‘Aʻohe hana nui ke alu ʻia

Synopsis: The beginning of Norm Chow’s building of the legacy of the Rainbow Warriors. Let’s hope the trend continues in the following years of his contract.

________

Aloha kākou e nā makamaka puni pāʻani pōpō pekupeku Koa Änuenue, mai ka mokupuni nui o Keawe a i ka moku kāʻili lā o lalo ē. ʻO ka Pōʻakolu nei ka lā mua e hiki ai i nā mea pāʻani pōpō peku o nā kula kiʻekiʻe ke pūlima i nā leka hoʻohiki kulanui. ʻO ka mea pōmaikaʻi, he ʻelua mea pāʻani o nāmea pāʻani ʻoi he 10 o Hawaiʻi nei, ua paʻa ko lāua manaʻo e lilo i Koa Ānuenue, ʻo ia nō ʻo Steven Lakalaka o Punahou lāua ʻo Kiha Sai o Kamehameha. 

A ʻo kahi mea minamina, ua haʻi nō kekahi mea pāʻani o ke Kula ʻo Kamehameha, ʻo Taylor Taliulu, e lilo nō hoʻi ʻo ia i Koa Ānuenue, akā, loli hou ihola kona manaʻo a paʻa loa, e hakakā ana ʻo ia ma ke kahua pāʻani no ka pono o Wakinekona Mokuʻāina. A ʻo ka mea paha i hiki ai ke loli kona manaʻo, ʻaʻole ʻo ia i hoʻopuka i ia ʻōlelo mai kahiko mai, ʻo ia hoʻi, “Pau Pele, pau manō.” Akā, ʻaʻohe pilikia o ia, ʻoiai, ua lilo ʻē ʻo Taliulu iā Wakinekona Mokuʻāina i ka wā a Norm Chow lāua ʻo Philip Raushcer i hoʻowaliwali ai iā ia a hei ihola i ka ʻupena. Akā, i ke ao ʻana aʻe o ka Pöʻakolu nei, wehe akula ua uhu lā i ka hohonu. Aloha nō, ʻo ka uhu kāʻalo maka wale nö ia.

A ʻo kekahi mea pāʻani i pūlima iho nei no Hawaiʻi, ʻo ia ʻo Benetton Fonua o Kahuku. I ke kau pōpōpeku i hala iho nei, ua koho ʻia ʻo Fonua e ka Hōkū Avalataisa, ʻo ia ka mea pāʻani kūpale ʻoi o ka makahiki.

He mau mea kā lākou o ka noho paʻa ʻana ma Hawaiʻi nei e pāʻani ʻālapa ai. ʻO ka mea nui loa paha, ʻo ia nō ke poʻo kaʻi hou, ʻo ia hoʻi, ʻo Norm Chow. Ma muli o kona moʻolelo ma ke kahua pāʻani a ma waho nō hoʻi o ke kahua pāʻani i hei ai ia mau ulua. A ʻo ka noke ʻana i ka hoʻohei ʻana i nā ulua kāpapa o ka moana o Hawaiʻi nei ka mea e pono ai ka lilo ʻana o Hawaiʻi, ʻo ia kekahi ma ke kūʻē ʻana no ka inoa moho o kekahi o nā Ipu kaulana.

Ua nui nō nā keiki o Hawaiʻi i hele aku nei i ka ʻāina ʻë no ka pāʻani ʻana i ke kinipōpō pekupeku ma nākulanui o laila, a holo mua loa nō a i ka wā e puka ai mai ke kulanui mai, ʻo ka lilo aʻela nō ia i mea pāʻani loea. A ke manaʻo nei ko ʻoukou mea kākau, inā i noho paʻa ia mau mea pāʻani ma Hawaiʻi nei a pāʻani ihola nō nā Koa Ānuenue, inā ua lilo iā Hawaiʻi kekahi mau inoa moho. A ʻo Chow ke poʻo kaʻi, a he nui nā keiki kāʻeʻaʻeʻa o Hawaiʻi e pāʻani no Hawaiʻi, ʻaʻohe mea nāna e paʻi i ke poʻo o nā Koa Ānuenue.

ʻO ka hāʻawi aloha nō hoʻi i nā keiki e pāʻani ana no nā kulanui ma ka ʻāina ʻē, he koho maikaʻi nō hoʻi ia. He wā ia e mākaʻikaʻi aku ai i nā wahi like ʻole o ka honua nei. A he nui nō hoʻi nā mea e aʻo ai. A ʻo ka mea e lana nei ka manaʻo, e hoʻi mai nō lakou i Hawaiʻi nei no ke kōkua ʻana i ko Hawaiʻi ma kēia hope aku.

E hoʻōho kākou me ka leo nui no nā Koa Ānuenue ke hoʻomaka ke kau hou me ka hoʻomanawanui pü ʻana iho i kahi wā, ʻoiai, he hoʻomaka kēia. ʻO ke aloha nō iā ʻoukou, e nā makamaka heluhelu.