Ka ‘Ōmaka ‘Ana O Ka Lā

Synopsis: A second beloved baby girl has blessed Edward Apiu Alika Apo and Katrina-Ann Rose-Marie Kapā’anaokalāokeola Oliveira.

Welina ‘oukou e nā hoa heluhelu makamae o Kauakūkalahale, nā koa kū kahiko o ka ‘ōlelo makuahine o nēia pae ‘āina nō ho’i e hele kūnihi aku ana i ka mālamalama o ke ao mai ka pi’ina o ka lā i Ha’eha’e ma ka moku o Keawe a i ka hale o ka pā ‘ana o ka lā o ke ola ‘o ia nō ‘o Haleakalā ma Maui a Kama a i ka ‘ōnohinohi ‘ana mai o ka lā ma Ka’ala ma ka mokupuni o Kākuhihewa a hiki loa aku i ka mokupuni o Manokalanipō i ka ‘ānapanapa ‘ana o ka wai ola o Wai’ale’ale i ka lā, me ‘oukou ka welina o ke aloha.

‘O Kāloa Kū Kahi ka pō mahina; ‘o Kaulua ka malama. I ka hola 10:46 o ke awakea ma ka haukapila ‘o Maui Memorial ma Wailuku, Maui i hānau ‘ia ai he ‘ōnohi kau maka no nā hono a’o Pi’ilani nona ka inoa ‘o Kamaka Kapā’anaokalāokeola Kapule Nākāhilialohaohelek?nihi Apo. He 7 paona a he 5 ‘aunaki kona kaumaha a he 19 ‘īniha kona lō’ihi. He mamo hiwahiwa ‘o ia na Edward Apiu Alika Apo lāua ‘o Katrina-Ann Rose-Marie Kapā’anaokalāokeola Oliveira. He hānau hope aloha no Kahakai Kalehuaokahakuloaakalawai’anuinākoa Mōloa Chew-Quon Maile Apo. He kaikamahine makamae.

He mamo laha ?ole a he manu hulu nō ho’i ua kama lei no nā hulu kupuna, he nēnē pūlama ‘ia, he nēnē hiwa i ka mana’o. Hānau ‘ia maila ua mo’o lei hulu i ka lā hānau ho’okahi o kona kupuna wahine kuakahi, ‘o ia ho’i ka lā i piha ai he ‘elua ka’au makahiki iā Justine Kamaka Mōloa Wallace. Mālamalama ke ola o ka ‘ohana i kona puka ‘ana mai a pōmaika’i maoli nō ka ‘ohana i ka hānau ‘ana mai o ua keiki milimili nei, ‘o ia kekahi kumu i kapa ‘ia ai ‘o ia ‘o Kapā’anaokalāokeola a me Kapule. A, ‘o Kamaka nō ka lua o nā kāhili aloha o nā mākua.

Na nā mākua e mālama a e aloha ho’i i kā lāua ‘ano’i mamo kaulua mai ka ‘ōmaka ‘ana o ka lā i Haleakalā a i ka welo ‘ana o ka lā i ka lehua o Kahakuloa. Ola nā iwi! Ola!

[He mo’olelo nani loa ia. Mahalo a nui e Kapā. A ho’omaika’i ho’i iā ‘olua me Alika no ka ho’okō ‘ana i ka ‘ōlelo mākia a ka Mō’ī David Kalākaua, ‘o ia ho’i, Ho’oulu Lāhui. He nū ‘oli kēia hānau ‘ana o Kamaka a loa’a maila nō ho’i kahi hoa pā’ani o Kahakai. A nui hou a’ela ka ‘ohana o Kawaihuelani. ‘A’ole i pōmaika’i ko ‘oukou luna ho’oponopono i ka launa pū ‘ana me ke kama iki hou, akā, ua ‘ike ‘ia nō ke ki’i, a pupuka nō. Ola nā iwi. LH]

Ka Ho’okūkū Hula

A ‘oiai, ua hāpai ‘ia ka inoa o ka Mō’ī Kalākaua i luna a’e nei, he ‘ōlelo ho’omaopopo kēia no ka Ho’okūkū Hula ‘o ka Merrie Monarch. E mālama ‘ia ana mai ka lā 9 o ka mahina ‘o Malaki a i ka lā 11. E ho’onanea ‘oukou i ka nānā ‘ana i nā kino ‘olu i ka hula. He 24 mau hālau e hula ana i ia mau ahiahi. A he mau ahiahi nani ana ia i ka hula, e like me ka mea ma’a mau. No laila, inā he manawa ka’awale, e nānā ka maka, a e ho’olohe ka pepeiao. E komo paha ka makemake i loko o ‘oukou e a’o i ka hula.

This column is coordinated by Kawaihuelani Center for Hawaiian Language at the University of Hawai’i at Mānoa.