Synopsis: Is it going to come down to rail transit for the mayoral race?

———

Welina e nā makamaka heluhelu o Kauakūkalahale. Ua hala iho nei ka lā koho wae mua i kēlā mau pule i ka’a hope aku nei. A i ka hopena o ia lā, ua hau’oli ka na’au o kekahi po’e manakoho, a kaumaha ihola paha ka na’au o kekahi. A ‘o kekahi po’e kānaka, ua pū’iwa loa paha ka no’ono’o i ka nui loa o ka pāloka o kekahi mau moho. ‘Akahi nō a waiho aku nei kekahi i ho’opi’i i mua o ka ‘Aha Ho’okolokolo Ki’eki’e o Hawai’i, e kuhikuhi ana i ka ‘a’e ‘ana aku o kekahi i nā kānāwai paipai kālai’āina. ‘O ia ho’i, ua kau aku nei nā hō’ailona a kekahi moho Luna ‘Aha Kūkā o Honolulu ma kahi kokoke i kahi koho pāloka. A ‘o ia moho ka mea nāna ia mau hō’ailona, ‘o ia kai lanakila. Ua kū paha ka hewa iā ia, ‘a’ole paha. Koe aku ia. Na ka luna kānāwai ia e ho’oholo.

‘Eā, ua pa’a ihola nā moho o ka lā koho ma Nowemapa. A e hiki koke mai ana ia lā.

‘O kekahi alualu ‘ana e nūnēnūnē ‘ia nei, ‘o ia nā moho e alualu ana i ke kūlana meia. E kū ha’aheo ana ‘o Peni Kaeakano lāua ‘o Kiliki Kakawela, he mau Kemokalaka lāua ‘elua.

Pehea lā e koho ai ka Lepupalika? ‘A’ohe moho o ia ‘ao’ao. A pehea lā ho’i e koho ai ke Kemokalaka? He ‘elua moho o ia ‘ao’ao. A ‘o ka ‘ao’ao Kū’oko’a, aloha nō, ‘a’ohe ona moho, ua pau ihola paha ua moho lā ma muli o ke komo ‘ana aku o Kaeakano i ke alualu ‘ana. A he aha kona kumu e alualu nei i ia ke kūlana meia? Aia nō ke kumu e kau a’ela i luna, ‘o ke ka’a uila kau i ka lewa. Inā ‘a’ole i hāpai ‘ia ua ka’a uila kupanaha lā, inā ‘a’ole ‘o Kaeakano i komo aku, a ‘o ia mau nō ke alualu ‘ana o ka moho Kū’oko’a.

I kēia manawa, he ‘elua moho Kemokalaka, ‘o kekahi, he makemake nō i ke ka’a uila kau i ka lewa, a ‘o kekahi, he kū’ē i ke kūkulu ‘ana a’e i ua ka’a lā. Pehea, inā he makemake kou iā Kaeakano, akā, he nui ka makemake i ke ka’a uila kau i ka lewa? A pēia pū no Kakawela. Inā he makemake kekahi iā ia, akā, ‘a’ole na’e kāko’o i ua ka’a uila lā, he aha ka mea e hana ai?

Mai nānā iki i ia nīnau ma ke koho ‘ana i ka moho kūpono nāna e kū i ka moku. Ke kū ia moho kūpono i ka moku, e noke aku i kāu hana kāko’o a kū’ē paha. ‘Eā, inā ‘o Kakawela ke kū i ka moku, “e alu ka pule i Hakalau.” ‘O ia ho’i, e alu like ka nui lehulehu e kū’ē ana i ke ka’a uila ma kahi ho’okahi me ke kū’ē ‘ana, ‘a’ole e hiki ana iā ia ke hō’alo. ‘O ia ‘ōlelo kahiko, no loko mai ia o kekahi mo’olelo no kekahi kahuna ikaika loa i hana ‘ino i nā kānaka a pau. Ua ho’ā’o akula kekahi po’e kāhuna e ho’iho’i aku i kāna pule ‘ana, ‘a’ole na’e i hiki. A hiki maila kekahi kahuna, a a’o maila i nā kāhuna, e alu like lākou ma ka pule ‘ana i pau ua kahuna kolohe lā. A ‘o ia ihola ka mea i pau ai ‘o ia i ka make.

Ua ho’omaka aku nei ka hana. Ua pau ka pou mua i ke kūkulu ‘ia. A wahi a ka Meia Kalalaio, e ho’omau ana ‘o ia i ke kūkulu ‘ana a pau kona wā e kū ana i ka moku. ‘Eā, ‘a’ohe pilikia o ia, ‘o ka mea nui, ‘a’ole e poina ka ‘ōlelo mai kahiko mai, ‘o ia ho’i, “E alu ka pule i Hakalau.”

——— 

E ho’ouna ‘ia mai na ā leka iā māua, ‘o ia ho’i ‘o Laiana Wong a me Kekeha Solis ma ka pahu leka uila ma lalo nei:

>> kwong@hawaii.edu
>> rsolis@hawaii.edu

a i ‘ole ia, ma ke kelepona:

>> 956-2627 (Laiana)
>> 956-2627 (Kekeha)

This column is coordinated by Kawaihuelani Center for Hawaiian Language at the University of Hawai’i at Mānoa.