Synopsis: A eulogy for a beloved mother who recently passed away.
Aloha lā e ka makuahine i aloha nui ‘ia i hala aku nei i ke ala ho’i ‘ole mai. He aha nō ho’i lā kēia ha’alele honua ‘ana i ka ‘ohana aloha, kāu mau pulapula o nei ao kūnewanewa nei me nā ‘ōuli pōhihihi o ka noho honua ‘ana.
A hiki ‘ole ho’i ke ‘ike ‘ia nā mea pōhihihi o kēia honua nei. Iā wai lā nā pulapula, nā hoaaloha, nā malihini, nā kaiāulu e holo ai i leo pule, i poli aloha e hi’i ai, i pepeiao e ho’olohe ai, i lima e ho’ōla ai, no nā ‘ano kū’ia o kēia noho honua nei. Na wai lā e lawe i ka ‘eha’eha o ka pu’uwai kūmākena i ke aloha makuahine i hiki ‘ole ho’i ke ho’opoina ‘ia no ke aloha makua. He aloha kāu i waiho maila, he waimaka helele’i ko ho’i ko ne’i, no ke aloha makua. ‘O ka leo a’o a ka makua lā kāu i waiho maila iā mākou e huli a kāhea aku i ke Akua ola, ke Akua ho’okahi a’u i ho’omana ai i kēlā lā, kēia lā, kēlā hola, kēia hola. ‘O ke Akua lā ka mea nāna e ho’ōla mai i nā pu’uwai kūmākena o nā pulapula o ka ‘ohana Kanahele. He aloha palena ‘ole ko mākou nou a hiki ‘ole ho’i ke poina ‘ia. E ho’i lā ‘oe i ka poli o ‘Apelahama a lilo i kauā no ka Makua Lani ke Akua o ‘Apelahama, ke Akua o Isa’aka, ke Akua o Iākopa, ke Akua o Davida. I laila ho’i e ho’onani a ho’omaika’i mau ai ‘oe i ka Makua Lani ka mea nāna i hā’awi mai i ke ola lā a hiki i kona kāhea ‘ana iā ‘oe e ho’i i kona home aloha lā. I laila ho’i e hui ai me ko aloha pua pīkake i ho’i ‘ē i ka poli o ‘Apelahama. I laila ho’i e hui hou ai me nā mākua, nā kūpuna, nā kua’ana, a me ke keiki hānau mua i ho’i e waele i ke alahele nou a ‘a’ohe hope e ho’i ai. Nou ko mākou aloha palena ‘ole e ka makuahine i aloha nui ‘ia. Nou mau loa ko mākou aloha palena ‘ole, aloha ē.
[Luna Ho’oponopono — Me ‘oukou, e Kuuipolani a me kou ‘ohana, ke aloha o māua nei nā luna ho’oponopono o Kauakūkalahale. He mea nui ke aloha o ke keiki i ka makuahine, a pēlā ho’i ke aloha o ka makuahine i ke keiki. Aloha nō ka hala ‘ana o Mama Mililani. He keu aku ‘o ia a ka wahine lokomaika’i.
A he wahine kōkua ‘o ia a he wahine pu’uwai hāmama. Ua kōkua mai ‘o Mama Mililani i ia’u nei ma ka pule ‘ana no ko’u makuahine. A ho’omana’o ihola au i kekahi lā, kono ‘ia au e hele i ka hale o Kuuipolani mā no ka ninaninau ‘ana i kona makuahine, iā Mama Mililani, i nā ‘ano nīnau like ‘ole no ka ‘ōlelo Hawai’i. Ua hilahila nō au, a ‘a’ole au i makemake e ho’oluhi aku iā ia, akā, he keu aku nō ‘o Mama a ka ‘olu’olu. Ma nā nīnau hemahema a pau a’u, ua pane mai nō ‘o ia me ke aloha a me ka ‘olu’olu. Mahalo nui au iā ‘oe e Mama Mililani, no ke kōkua ‘ana mai ia’u nei a pēlā pū me kou kōkua ‘ana i nā kumu a me nā haumāna o ke Kulanui o Hawai’i ma Mānoa. A pēlā paha kou kōkua ‘ana i nā kānaka he nui. Mahalo.
‘O ka ho’olewa o Mama Mililani Kanahele, e mālama ‘ia ana i kēia lā, ka lā 24 o Ianuali ma ka Hale Pule ‘o Garden Island Mortuary ma Lāwa’i. ‘O ke kipa ‘ana, mai ka hola 9:00 o ke kakahiaka a i ka hola 11:00. A ho’omaka ke anaina ho’olewa i ka hola 11:00 o ke awakea.]
E ho’ouna ‘ia mai na ā leka iā māua, ‘o ia ho’i ‘o Laiana Wong a me Kekeha Solis ma ka pahu leka uila ma lalo nei:
>> kwong@hawaii.edu
>> rsolis@hawaii.edu
a i ‘ole ia, ma ke kelepona:
>> 956-2627 (Laiana)
>> 956-2627 (Kekeha)
This column is coordinated by Kawaihuelani Center for Hawaiian Language at the University of Hawai’i at Mānoa.
