “SETTINGS” ma ke kelepihi a laila, e huli i luna a loa'a 'o “AUDIO/SAP” a e koho 'ia, 'o ia ho'i, e kaomi i ke pihi “SELECT” a 'o ia ihola. Inā he kīwī kāu me ke kukuna, e ‘imi aku i ke pihi “SAP” a e kaomi 'ia, a e koho i ka helu 'elua, ma laila ana paha. Inā 'a'ole ma laila, e ho'ā'o i nā helu like 'ole a pa'a mai. Inā 'a'ole mōakāka, e hele aku i ke kahua pūnaewele o ka Ho'okūkū Hula 'o ka Mō'ī Ho'oulu Lāhui, a ma laila e 'ike ai i ka hana e pono ai.

He leo mahalo kēia i nā wāhine a pau i hula aku nei i ka Pō'ahā nei, nā hālau i hula aku nei i ka pō nei, a me nā hālau e hula ana i kēia ahiahi.

———

E ho'ouna 'ia mai na ā leka iā māua, 'o ia ho'i 'o Laiana Wong a me Kekeha Solis ma ka pahu leka uila ma lalo nei:

» kwong@hawaii.edu
» rsolis@hawaii.edu

a i ‘ole ia, ma ke kelepona:

» 956-2627 (Laiana)
» 956-2627 (Kekeha)

This column is coordinated by Kawaihuelani Center for Hawaiian Language at the University of Hawai'i at Mānoa.






 Print   Email   Comment | View 9 Comments   Most Popular   Save   Post   Retweet

COMMENTS
(9)
You must be subscribed to participate in discussions


IN OTHER NEWS
Latest News/Updates