Synopsis: The first year of the College Football Playoff is off to a good start.

Welina e nā makamaka heluhelu. I ka Pō’akahi, e kū’ē aku ana ‘o ‘Olekona iā ‘Ohaio Moku’āina no ka inoa moho pōpō pekupeku o nā kulanui o ‘Amelika Hui Pū ‘Ia. A ‘o ka makamua kēia o nei Ho’okūkū Wae Inoa Moho ma ka ‘Ahahui ‘Ālapa o nā Kulanui o ‘Amelika Hui Pū ‘Ia.

No ka manawa lō’ihi, ‘a’ole i loa’a ka inoa moho ho’okahi o nā hui pōpō pekupeku o nā kulanui o ‘Amelika. ‘O ka Ho’okūkū “Ipu” mua, he ho’okūkū ia ma waena o kekahi o nā hui ikaika loa o ke komohana a me kekahi o nā hui ikaika loa o ka hikina. A ma ia hope mai, ua māhuahua nā Ho’okūkū Ipu, ‘o ka pilikia na’e, ‘a’ole nō i ‘ā’ume’ume nā hui ikaika loa a kū ho’okahi ke po’okela. No laila, ‘a’ole i ‘ike ‘ia ka inoa moho o nā hui a pau.

I ka makahiki 1998, ua ho’omaka ihola nā Ho’okūkū Ipu Inoa Moho (BCS), ‘o ia ho’i, e hui pū ana nā hui ikaika loa he 10 ma ke kahua pā’ani, a ‘o nā hui ‘oi loa ‘elua ma waena o lākou, ‘o lāua ke hui pū ma ka Ho’okūkū Inoa Moho a ‘o ka mea nāna e kā’ili i ka lanakila ma ia ho’okūkū, ‘o ia ke po’okela o nā hui pōpō pekupeku o nā kulanui o ‘Amelika. ‘A’ole na’e i maika’i ka hana ma nā Ho’okūkū Ipu Inoa Moho, ‘oiai, kohu mea lā, ‘a’ole i komo nā hui like ‘ole i loko o ua ho’okūkū inoa moho lā. I kekahi mau makahiki, ua ikaika loa kekahi hui, a ‘a’ole i hā’ule iki ma ke kikina, ‘a’ole na’e i komo i loko o ka ho’okūkū inoa moho. A no laila, eia kākou ma ka makahiki 2015, ua pa’a maila kahi mea hou. A ke kali nei kākou ‘o ka lanakila o ka ho’okūkū o ka Pō’akahi e hiki koke mai ana, ‘o ia ana ke po’okela o nā kulanui a pau o ke kikina nei i hala.

A he keu aku kākou a ka pōmaika’i, ‘oiai, aia kahi keiki o Hawai’i nei i loko o ia ho’okūkū. ‘O Marcus Mariota nō ia, a e alaka’i ana ‘o ia i nā Kakā o ‘Olekona. A inā e ‘āha’i ‘o Marcus mā i ka inoa moho, e lilo ana kēia makahiki i makahiki poina ‘ole iā kākou.

‘O kēia Ho’okūkū Wae Inoa Moho, ua ‘oi aku paha ka maika’i, ‘oiai, he koho ‘ia nā hui ‘oi ‘ehā, a hui pū ka mua me ka hā, a pēlā pū me ka lua me ke kolu, a ‘o nā lanakila o ia mau hui ‘ana, ‘o lāua ke ho’okūkū no ka inoa moho.

‘O kekahi mea maika’i o ka Ho’okūkū Wae Inoa Moho ma ka Pō’akahi, e kōkua ‘ia ana nā mākua a me nā kahu paha o nā mea pā’ani o ia ho’okūkū inoa moho ma ka uku ‘ana no ka huaka’i ‘ana i ka ho’okūkū. No ka makua a kahu paha e hele ana i ka ho’okūkū, e ho’iho’i pākahi ‘ia ana he $1,250 a emi iho paha. No ka noho hōkele paha, ka mea ‘ai paha a pēlā aku. He mea maika’i kēia, ‘oiai he mea nui ka ‘ohana. A e hana like ana no nā Hui ‘Ehā Hope Loa o ka Ho’okūkū Pōpō Hīna’i (no nā kāne a me nā wāhine). A e ho’iho’i pākahi ‘ia ana he $3,000. A no ka Ho’okūkū Inoa Moho, he $4,000.

E maika’i paha ka Ho’okūkū Wae Inoa Moho, ‘a’ole paha. Akā, he ho’omaka maika’i ‘i’o nō ia.

———

E ho’ouna ‘ia mai na ā leka iā m?ua, ‘o ia ho’i ‘o Laiana Wong a me Kekeha Solis ma ka pahu leka uila ma lalo nei:

>> kwong@hawaii.edu

>> rsolis@hawaii.edu

a i ‘ole ia, ma ke kelepona:

>> 956-2627 (Laiana)

>> 956-2627 (Kekeha)

This column is coordinated by Kawaihuelani Center for Hawaiian Language at the University of Hawai’i at Mānoa.