Ka ho’omana hou a me ka ho’omana kahiko paha

Synopsis: Another student of the M.A. program of Kawaihuelani Center for Hawaiian Language successfully defends his thesis.

———

Aloha mai e nā makamaka heluhelu a me nā makamaka haipule mai Hawai’i a Ni’ihau. ‘O ka mo’olelo o kēia lā, no kahi keiki hou ia, he ‘eleu mikimiki, i kūpale pono aku nei i kāna pepa laeo’o ma Kawaihuelani o ke Kulanui o Hawai’i ma Mānoa i kēlā pule aku nei. ‘O Jon Yasuda ka inoa o ua keiki nei. A ‘a’ole ‘o ia nei he Hawai’i, akā, he nui nō kona hoi i nā mea Hawai’i a me ka ‘ōlelo Hawai’i. A he kanaka akahai a ‘olu’olu nō ho’i.

‘O ke kumuhana o kāna pepa, ‘o ia ka ho’omana Kalikiano me ka mau ‘ana o kekahi mau loina ho’omana o ke au kahiko. ‘O kekahi nani a ko ‘oukou mea kākau i mahalo ai, ‘o ia ka ho’ohalahala ‘ole ‘ia ‘ana o nā kūpuna a me ka hana ho’omana o ia au kahiko. ‘A’ole e hō’ike mai ana ‘o Jon, he mea maika’i ‘ole a kūpono ‘ole paha ia mau loina ho’omana kahiko. E hō’ike mai ana ‘o ia nei, ‘oko’a ka ho’omana Molemona ma kekahi ‘āina, a ‘oko’a ho’i ma kekahi ‘āina. A pēlā nō ho’i nā ‘ano ho’omana like ‘ole.

A he ulu nō ka hoi i ka noi’i ‘ana a Jon no ka mea, i kekahi manawa, ‘a’ole i mōakāka ia mau loina kahiko i ili mai i loko o ka ho’omana Kalikiano, akā, aia nō ke hana ‘ia akula.

A no laila, ke pa’a ma ka hale waihona puke, e hele aku e heluhelu i kāna pepa laeo’o.

Ka wai lohi o Maleka

Synopsis: Should there be serious consequences if a Rainbow Warrior athlete drinks and drives?

———

Ua lohe aku nei paha ‘oukou, e nā makamaka heluhelu, i ka nūhou no ka ho’ohuoi ‘ia o ke kalaiwa ‘ana aku o kekahi mea pā’ani pōpō peku o ke Kulanui o Hawai’i, ‘oiai ‘o ia ma lalo o ka malu o ka wai’ona. Inā he ‘oia’i’o ia, he aha ka hopena e pono ai? ‘O ke kanono paha o ka ho’opa’i? ‘O ia ho’i, ‘o ka ho’oku’u ‘ia, ‘a’ole e pā’ani hou no nā Ānuenue. ‘O ke pa’i li’ili’i paha i ka lima? ‘O ia ho’i, ‘a’ole e pā’ani ma ka ho’okūkū ho’okahi a ‘elua paha.

E ho’opoina paha ‘o Norm Chow a me nā luna o ke Kulanui o Hawai’i i ka ho’opa’i, ‘oiai, e ho’opa’i ‘ia aku ana ia mea pā’ani e like me ke kānāwai o ka ‘āina.

‘O kekahi mana’o, na nā mea pā’ani ‘ē a’e paha e ho’oholo i ka ho’opa’i kūpono e kau ana ma luna o ia mea pā’ani.

A ‘o kekahi nīnau i kupu a’e, he maika’i ke inu nā mea pā’ani a ‘ona? Pehea ka inu ‘ana i ka wai’ona, he mea ia e pō’ino ai ke kino, e nāwaliwali iki ai paha ke kino? Ke kuhi nei ko ‘oukou mea kākau, e aho paha e kāpae ‘ia ka wai’ona ma ka ‘ao’ao, a pēlā pū me nā lā’au ‘ona a pau, ke pā’ani i nā hana ‘ālapa a pau. A pēlā paha e pā’ani ai me ka ikaika a me ka mākaukau a pau i hiki. A ‘o ia paha ka makemake o nā ka’i, nā mea pā’ani a me ka lehulehu, i mea e holo mua ai nā Ānuenue a loa’a ka lei o ka lanakila.

———

E ho’ouna ‘ia mai na ā leka iā māua, ‘o ia ho’i ‘o Laiana Wong a me Kekeha Solis ma ka pahu leka uila ma lalo nei:

>> kwong@hawaii.edu
>> rsolis@hawaii.edu

a i ‘ole ia, ma ke kelepona:

>> 956-2627 (Laiana)
>> 956-2627 (Kekeha)

This column is coordinated by Kawaihuelani Center for Hawaiian Language at the University of Hawai’i at Mānoa.