Kauakukalahale: A aloha wale ‘ia kā ho’i ‘o Kaunuohua, he pu’u wale nō

Synopsis: Aloha is showing strength in the Protect Mauna Kea movement. Here are a few events to show support and aloha for Mauna Kea.

Aloha mai kākou e nā makamaka heluhelu, ua lohe ‘ia paha ma mua ia ‘ōlelo e kau a’ela i luna. He ‘ōlelo no’eau ia mai kahiko mai e hō’ike ana ē ‘oiai hiki ke aloha ‘ia kahi pu’u, pehea ho’i ke aloha ‘ana i ke kanaka. He hiki ke like a ke ‘oi aku paha. I ka lohe ‘ana i kekahi o nā ha’i ‘ōlelo a Kaho’okahi Kanuha i ka lā 9 o kēia mahina nei i luna o Mauna Kea no ke kapu aloha, kau a’ela ka no’ono’o o ko ‘oukou mea kākau i ua ‘ōlelo no’eau nei. He keu aku nā kūpuna a ke akamai. Ua maopopo, he nui ke aloha o nā kānaka i ka ‘āina, akā, ‘a’ole hiki ke poina ke aloha kanaka. I loko nō o ke aloha nui loa o kākou iā Mauna Kea, ‘o ke aloha ‘āina ho’i, ‘a’ole e poina ke aloha kanaka. A e like me ka ‘ōlelo a Kaho’okahi, ‘o ia aloha (kapu aloha), ‘o ia paha ka mea i nui loa ai ke kāko’o ‘ana o kānaka a puni ka honua. Ua nui nō kāna mau ‘ōlelo maika’i i ia lā, akā ma hope o kāna ha’i ‘ōlelo ‘ana, ua mele maila ‘o Hinaleimoana Wong-Kalu i kahi mele, a he mele nani wale ia a he maika’i nō no ka hō’ike ‘ana i ke alu like ‘ana. Na Hina nō i haku i ka makahiki 2007, akā, ‘akahi nō a lohe ko ‘oukou mea kākau. ‘O ka inoa o ua mele nani lā, ‘o ia ho’i, ‘o Kū Ha’aheo E Ku’u Hawai’i. A ua loa’a nō ho’i nei mele ma ka pūnaewele, http://kumu-hina.tumblr.com/post/37020256496/ku-haaheo-e-kuu-hawaii-by-hinaleimoana. Mahalo e Hina, he mele maika’i wale ia.

A eia mai kekahi mau hana e mālama ‘ia ana a puni ka honua, kahi e hō’ike ai i ke aloha ‘āina a me ke aloha ho’i iā Mauna Kea. E naue aku paha i kekahi o ia mau hana a hō’ike i ke kāko’o a me ke aloha ‘āina, ke aloha kupuna a me ke aloha kanaka.

Kia’i Mauna Kea ma Wāwāmalu. E ‘ākoakoa ana kānaka ma Wāwāmalu i kēia lā, ka lā 25 o kēia mahina nei mai ka hola 10:00 o ke awakea a i ka hola 3:00 o ka ‘auinalā no ka ho’olaha ‘ana a me ke a’o ‘ana i ka la’a o Mauna A Wākea. Ke noi ‘ia nei kānaka i ka lawe i nā hō’ailona me nā ‘ōlelo maika’i a pono no ke a’o ‘ana no Mauna A Wākea.

‘O Mauna Kea mākou. He ‘aha mele kēia no ka pono o Mauna Kea. E mālama ‘ia ana i ka lā 26 ko kēia mahina nei ma ka Hale Hana Keaka o Honoka’a. He $20 o ke kikiki ke kū’ai ‘ia ma mua o ia lā, a ke kū’ai ‘ia i ka ‘īpuka, he $30. E ho’omaka i ka hola 4:00 o ka ‘auinalā. ‘O nā pu’ukani e hīmeni ana i laila, ‘o Amy Hanaiali’i, ‘o Willie K, ‘o Paula Fuga, ‘o John Cruz a me Hawane Rios. ‘O nā pōmaika’i e loa’a ana, e lilo ana no ke a’o ‘ana i nā mea e pili ana no Mauna Kea.

Kia’i Mauna Kea ma Pasadena. E ‘ākoakoa ana kānaka ma Pasadena, Kaleponi i ka lā 29 o kēia mahina nei ‘o ‘Apelila, he Pō’akolu, mai ka hola 10:30 o ke awakea a i ka hola 12:30 no ke kūpa’a ‘ana ma hope o Mauna Kea. ‘O ka helu wahi, ‘o ia ho’i, 1111 S. Arroyo Parkway, Pasadena, CA 91105.

Kū Kia’i Mauna. E mālama ‘ia ana kahi ‘ahamele i ka lā 23 o ka mahina ‘o Mei. Ma Hawaiian Brians, O’ahu ana e mālama ‘ia ai. E ho’omaka ana i ka hola 9:00 o ke ahiahi. He ‘elima kālā e komo ai, a he pono ke piha nā makahiki he 18 i ke kanaka a ‘oi aku. ‘O nā pōmaika’i e loa’a mai ana, e lilo ana no ka pono o Mauna Kea.

This column is coordinated by Kawaihuelani Center for Hawaiian Language at the University of Hawai’i at Mānoa.