comscore Nā puke hiō | Honolulu Star-Advertiser
Editorial | Kauakukalahale

Nā puke hiō

[ AD HAS BEEN REMOVED FROM THIS STORY ]

Synopsis: New books on Hawai‘i’s history are needed that focus on empirical data rather than bias.

Ma mua o ka MH 1893, ua loa’a nā puke like ‘ole pili i ka mo’olelo o Hawai’i ma nā kula ma ka ‘ōlelo Hawai’i a me ka ‘ōlelo Pelekānia. Hō’ike ‘ia ma kēia mau puke no nā lālani ali’i o kahiko loa, ke kūkulu ‘ia ‘ana o ke Aupuni Mō’ī, a me nā hana o ka ‘Aha’ōlelo. A’o ‘ia ke kūlana kū’oko’a o ke Aupuni Mō’ī Hawai’i.

Ma hope o ka ho’okahuli ‘ia o ke aupuni o Lili’uokalani, kāpae ‘ia ia mau puke a pa’i ‘ia nā puke hou e ke aupuni kipi a me nā po’e kākau like ‘ole e paipai ana he kūpono ‘o ‘Amelika ma mua o ke Aupuni Mō’ī. ‘Ōlelo ‘ia he nui ka pilikia o ka noho ‘ana ma lalo o Kamehameha I a ma mua iho. Hō’ike ‘ia he kūpono nā hana a ke Aupuni Kūikawā, ka Lepupalika, ke Kelikoli, a me ka Moku’āina ‘o Hawai’i a he holomua ko lākou pani ‘ana i ke Aupuni Mō’ī.

‘O kekahi hō’ike’ike no kēia mau ‘ike pa’ewa, ma kekahi puke na Rayson lāua ‘o Bauer, hō’ike ‘ia he pilikia ka hopena o nā hana a Lili’uokalani a he wā ho’opuka waiwai ka wā i ea mai nei ke Aupuni Kūikawā a ma hope aku. ‘O ka pa’ewa o kēia, he waewae ka hana a ka mea kākau i nā ‘ike e hō’oia ai i kona ‘ao’ao puni.

Hō’ike ‘o Alexander, Daws, Day, Kuykendall, me Mellen ma kā lākou mau puke, he holomua ma’amau wale nō ke ea ‘ana mai o nā aupuni kipi. ‘A’ohe hō’ike ‘ana no ka mea nui o nā ku’ikahi ma waena o ke Aupuni Mō’ī Hawai’i a me nā aupuni like ‘ole o ka honua i hō’ike no ke kūlana kū’oko’a o ua aupuni nei a i ‘ole no ka mea nui o ka ‘ole o ke ku’ikahi ho’ohui ‘āina ma waena o ke Aupuni Mō’ī me ‘Amelika. Ma ke a’o ‘ia o kēia mau ‘ike pa’ewa ma nā kula, ho’omau ‘ia ka ‘ike pa’ewa ma ke kaiāulu.

Ma muli o nā hana noi’i a kekahi po’e o kēia mau makahiki hope nei e uhai nei i nā ku’ikahi, ka mea nui o kēlā me kēia, nā hana mea nui loa o ka ‘Aha’ōlelo, a me ka pili o nā kānāwai o nā ‘āina like ‘ole, ho’ākaka ‘ia ka pili o ke Aupuni Mō’ī Hawai’i a me ‘Amelika i kēia au.

‘O Sydney Iaukea kekahi e noi’i nei i nā puke like ‘ole pili i ka mo’olelo o Hawai’i nei a huli ‘o ia i kēlā me kēia hō’ike ma loko o nā puke like ‘ole i ka maika’i a maika’i ‘ole o kekahi ‘ao’ao, ‘o ka ‘ao’ao paipai Aupuni Mō’ī a i ‘ole ka ‘ao’ao o ‘Amelika. ‘O ka hapa nui loa o nā mea i ‘ike ‘ia, he paipai i ka maika’i o ‘Amelika a ho’oha’aha’a ‘ia ke Aupuni Mō’ī.

‘O ka hana a Noelani Goodyear-Kaopua, ‘o ia ka noi’i ‘ana i nā ‘oihana ho’ona’auao o ke Aupuni Mō’ī a hiki i kēia au a me ka loli o nā ‘ao’ao pili kālai’āina e paipai ‘ia ana ma nā puke i pa’i ‘ia ma lalo o ia mau ‘oihana. Helu ‘o ia i ka holomua o ka loli ‘ana i hiki ke ‘ike ‘ia ke kumu o nā pa’ewa.

‘O Ron Williams kekahi e noi’i nei i ka mo‘olelo o Hawai’i ma nā palapala ‘ōlelo Hawai’i like ‘ole mai ka wā ma mua loa mai.

‘O Donovan Preza kekahi e noi’i nei i nā heluna pololei o nā ‘āina i hā’awi ‘ia ma ka Māhele Nui.

Na nā hana noi’i a kēia po’e e ho’ā’o nei i nā ‘ike i pa’i mua ‘ia.


E ho’ouna ‘ia mai nā leka iā māua, ‘o ia ho’i ‘o Laiana Wong a me Kekeha Solis ma ka pahu leka uila ma lalo nei:

» kwong@hawaii.edu
» rsolis@hawaii.edu

a i ‘ole ia, ma ke kelepona:
» 956-2627 (Laiana)
» 956-2624 (Kekeha)

This column is coordinated by the Hawaiian Language Department at the University of Hawai’i at M

Comments have been disabled for this story...

Click here to see our full coverage of the coronavirus outbreak. Submit your coronavirus news tip.

Be the first to know
Get web push notifications from Star-Advertiser when the next breaking story happens — it's FREE! You just need a supported web browser.
Subscribe for this feature

Scroll Up