Kauakukalahale: ‘O Ka Lapa’au ‘I’o Ulu Ma Ke Kapolena Pena Ki’i

Synopsis: This is the ninth year of Oncology on Canvas in Hawai’i. The exhibit is currently at Honolulu Hale from May 4 to May 22.

Welina e nā makamaka heluhelu o Kauakūkalahale. ‘O ia po’o mana’o e kau a’ela i luna, ua kama’āina paha iā ‘oukou? ‘Akahi nō a ‘ike ko ‘oukou mea kākau i ka Lapa’au ‘I’o Ulu ma ke Kapolena Pena Ki’i i kēia makahiki nei, he mau mahina i hala iho nei. He polokalamu maika’i nō ia. He polokalamu ho’i no nā kānaka i loa’a i ka ma’i ‘a’ai a me ko lākou mau ‘ohana a me nā hoa aloha. I wahi ia polokalamu ‘o ka Lapa’au ‘I’o Ulu ma ke Kapolena Pena Ki’i e hō’ike aku ai i ka huaka’i pono’ī o ka po’e i lo’ohia i ka ma’i ‘a’ai a me ko lākou ‘ohana a hoa paha ma o ka hana ‘ana i ka hana no’eau, ma ke pena ki’i ho’i. ‘A’ole na’e i Hawai’i nei i ho’okumu mua ‘ia ai nei polokalamu. I ‘Amelika i ho’okumu ‘ia ai i ka makahiki 2004. He ho’okūkū hana no’eau na’e ia. I mea ia e ha’i aku ai ke kanaka i loa’a i ia ma’i a i loa’a paha kona ‘ohana a hoa paha i ia ma’i, i kona mo’olelo ma o ka hana no’eau. E nānā aku paha i nā ki’i ma lillyoncology.com.

I ka makahiki 2005, hele akula kekahi mau kahu ma’i o ka ‘Ahahui Kahu Ma’i Lapa’au ‘I’o Ulu o Hawai’i i ‘Amelika no kahi ‘aha a ma laila lākou i a’o mai ai no ka polokalamu ‘o ka Lapa’au ‘Io Ulu ma ke Kapolena Pena Ki’i. A ulu a’ela ka makemake i loko o lākou e mālama ‘ia ua polokalamu nei i Hawai’i nei. A i ka makahiki 2007, ua ho’okō ‘ia ka makemake. ‘O ka makamua ia o ka mālama ‘ia ‘ana iho o ia polokalamu ma Hawai’i nei. A he 100 mau kānaka a ‘oi i komo i loko. ‘O kēia makahiki nei, ‘o ia ka iwa o ka makahiki o ka mālama ‘ia ‘ana o nei polokalamu ma Hawai’i. A he 400 mau kānaka a ‘oi i komo i loko mai kekahi mau haukapila ‘ehā, ‘o ka Haukapila ‘o ka Mō’īwahine, ‘o ka Haukapila ‘o Kapi’olani, ‘o ka Haukapila ‘o Kaiser a me ka Haukapila ‘o Tripler. A he ‘ekolu haneli mau ki’i e kau a’ela ma Honolulu Hale.

He keu aku ia polokalamu a ka maika’i, ‘oiai, he mea ho’opūhili no’ono’o ka loa’a ‘ana i ka ma’i ‘a’ai, a he hana nui ka hō’ike ‘ana i nā mea ma ka na’au ma o nā hua ‘ōlelo. A ‘o ka hana no’eau, he mea hō’olu na’au ia no kekahi po’e.

‘Akahi nō a hemo ka hō’ike’ike ‘o Ka Lapa’au ‘I’o Ulu Ma Ke Kapolena Pena Ki’i i ka pule nei i hala, i ka lā ‘ehā ho’i o ka mahina ‘o Mei. A ma laila nō ka hō’ike’ike a hiki i ka lā 22 o kēia mahina nei. Ke ‘ole e kuhihewa ko ‘oukou mea kākau, ‘o ka Lapa’au ‘I’o Ulu ma ke Kapolena Pena Ki’i ma Hawai’i nei, ‘a’ole ia he ho’okūkū. Akā, he nui nā ki’i nani wale, a hohonu nō ka ‘ike ke heluhelu i kahi paukū e wehewehe ana i ke ki’i. Inā he manawa ka’awale paha ko ‘oukou, e naue aku i Honolulu Hale no ka māka’ika’i ‘ana aku i nā ki’i. A e komo aku paha i ka hana i kēia makahiki a’e. Ua komo aku nei ko ‘oukou mea kākau me kekahi o kona ‘ohana a aia nō ke kau a’ela ia mau ki’i.

Kū Kia’i Mauna. I nehinei, ua kū i mua o ka ‘aha ho’okolokolo ka hapanui o nā Kū Kia’i Mauna i hopu hewa ‘ia i ka lā ‘elua o ka mahina ‘o ‘Apelila ma Mauna Kea. Wahi a ka lohe, ua hana ‘ino ‘ia aku lākou. E ho’ouna aku i ke aloha, nā mana’o maika’i, a me nā pule no ka pono o lākou ala, nā Kū Kia’i Mauna a me Mauna Kea. Aloha ‘Āina.

This column is coordinated by Kawaihuelani Center for Hawaiian Language at the University of Hawai’i at Mānoa.