Synopsis: Another interesting master’s defense of a student of Kawaihuelani Center for Hawaiian Language at the University of Hawai’i at Mānoa.

———

Aloha mai kākou e nā makamaka o kēia pae ‘āina nei, a me kahi pae ‘āina ‘o Iāpana. Ua pili nō ‘o Hawai’i iā Iāpana mai mua mai, a eia mai kahi pilina hou, he haumāna laeo’o ma Kawaihuelani o ke Kulanui o Hawai’i ma Mānoa. No Iāpana mai nō a hele mai i O’ahu nei. Ua hū a’ela kona aloha a ho’omaka a’ela ‘o ia e a’o i ka ‘ōlelo Hawai’i. ‘O Maiko Doi kona inoa, a he haumāna ‘eleu nō e kūlia ana i ka nu’u ma nā hana a pau. A i ka Pō’akahi nei, kūpale aku nei ‘o ia i kāna pepa nui no ka polokalamu laeo’o, a ‘o ka inoa o kāna ha’i ‘ōlelo, ‘o ia ho’i, “He mo’olelo no ka ‘a’ahu o ka po’e ali’i wahine Hawai’i.”

‘O kekahi mea hoihoi, ‘o ia ka pa’a o ka mana’o o nā ali’i wahine, e hana i ka lole i kūpono no ke ‘ano o ko lākou mau kino, ke ‘ano ho’i o ke kino o nā wāhine Hawai’i a me ke ‘ano o ka nohona ma Hawai’i nei, a pēlā pū me ka mo’olelo Hawai’i. A hō’ike mai nō ho’i ‘o Maiko i nā hua’ōlelo hou e pili ana i ka lole, i loa’a iā ia ma ka noi’i ‘ana. He mau hua’ōlelo ia no ke ‘ano lole haole, a ‘o ka hua’ōlelo Hawai’i ka mea i mōakāka ai ke ‘ano kino o ka lole.

He maika’i wale ia ha’i ‘ōlelo ‘ana a Maiko, a he mea maopopo wale, pēlā nō ho’i kāna pepa nui, ke pa’i ‘ia.

Ua kau nō ka pe’a a holo aku nei ka wa’a i ke kai hohonu, a komo ka wa’a, a pae pono maila i uka nei.

Pa’i ana nā pahu a hula le’a

Synopsis: The 6th annual International Waikīkī Hula Conference is around the corner, May 11-13. Lei Day in Hawai’i is the theme this year.

‘Auhea ‘oukou e nā ‘ōlapa o Hawai’i nei, a me nā ‘ōlapa o nā ‘āina ‘ē, nā ‘ōlapa i ‘olu ke kino i ka hula, a me nā ‘ōlapa ‘akahi ‘akahi, e hiki koke mai ana ka ‘Aha Hula o Waikīkī. A ‘o ke ono kēia o ka makahiki. E mālama ‘ia aku ana mai ka lā 11, he Pō’alima a hiki i ka lā 13 o Mei ma ke Kikowaena ‘Aha o Hawai’i. A ‘a’ole wale nō no ka po’e ‘ālapa ua ‘aha hula nei. Inā ‘a’ole paha i ‘ami iki kahi kīkala, akā, he kanaka puni hula nō, e naue aku i laila.

‘O ke kumuhana o ua ‘aha hula nei i kēia makahiki, ‘o ia ka Lā Lei ma Hawai’i nei. He 80 papa e mālama ‘ia ana e nā kumu hula he 40 a ‘oi. He mau loea lākou ma ka hula, a ma ke oli paha. Ho’okahi wale nō paha mea minamina, ‘a’ole lawa ka manawa e hele ai i nā papa a pau.

A ‘o kekahi mea hou o kēia makahiki, he ho’okūkū kapa kuiki Hawai’i nō ho’i. ‘O ka makamua ia ma Hawai’i nei.

A no laila, inā he ulu ka hoi i ua ‘aha hula nei, e ‘eleu aku ma ke kākau inoa ‘ana, o hala ‘ē ka Pu’ulena. ‘O ka lā mua o Mei ka lā hope loa e kākau inoa ai. ‘O ka uku, he $385 no nā lā ‘ekolu. A no ka po’e kama’āina o Hawai’i nei, he $250 wale nō. A inā he hui nona nā lālā he 10 a ‘oi, e emi mai ka uku. No nā ‘ike like ‘ole e pili ana i ka ‘Aha Hula o Waikīkī a no ke kākau inoa ‘ana paha, e hele aku i ka ‘ao’ao pūnaewele, www.waikikihulaconference.com.

———

E ho’ouna ‘ia mai na ā leka iā māua, ‘o ia ho’i ‘o Laiana Wong a me Kekeha Solis ma ka pahu leka uila ma lalo nei:

>> kwong@hawaii.edu
>> rsolis@hawaii.edu

a i ‘ole ia, ma ke kelepona:

>> 956-2627 (Laiana)
>> 956-2627 (Kekeha)

This column is coordinated by Kawaihuelani Center for Hawaiian Language at the University of Hawai’i at Mānoa.