Quantcast

Friday, October 24, 2014         

KAUAKŪKALAHALE


 Print   Email   Comment | View 1 Comments   Most Popular   Save   Post   Retweet

Ka nani a'o Ho'olehua

For Saturday, February 18, 2012

Na Kekeha Solis

POSTED:
LAST UPDATED: 01:55 a.m. HST, Feb 18, 2012



Synopsis: A native of Ho'olehua successfully defends her M.A. thesis under Kawaihuelani Center for Hawaiian Language.

———

Welina e nā makamaka heluhelu. He nū 'oli kā ko 'oukou mea kākau i kēia lā. 'O ia ho'i kēia, i ka Pō'akolu nei, ua mōhala a'ela kahi pua 'ōiwi o Ho'olehua. 'O Kalei Kawa'a nō ia. 'Eā, e nā hoa puni heluhelu nūpepa o ke au kahiko, he mamo nō 'o Kalei, he mo'opuna kualua ho'i, na John Wise, kahi mea kākau kaulana a kākou i 'ike ai ma mua. A 'o kekahi ho'i ia (Wise) o nā kānaka i noho mua ma ka 'āina ho'opulapula Hawai'i ma Ho'olehua. A 'o Ho'olehua nō ka 'āina a Kalei i ho'oheno aku ai ma kāna hō'ike'ike a ha'i 'ōlelo ho'i no kāna pepa nui o ka polokalamu laeo'o o Kawaihuelani.

Ua kāko'o 'ia ua Kalei nei e kona 'ohana, aia nō kona kupunakāne, kona kaikaina a me kona kaikunāne a me nā hoa aloha he nui. A ma laila nō ho'i kona mau mākua, 'a'ole na'e ke kino i hiki mai i O'ahu nei. Ma o ke kamepiula lāua 'elua i komo mai ai i loko o ka lumi a Kalei e ha'i 'ōlelo ana.

'O kekahi mea waiwai loa a Kalei i hō'ike mai ai, 'o ia ke 'ano o ka noi'i 'ana aku i nā kumu waiwai e pono ai kāna pepa. 'O kahi mea nui, e like me kāna i 'ōlelo ai, he kama'āina 'o ia nei no ia 'āina. 'A'ole 'o ia he malihini e komo wale aku ana i ia 'āina me ka nīele a maha'oi paha. Wahi a Kalei, ua nui loa ke kōkua a me ke kāko'o 'ana o kona mau mākua. He aha ia mau hana kōkua a kāko'o ho'i? Na 'oukou nō, e nā makamaka heluhelu, e ki'i aku i kāna pepa laeo'o ma ka Hale Waihona Puke 'o Hamilton ma kēia hope aku, a e heluhelu aku 'oe, 'oiai, he mau mea hou aku nō e ulu ai ka hoi. Ho'omaika'i iā 'oe e Kalei a me kou 'ohana.

Mālama i nā kūpuna

Synopsis: Mahalo to those who gathered at Kawaiaha'o Church to protest and fight for our kūpuna.

———

'Auhea 'oukou e nā kānaka kūpa'a ma hope o ka 'āina, a ma hope ho'i o nā kūpuna o kākou, nā kānaka ho'i i 'ākoakoa aku nei ma ka Luakini 'o Kawaiaha'o i ka Pō'akolu nei no ka hō'ike 'ana aku i ko lākou mana'o kū'ē i ka hua'i 'ana i nā iwi kupapa'u o ko kākou po'e kūpuna.

Wahi a ka lohe, ua hiki aku ka nui o nā iwi kupapa'u i hua'i 'ia a'ela e nā kānaka e kūkulu aku nei ma ia 'āina, i ka 238 a 'oi aku. He nui loa ia, āhea lā e pau ai ia hua'i 'ana? Ke hiki aku i ka 300? I ka 500 paha?

Inā i pau ka 'eli 'ana aku i ka hua'i 'ana mai i ka iwi mua, inā ua maika'i wale 'o Kawaiha'o, hemolele i ka mālie. Eia na'e, ua noke aku nō lākou lā i ka 'eli 'ana a me ke kūkulu 'ana me ka nānā 'ole 'ana aku i ka pono o nā kūpuna i kanu 'ia ma laila a loa'a nā iwi kupapa'u he nui loa.

No ke aha lā e ho'okō 'ole 'ia nei ka makemake o nā mamo a nā kūpuna i kanu 'ia ma ia pā ilina? Ua noi aku kekahi o nā mamo i ka lunakānāwai i ka ho'ōki 'ana aku i ka 'eli 'ana ma laila a waiho iho nei he noi hou. No Waiākea paha ia lunakānāwai, kahi i holo ai ka 'ōlelo, “Waiākea pepeiao pulu'aha.”

———

E ho'ouna 'ia mai na ā leka iā māua, 'o ia ho'i 'o Laiana Wong a me Kekeha Solis ma ka pahu leka uila ma lalo nei:

» kwong@hawaii.edu
» rsolis@hawaii.edu
a i ‘ole ia, ma ke kelepona:
» 956-2627 (Laiana)
» 956-2627 (Kekeha)

This column is coordinated by Kawaihuelani Center for Hawaiian Language at the University of Hawai'i at Mānoa.






 Print   Email   Comment | View 1 Comments   Most Popular   Save   Post   Retweet

COMMENTS
(1)
You must be subscribed to participate in discussions


IN OTHER NEWS
Latest News/Updates
Blogs
Volley Shots
10-23 Top 25

Political Radar
Plus 7

Political Radar
Important

Political Radar
Important

Island Crafters
Weekend Happenings

Small Talk
Handcuffs