He ma’alea kā nā luna aupuni

Synopsis: State officials are quite crafty, but this type of smoke covering has been seen before in our history.

Aia nō nā luna aupuni ke ho’ā’o aku nei e kāpilipili aku i ka hewa ma luna o nā kia’i o Mauna Kea no nā hana like ‘ole. ‘O ka mea ‘āpiki, ‘o ia ka hana ma’a mau a ka po’e kū i ka hewa, ‘o ia ho’i, he kuhikuhi aku, a he haku wale i kahi manawa, i ka hewa e hana ‘ia ana e kekahi po’e. ‘O ia ka hana a kekahi mau lapuwale i ko kākou Mō’īwahine aloha, ‘o Lili’uokalani. Hauwala’au ana nā kānaka o ke aupuni kūikawā, he puni koko ka Mō’īwahine, a he ‘oki pu’u ho’i. ‘A’ole na’e he ‘oia’i’o o kā lākou ‘ōlelo. A he hana wale nō ia e ho’onalonalo ai i kā lākou hana i kū loa i ka hewa.

A ‘o ia ihola nō ho’i ka hana a nā luna aupuni i kēia manawa. Hō’ike ‘ia a’e nei kahi papa helu o nā pilikia like ‘ole ma Mauna Kea. A wahi a ia mau luna aupuni, na nā kia’i o Mauna Kea ia mau pilikia. A me ka mana’o paha, he kūpono ka pāpā ‘ana, ‘a’ole e hiki ke hele ma ke ala komo o Mauna Kea mai ka hola 8:00 o ke ahiahi a i ka hola 5:00 o ke kakahiaka, inā ‘a’ole e holo ana ma luna o ke ka’a. A e pāpā ‘ia nō ho’i ka lako ho’omoana, ‘o ke kapa moe a me ke kapolena nō ho’i, he ho’okahi mai ia ala aku i nā hola a pau o ka lā. Eia mai kekahi mau pilikia i helu papa ‘ia, ‘o ka ho’oweliweli ho’opahū i ke kikowaena ho’okipa malihini, ka ho’oweliweli hō’eha limahana kūkulu ‘ohe nānā kanakolu mika, ka maka weli a me ka ‘a’ā maka i nā limahana o ke kikowaena ho’okipa malihini, ka ‘uā ‘ana i loko o ka hale hō’ike’ike, ka ho’onāukiuki i nā malihini a me nā limahana, ka luku wale ‘ana i nā lumi ho’opau pilikia, ka ‘aihue ma ka hale kū’ai o laila, a pēlā aku. Akā, ‘o ia mau “pilikia,” ua hana ‘ia i ka wā e kau ana ka lā. No laila, pehea lā e pili ai? A ‘o kekahi, ‘o nā Hawai’i Alaka’i o luna o ka mauna, ‘o Kaho’okahi Kanuha, ‘o Lanakila Mangauil a me lākou ala, aia nō lākou ke kūpa’a a’ela i ke kapu aloha, a inā ‘ike lākou i ia ‘ano hana, e komo paha i mea e pau ai. No laila, kūpono ko lākou kia’i ‘ana ma ia wahi. E noho lākou i laila.

Mahalo nō ho’i i ka loio e kū ana ma hope o ia mau Hawai’i Alaka’i a me Mauna Kea, iā Richard Naiwieha Wurdeman.

Ka Ho’okūkū Mele A Mo’olelo. ‘Auhea ‘oukou, e nā kānaka haku mele a kākau mo’olelo paha, mai nō a poina i ka Ho’okūkū Mele A Mo’olelo. He iwakālua wale nō lā i koe, a hiki aku i ka lā kau palena. He pono ke waiho i ke mele a i ka mo’olelo paha i ka Lā Ho’iho’i Ea, ka lā 31 ho’i o Iulai. No laila, e ho’oka’awale paha i manawa e haku ai i mele no kou mea aloha, a e kākau ai paha i mo’olelo, a e lilo paha ‘o Mauna Kea a me nā Kū Kia’i Mauna paha i mea e ho’ohenoheno ai ma ke mele a ma ka mo’olelo paha. E waiho aku ma www.hawaiianliterature.com. Aia i laila ka palapala e ho’opihapiha ai. A he wahi makana nō e lilo ana i ka lanakila o ka māhele haku mele a me ka māhele kākau mo’olelo, he $500.

———

E ho’ouna ‘ia mai na ā leka iā māua, ‘o ia ho’i ‘o Laiana Wong a me Kekeha Solis ma ka pahu leka uila ma lalo nei:

>> kwong@hawaii.edu

>> rsolis@hawaii.edu

a i ‘ole ia, ma ke kelepona:

>> 956-2627 (Laiana)

>> 956-2627 (Kekeha)

This column is coordinated by Kawaihuelani Center for Hawaiian Language at the University of Hawai’i at Mānoa.